ការរស់នៅក្នុងសម័យថ្មី មនុស្សតែងទទួលអារម្មណ៍តានតឹងក្នុងរូបភាពផ្សេងៗគ្នាជារៀងរាល់ថ្ងៃ អារម្មណ៍នេះអាចបណ្ដាលមកពីបញ្ហាស្ទះចរាចរណ៍ ការទទួលការងារច្រើនលើសកំណត់ និងឥទ្ធិពលអវិជ្ជមាននៃបណ្ដាញសង្គមជាដើម ។ ហេតុនេះ ប្រសិនបើមិនតាមដាន និងកំណត់មូលហេតុ ដែលនាំឱ្យស្ត្រេសបានត្រឹមត្រូវទេ វាអាចបង្ករផលប៉ះពាល់ដល់ផលិតភាពការងារ សុខភាពផ្លូវកាយ និងផ្លូវចិត្តផងដែរ ។ ម្ល៉ោះហើយ ការធ្វើកំណត់ហេតុស្ត្រេស (Stress Diary) មានសារៈសំខាន់សម្រាប់មនុស្សគ្រប់គ្នា ជាពិសេសយុវជន។

ការធ្វើកំណត់ហេតុស្ត្រេស )Stress Diary) ជួយឱ្យអ្នកដឹងពីរបៀបឆ្លើយតបទៅនឹងភាពតានតឹង ព្រមទាំងជួយឱ្យដឹងពីកម្រិតនៃសម្ពាធការងារដែលអ្នកអាចទទួលធ្វើបាន។

តើអ្វីជាកំណត់ហេតុស្ត្រេស (Stress Diary)?

កំណត់ហេតុស្ត្រេស (Stress Diary) គឺជាការកត់ត្រាជាប្រចាំ អំពីព័ត៌មាន ឬហេតុការណ៍ដែលនាំឱ្យអ្នកមានអារម្មណ៍តានតឹង ដែលអនុញ្ញាតឱ្យអ្នកអាចតាមដានសុខភាពផ្លូវចិត្ត និងគ្រប់គ្រងភាពតានតឹងបានល្អ ។ ខាងក្រោមនេះ ជាចំណុចសំខាន់ៗដែល កំណត់ហេតុស្ត្រេស (Stress Diary) អាចជួយអ្នក៖

• ដឹងអំពីមូលហេតុនៃភាពតានតឹងបានលម្អិត
• យល់ពីកម្រិតនៃសម្ពាធការងារ ដែលអ្នកអាចគ្រប់គ្រងបាន
• ដឹងអំពីរិធីពង្រឹងការគ្រប់គ្រងស្ត្រេស

ទិន្នន័យដែលត្រូវសរសេរចូលកំណត់ហេតុ

វិធីសាស្ត្រក្នុងការសរសេរកំណត់ហេតុនេះ ប្រភេទទិន្នន័យឱ្យបានត្រឹមត្រូវ និងត្រូវសរសេរជាប្រចាំ។ ពេលខ្លះ អ្នកក៏អាចសរសេរខណៈពេលកំពុងមានអារម្មណ៍តានតឹងបានផងដែរ និងត្រូវសរសេរទៅតាមចំណុចខាងក្រោមនេះ៖

• ម៉ោង និងកាលបរិច្ឆេទ
• ព្រឹត្តិការណ៍ក្នុងពេលថ្មីៗនេះ ដែលធ្វើឱ្យអ្នកមានអារម្មណ៍តានតឹងបំផុត
• តើពេលនេះអ្នកមានភាពរីករាយកម្រិតណា? វាយតម្លៃដោយដាក់ពិន្ទុពី ០ដល់ ១០ហើយបង្ហាញអារម្មណ៍របស់អ្នក ខណៈពេលកំពុងសរសេរ។ (លេខ ០ តំណាងឱ្យអារម្មណ៍មិនសប្បាយចិត្ត ចំណែកលេខ ១០ តំណាងឱ្យអារម្មណ៍សប្បាយចិត្តបំផុត)
• តើអ្នកបំពេញការងារបានល្អកម្រិតណា? វាយតម្លៃដោយដាក់ពិន្ទុពី ០ដល់ ១០។ (លេខ 0 មានន័យថា អ្នកមិនបានធ្វើអ្វីទាំងអស់ ចំណែកលេខ ១០មានន័យថា អ្នកសម្រេចការងារបានល្អ និងមានប្រសិទ្ធភាពបំផុត)
• មូលហេតុដែលនាំឱ្យអ្នកមានភាពតានតឹង (ត្រូវសរសេរឱ្យស្មោះត្រង់)
• រោគសញ្ញានៃអារម្មណ៍ដែលអ្នកជួបប្រទះ ដែលមានដូចជា ភ័យខ្លាច ខឹង ជីពចរលោតញាប់ បែកញើសបាតដៃ និងឈឺក្បាលជាដើម។
• តើអ្នកអាចដោះស្រាយបញ្ហាបានល្អកម្រិតណា? តើប្រតិកម្មតបរបស់អ្នកចំពោះបញ្ហា ធ្វើឱ្យស្ថានភាពល្អប្រសើរ ឬកាន់តែអាក្រក់?

