ទឹករលក ពន្លឺព្រះអាទិត្យ និងខ្យល់បរិសុទ្ធ ឋិតនៅឆ្នេរសមុទ្រទាំងព្រម ហើយសុទ្ធសឹងតែជាបរិយាកាសធម្មជាតិ ជំរុញឱ្យអ្នកដែលបានទៅដល់ទីនោះ មានឱកាសពង្រឹងសុខភាពរាងកាយ និងផ្លូវចិត្ត ព្រមទាំងអាចបង្កើនទំនាក់ទំនងក្នុងសង្គមបានមួយផ្នែកដែរ។ យោងតាមគេហទំព័រ verywellmind បានប្រាប់ពីហេតុផល និងអត្ថប្រយោជន៍នៃការទៅឆ្នេរសមុទ្រ ដូចជា ៖

អត្ថប្រយោជន៍ពេលបាននៅក្បែរទឹក ៖ កាលដែលបាននៅជិតផ្ទៃទឹកដូចជាសមុទ្រ អាងហែលទឹក ទន្លេ បឹង ឬក៏ស្រះជាដើម គឺនាំមកនូវអត្ថប្រយោជន៍ជាច្រើនដូចជា ការបន្ធូរអារម្មណ៍ ការភ្ជាប់ទំនាក់ទំនងជាមួយមនុស្សឯទៀតនៅក្នុងសង្គម និងជួយឱ្យសុខភាពខួរក្បាលមានប្រព័ន្ធដំណើរការល្អ ថែមទាំងជួយឱ្យរាងកាយមានចលនាលឿនរហ័សផងដែរ ។ ដោយហេតុតែមានកត្តាយ៉ាងច្រើនបែបនេះហើយ ទើបអ្នកជំនាញផ្នែកសុខភាពផ្លូវចិត្តបានលើកទឹកចិត្តឱ្យមនុស្សចំណាយពេលនៅជិតទឹកឱ្យបានច្រើន តាមដែលអាចធ្វើបាន ព្រោះវាជួយអភិវឌ្ឍន៍សុខុមាលភាពក្នុងការរស់នៅ។

មានវិតាមីន D ៖ ដោយសារតែបរិយាកាសនៅសមុទ្រក៏មានពន្លឺព្រះអាទិត្យ ដែលមានវីតាមីន D  ទើបអ្នកជំនាញបានឱ្យដឹងថា វាអាចជួយបង្កើន serotonin ដែលជួយសម្រួលទៅកាន់សរសៃឬប្រព័ន្ធខួរក្បាល និងផ្នែកស្មារតីផងដែរ។ បន្ថែមពីនោះវីតាមីន D  ក៏ជួយរក្សាសុខភាពឆ្អឹង និងប្រព័ន្ធការពាររាងកាយរឹងមាំបានមួយកម្រិតដែរ។ យ៉ាងណាមិញ លោកអ្នកក៏មិនគួរចំណាយពេលលើសលប់ នៅក្រោមកម្តៅថ្ងៃយូរពេកដែរ ព្រោះវាអាចប៉ះពាល់ដល់ស្បែករបស់អ្នក។

សមុទ្រមានខ្យល់បរិសុទ្ធ ៖ ខ្យល់អាកាសនៅតាមឆ្នេរសមុទ្រ ជាទូទៅគឺបានផ្តល់ប្រយោជន៍ទាំងផ្នែករាងកាយ និងផ្លូវចិត្ត ហើយការសិក្សាក៏បានបញ្ជាក់ដែរថា ការបង្កើតសកម្មភាពកម្សាន្តនៅខាងក្រៅអាចជួយពង្រឹងសុខុមាលភាពបានច្រើនជាបរិយាកាសនៅក្នុងបរិវេណបិទជិត ឬមិនមានខ្យល់ចេញចូល។ ចំណែកឯការសិក្សាមួយទៀតក៏បានបញ្ជាក់ដែរថា ធម្មជាតិធ្វើឱ្យមនុស្សមានអារម្មណ៍រីករាយ មានអារម្មណ៍ល្អ ជំរុញឱ្យផ្លូវចិត្តមានសន្តិភាព និងជាការសម្រាកកម្សាន្តមួយដែលសម្បូរទៅដោយភាពរីករាយ។

យ៉ាងណាក៏ដោយ បើទោះបីជាសកម្មភាពបរិយាកាសខាងក្រៅធ្វើឱ្យអ្នកមានអារម្មណ៍រីករាយពិតមែន ប៉ុន្តែកុំភ្លេចអនុញ្ញាតឱ្យរាងកាយបានសម្រាក និងព្យាយាមដកដង្ហើមឱ្យវែងៗ ព្រោះនេះគឺជាវីធីសាស្រ្តនៃការទាញប្រយោជន៍ពីធម្មជាតិបន្ថែមមួយកម្រិតទៀត។ ឬក៏អាចអនុវត្តន៍សកម្មភាពមួយបែបទៀត ដោយការហាត់យូហ្កា ធ្វើសមាធិ ឬក៏យកកុំព្យូរទ័រទៅធ្វើការនៅខាងក្រៅ ក៏ជាការបង្កើនផលិតភាពជាមួយនឹងទេសភាពបានមួយបែបទៀតដែរ។

បំបាត់ភាពតានតឹង ៖ បរិវេណឆ្នេរសមុទ្របានផ្តល់កន្លែងគ្រប់គ្រាន់សម្រាប់ កុមារ និងមនុស្សពេញវ័យ ដើម្បីបង្កើតសកម្មភាពកម្សាន្តៗជាច្រើនស្របនឹងបរិយាកាសធម្មជាតិ ប៉ុន្តែអ្វីដែលកាន់តែពិសេសទៀតនោះគឺ វាជាទីតាំងដ៏សមគួរមួយ សម្រាប់កាត់បន្ថយភាពតានតឹង និងផ្តល់ភាពរីករាយទៅកាន់បុគ្គល និងគ្រួសារទាំងមូល។

សមុទ្រជួយឱ្យអារម្មណ៍ធូរស្បើយ ៖ សមុទ្រគឺជាទីតាំងដ៏ប្រពៃសម្រាប់អនុវត្តន៍ សកម្មភាពដូចជា បន្ធូរបន្ថយទុក្ខកង្វល់ បំបាត់ភាពតានតឹង ហើយការជួយឱ្យអារម្មណ៍ល្អ ដោយអ្នកគ្រាន់តែចំណាយពេលស្ដាប់រលកសមុទ្រ សើចឬស្រែកឱ្យធូរចិត្ត ឬអនុញ្ញាតឱ្យរាងកាយប៉ះជាមួយគ្រាប់ខ្សាច់ ទឹកសមុទ្រ និងពន្លឺព្រះអាទិត្រជាដើម បូករួមជាមួយការបណ្តែតអារម្មណ៍គយគន់ទឹកសមុទ្រ។

បង្កើតសម្ព័នភាពថ្មីៗ ៖ នៅលើឆ្នេរសមុទ្រអ្នកអាចលេងកីឡាចម្រុះប្រភេទដូចជា បាល់ទាត់ បាល់ទះ កីឡាបាល់ឱប មិនថាអ្នកជាអ្នកជំនាញ ឬក៏មិនជំនាញក៏ដោយ លោកអ្នកអាចចាប់ផ្តើមលេង ឬការចូលរួមលេងជាមួយគេឯង ដែលសកម្មភាពទាំងអស់នេះហើយជួយឱ្យអ្នកមានការភ្ជាប់ទំនាក់ទំនងជាមួយអ្នកដទៃ ឬក៏អាចបង្កើនមិត្តថ្មីៗបន្ថែម៕