បច្ចេកវិទ្យាបញ្ញាសិប្បនិម្មិត (AI) មានការវិវត្តន៍កាន់តែឆាប់រហ័ស ពីមួយថ្ងៃទៅមួយ ដោយវាអាចមានសមត្ថភាពសរសេរកំណាព្យ បង្កើតផែនការអាជីវកម្ម ឬពិនិត្យមើលកំហុសក្នុងការសរសេរអ៊ីម៉ែលជាដើម។ ប៉ុន្តែតើអ្នកនឹងជឿជាក់លើចម្លើយរបស់បញ្ញាសិប្បនិម្មិត (AI) ដែលផ្ដល់ឱ្យទាំងស្រុងឬយ៉ាងណា? ហើយតើទិន្នន័យសំណួរដែលអ្នកបានសួរ នឹងមានអ្នកណាខ្លះបានឃើញ? ហើយតើ ChatGPT មានសុវត្ថិភាពខ្លាំងប៉ុណ្ណា? នេះជាសំណួរដែលអ្នកប្រើប្រាស់តែងចោទសួរ។

ពិតណាស់ដែលថា ChatGPT និងគម្រូភាសា LLMs បានផ្ដល់នូវអត្ថប្រយោជន៍ជាច្រើន សម្រាប់ការរស់នៅ និងបំពេញការងារ ប៉ុន្តែទន្ទឹមនឹងនេះ ក៏មាន​ហានិ​ភ័យជុំវិញភាពមិនត្រឹមត្រូវ ភាពលំអៀង បញ្ហាព័ត៌មានផ្ទាល់ខ្លួន និងសុវត្ថិភាពផងដែរ។ ស្របនឹងបញ្ហានេះ WE Forum បានបង្ហាញអំពី របៀបក្នុងការប្រើ ChatGPT ប្រកបដោយសុវត្ថិភាព និងស្របតាមតម្រូវការជាក់ស្ដែងរបស់អ្នក។

យកចិត្តទុកដាក់នឹងភាពមិនត្រឹមត្រូវ និងភាពលំអៀង របស់បញ្ញាសិប្បនិម្មិត (AI)

សមត្ថភាពក្នុងការផ្គត់ផ្គង់ព័ត៌មានប្រកបដោយគុណភាពរបស់បញ្ញសិប្បនិម្មិត (AI) គឺមានតែព័ត៌មានដែលត្រូវបានបង្វឹកវាតែប៉ុណ្ណោះ ខណៈបច្ចុប្បន្ន ព័ត៌មានដែលមានក្នុង ChatGPT គឺមានត្រឹមឆ្នាំ២០២១។ ជាមួយគ្នានេះ ទិន្នន័យដែលផ្ដល់ព័ត៌មាន LLMs ទំនងជាមានភស្តុតាង មតិយោបល់ និងការសន្និដ្ឋាន ដែលមិនអាចទុកចិត្តបាន។ ដូច្នេះ ហើយបញ្ហាភាពលំអៀង គឺជារឿងមួយ ដែលមិនអាចជៀសផុត។

ចំពោះការប្រើប្រាស់ផ្ទាល់ខ្លួន និងអាជីវកម្ម ត្រូវផ្ទៀងផ្ទាត់ភាពត្រឹមត្រូវ និងបញ្ហាលំអៀងជាចាំបាច់។ អ្នកអាចផ្ទៀងផ្ទាត់លើស្ថិតិ និងប្រភពព័ត៌មានផ្សេងៗជាច្រើន ដើម្បីកាត់បន្ថយការយល់ខុស និងភាពមិនត្រឹមត្រូវ។

ប្រុងប្រយ័ត្នចំពោះព័ត៌មានផ្ទាល់ខ្លួន ឬព័ត៌មានរស៊ើប

ChatGPT មិនរក្សាទុកទិន្នន័យជាក់លាក់របស់អ្នកប្រើ ហើយក៏មិនរក្សាទុករក្សាទិន្នន័យលម្អិតនៃអន្តរកម្មលើសពីការសន្ទនាភ្លាមៗនោះដែរ។ ប៉ុន្តែវារក្សាទុករាល់ការសន្ទនា ដែលអ្នកប្រើប្រាស់មានជាមួយវា ដោយរក្សាទុកយ៉ាងល្អ និងប្រើប្រាស់ទិន្នន័យនោះ ដើម្បីកែលម្អគម្រូភាសារបស់វា។ ដូច្នេះ អ្នកបង្ហាត់ ChatGPT ដែលជាបុគ្គលិក ធ្វើការនៅ Open AI អាចមើលឃើញរាល់ការសន្ទនា និងសំណួររបស់អ្នកប្រើប្រាស់។

ដើម្បីធានាបាននូវសុវត្ថិភាពសម្រាប់ព័ត៌មានផ្ទាល់ខ្លួន អ្នកត្រូវជៀសវាងការចែករំលែកទិន្នន័យ ដែលមានលក្ខណៈឯកជនភាព ឬទិន្នន័យរស៊ើបអំពីខ្លួនឯង ជាមួយ ChatGPT ហើយអ្នកអាចពិចារណាក្នុងការបិទប្រវត្តិសន្ទនា (disabling chat history) និង គម្រូបណ្ដុះបណ្ដាល (Model training)។ ប៉ុន្តែទោះជាអ្នកបិទប្រវត្តិសន្ទនាក៏ដោយ ក៏ទិន្នន័យនៃកិច្ចសន្ទនារបស់អ្នក នឹងនៅតែរក្សាទុកលើម៉ាស៊ីនមេ OpenAI សម្រាប់រយៈពេល ៣០ថ្ងៃដដែល។ ប្រសិនបើអ្នកមានអារម្មណ៍ថា ការបិទប្រវត្តិសន្ទនា នៅតែមិនគ្រប់គ្រាន់ អ្នកអាចស្នើសុំលុបគណនីរបស់អ្នកទាំងមូល ដោយផ្ញើអ៊ីម៉ែលទៅកាន់ [email protected] ។

ចំណុចសំខាន់ចុងក្រោយ ត្រូវមានការប្រុងប្រយ័ត្ននៅពេលដំឡើង ឬទាញយកកម្មវិធីបន្ថែមណាមួយ នៅលើកុំព្យូទ័រ ឬទូរស័ព្ទរបស់អ្នក។ កម្មវិធីបើកអ៊ីនធឺណិត ឬ Browser មួយចំនួន បានអះអាងថា មានមុខងារ ChatGPT នៅក្នុង Browser ដែលអាចនឹងកំពុងប្រមូលទិន្នន័យរបស់អ្នក៕