វិភាគ កំណត់មូលហេតុ និងបង្កើតដំណោះស្រាយ

នៅពេលដែលអ្នកសរសេរកំណត់ហេតុបានច្រើនថ្ងៃ អ្នកនឹងអាចវិភាគ កំណត់មូលហេតុនៃភាពស្ត្រេសបាន តាមរយៈទិន្នន័យដែលអ្នកបានសរសេរ បន្ទាប់មក ជាដំណាក់កាលចាត់វិធានការដោះស្រាយ ដោយត្រូវអនុវត្តតាមវិធីខាងក្រោម៖

• ដំបូងអ្នកត្រូវអានមូលហេតុទាំងអស់ដែលបណ្ដាលឱ្យអ្នកតានតឹង នៅអំឡុងពេលដែលអ្នកបានធ្វើកំណត់ហេតុ។ បន្ទាប់មកត្រូវហាយឡាញ មូលហេតុដែលបង្ករភាពតានតឹងញឹកញាប់បំផុត។
• មើលពិន្ទុនៃកម្រិតភាពរីករាយ និងប្រសិទ្ធភាពការងាររបស់អ្នក បន្ទាប់មកកំណត់ពីចំណុចខ្វះខាតដែលអ្នកត្រូវកែតម្រូវ និងបំពេញបន្ថែម។
• ត្រូវកត់សម្គាល់ស្ថានភាពដែលនាំឱ្យអ្នកស្រ្តេស ដោយសរសេរវាជាចំណុចៗ ហើយគិតពីវិធី ដែលអ្នកអាចផ្លាស់ប្ដូរស្ថានភាពនេះ ឱ្យមានភាពប្រសើរឡើង។
• ចំណុចចុងក្រោយ ត្រូវពិនិត្យមើលអារម្មណ៍ខ្លួនឯង ថាតើអ្នកមានអារម្មណ៍បែបណា នៅពេលស្ថិតនៅក្រោមសម្ពាធ។ បន្ទាប់មក ត្រូវស្វែងយល់ពីឥទ្ធិពលនៃអារម្មណ៍នោះទៅលើផលិតភាពការងារ និងភាពរីករាយរបស់អ្នក។ ត្រូវកំណត់ឱ្យបានច្បាស់ថា តើសម្ពាធកម្រិតណា ដែលអ្នកអាចបំពេញការងារបានល្អបំផុត ព្រមទាំងមានអារម្មណ៍រីករាយនឹងការងារ។

បន្ថែមពីនេះ នៅពេលវិភាគ អ្នកគួរយល់ឱ្យបានច្បាស់អំពីមូលហេតុនៃភាពតានតឹងក្នុងជីវិតរបស់អ្នក។ លើសពីនេះ ត្រូវដឹងអំពីសមត្ថភាពខ្លួនឯងថា តើអាចឆ្លើយតបនឹងសម្ពាធបានល្អបំផុតត្រឹមកម្រិតណា។ ជាពិសេស អ្នកក៏ត្រូវដឹងអំពីប្រភេទនៃស្ថានភាព ដែលបង្ករឱ្យអ្នកមានភាពតានតឹងខ្លាំងបំផុតផងដែរ ដើម្បីងាយស្រួលរកដំណោះស្រាយ និងងាយស្រួលរំដោះខ្លួនពីវិបត្តិ។

គួរបញ្ជាក់ផងដែរថា កំណត់ហេតុនេះមានប្រសិទ្ធភាពបំផុត ក្នុងអំឡុងពេល ២ ទៅ៣សប្ដាហ៍ដំបូង។ បន្ទាប់ពីពេលនេះ វាជាពេលដែលយើងត្រូវគ្រប់គ្រងបញ្ហាស្ត្រេសវិញម្ដង តាមរយៈការអនុវត្តដំណោះស្រាយដែលអ្នករកឃើញ។ យ៉ាងណាមិញ ប្រសិនបើអ្នកផ្លាស់ប្ដូររបៀបរស់នៅ វិបត្តិថ្មីៗក៏អាចនឹងកើតឡើងផងដែរ ហេតុនេះ អ្នកត្រូវស្វែងរកដំណោះស្រាយថ្មីដូចគ្នា៕