ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមប្រភពពី REUTERS បានឱ្យដឹងថា រយៈពេលប៉ុន្មានឆ្នាំចុងក្រោយនេះ អាជ្ញាធរចិនមានការព្រួយបារម្ភកាន់តែខ្លាំងឡើង អំពីអត្រានៃជំងឺម្ញូបភ្នែក (myopia) និងការញៀនអ៊ីនធឺណិតក្នុងចំណោមមនុស្សវ័យក្មេង។ ក្ដីព្រួយបារម្ភនេះ បានញ៉ាំងឱ្យនិយតករអ៊ីនធឺណិតរបស់ចិន បានចេញនូវសេចក្ដីព្រៀងច្បាប់មួយកាលពីពេលថ្មីៗនេះ ស្ដីពីការកំណត់ម៉ោងសម្រាប់កុមារប្រើស្មាតហ្វូន ដោយកំណត់ឱ្យកុមារដែលមានអាយុក្រោម ១៨ ឆ្នាំ គួរតែត្រូវបានកំណត់ម៉ោងជាអតិបរមា ២ម៉ោងក្នុងមួយថ្ងៃ។
រដ្ឋបាល Cyberspace នៃប្រទេសចិន (CAC) ចង់ឱ្យឧបករណ៍ឆ្លាតវៃ របស់អ្នកប្រើប្រាស់មានអាយុក្រោម ១៨ឆ្នាំ ត្រូវបានភ្ជាប់នូវកម្មវិធី minor mode ដែលជាកម្មវិធី មិនអនុញ្ញាតឱ្យកុមារចូលប្រើអ៊ីនធឺណិតចាប់ពីម៉ោង ១០យប់ដល់ម៉ោង ៦ព្រឹក។ លើសពីនេះ CAC បន្ថែមថា ក្រុមហ៊ុនផ្ដល់សេវាកម្មបច្ចេកវិទ្យា ក៏ត្រូវចូលរួមសហការ ក្នុងការចូលរួមអនុវត្តកំណែទម្រង់នេះដែរ។
នៅក្នុងសេចក្ដីព្រាងច្បាប់បានកំណត់ថា អ្នកប្រើប្រាស់ដែលមានអាយុពី ១៦ ទៅ ១៨ ឆ្នាំនឹងត្រូវបានអនុញ្ញាតពីរម៉ោងក្នុងមួយថ្ងៃ។ ដោយឡែកកុមារ ដែលមានអាយុពី ៨ ទៅ ១៦ ឆ្នាំអាចលេងបានមួយម៉ោង ខណៈពេលដែលកុមារអាយុក្រោម ៨ ឆ្នាំនឹងត្រូវបានអនុញ្ញាតលេងទូរស័ព្ទត្រឹម ៨ នាទី។ បន្ទាប់ពី CAC បានចេញផ្សាយសេចក្តីព្រាងច្បាប់ ដែលបើកចំហចំពោះមតិកែលម្អពីសាធារណៈរហូតដល់ថ្ងៃទី២ ខែកញ្ញា។ ភាគហ៊ុនរបស់ក្រុមហ៊ុនបច្ចេកវិទ្យាចិនភាគច្រើនបានធ្លាក់ចុះនៅក្នុងការជួញដូរក្នុងទីក្រុងហុងកុង។
លោក Xia Hailong មេធាវីនៅក្រុមហ៊ុនច្បាប់ Shanghai Shenlun បង្ហាញការយល់ឃើញចំពោះរឿងនេះថា ច្បាប់នេះនឹងធ្វើឱ្យបណ្ដារក្រុមហ៊ុនអ៊ីនធឺណិតឈឺក្បាល ហើយដើម្បីអនុវត្តបទបញ្ញាត្តិបានត្រឹមត្រូវ តម្រូវឱ្យមានការប្រឹងប្រែងខ្លាំង ព្រមទាំងចំណាយប្រាក់ច្រើន។ យ៉ាងណាមិញ ភាគរយដែលក្រុមហ៊ុនមិនអនុលោមតាមច្បាប់ក៏មានខ្ពស់ដែរ ។ ប៉ុន្តែលោកជឿថា ក្រុមហ៊ុនអ៊ីនធឺណិតភាគច្រើន អាចនឹងពិចារណា ហាមឃាត់អនីតិជនពីការប្រើប្រាស់សេវាកម្មរបស់ពួកគេ។
សូមជម្រាបថា កាលពីឆ្នាំ២០២១ រដ្ឋាភិបាលចិនក៏បានដាក់បម្រាមមិនឱ្យក្មេងដែលមានអាយុក្រោយ ១៨ឆ្នាំ លេងវីដេអូហ្គេមដែរ ហើយការអនុវត្តនាពេលនោះបានជះឥទ្ធិពលយ៉ាងខ្លាំងដល់ក្រុមហ៊ុន Tencent ដែលជាក្រុមហ៊ុនផលិតហ្គេមដ៏ធំបំផុតមួយរបស់ចិន៕
