ជំនាញវិស្វកម្មបណ្ដាញ (Network Engineer), អ្នកគាំទ្រផ្នែកបច្ចេកទេស​ (Technical Support), អ្នកអភិវឌ្ឍកម្មវិធីកុំព្យូទ័រ (Software Engineer), អ្នកជំនាញផ្នែក Cloud និងតេឡេខំ (Telecommunication) គឺជាជំនាញដែលកំពុងមានតម្រូវការខ្ពស់។ នេះបើតាមការបញ្ជាក់របស់មន្រ្តីធនធាន​មនុស្ស នៃក្រុមហ៊ុនអ៉ីនធឺណិត ក៏​ដូចជា​ក្រុមហ៊ុនទូរស័ព្ទ ក្នុង​ឱកាស​ពិព័រណ៌​ការងារ និងផលិតភាពជាតិ កាលពីចុងសប្តាហ៍នេះ។

កញ្ញា យន់ ចំណា មន្ត្រីជាន់ខ្ពស់ផ្នែកជ្រើសរើសបុគ្គលិក នៃក្រុមហ៊ុនអ៊ីនធឺណេត NTC បានលើកឡើងថា បច្ចុប្បន្ន ដោយសារក្រុមហ៊ុនរបស់កញ្ញា ជាក្រុមហ៊ុនផ្ដល់សេវាអ៊ីនធឺណិត ហេតុនេះ តម្រូវការបុគ្គលិកផ្នែក Networking និងបច្ចេកវិទ្យា ដូចជា វិស្វករបណ្ដាញ (Network Engineer), ជំនាញគាំទ្រផ្នែកបច្ចេកទេស (Technical Support), អ្នកអភិវឌ្ឍកម្មវិធីកុំព្យូទ័រ (Software Engineer), អ្នកជំនាញផ្នែក Cloud និងអ្នកអូសបណ្ដាញខ្សែងកាប ជាដើម។ កញ្ញាថា ជំនាញដែលរៀបរាប់នេះ គឺមានមានតម្រូវការខ្ពស់ និង​កំពុងខ្វះខាត។

ដោយឡែកលោក អាង សុខគា ប្រធានផ្នែកធនធានមនុស្ស និងរដ្ឋបាលនៃក្រុមហ៊ុនមេគង្គណិត (MekongNet) ក៏​បានលើកឡើងដែរថា ជាការពិតក្រុមហ៊ុនរបស់លោកកំពុងត្រូវការបុគ្គលិក ជាច្រើនផ្នែក ប៉ុន្តែបើនិយាយពីជំនាញបច្ចេកវិទ្យា និងឌីជីថល ក្រុមហ៊ុនមេគង្គណិត មានតម្រូវការអ្នកជំនាញផ្នែកបណ្ដាញច្រើន (Networking)។

សម្រាប់ កញ្ញា រឿន រ៉ាហ្ស៊ី មន្ត្រីជាន់ខ្ពស់ផ្នែកជ្រើសរើសបុគ្គលិក នៃក្រុមហ៊ុន Smart Axiata ដែលជាក្រុមហ៊ុនប្រតិបត្តិការប្រព័ន្ធទូរស័ព្ទវិញ បញ្ជាក់ប្រាប់ AMS Education ថា បច្ចុប្បន្នបើនិយាយពីជំនាញបច្ចេកទេស ក្រុមហ៊ុនមានតម្រូវការជំនាញផ្នែកតេឡេខំ (Telecommunication) ខ្លាំង ខណៈជំនាញឌីជីថល និងបច្ចេកវិទ្យា ដូចជា អ្នកអភិវឌ្ឍកម្មវិធីទូរសព្ទ (Software Engineer) ក៏មានតម្រូវការខ្ពស់ដែរ។

យ៉ាងណាក៏ដោយ បើតាមអ្នកជំនាញធនធានមនុស្សទាំងបីរូប ការមានត្រឹមតែជំនាញបច្ចេកទេស មិនទាន់គ្រប់គ្រាន់ទេ សម្រាប់យុវជន និងអ្នកកំពុងស្វែងរកការងារ ក្នុងបរិបទសង្គមសព្វថ្ងៃ។ បន្ថែមពីលើជំនាញបច្ចេកទេស យុវជនចាំបាច់ត្រូវមាន ៖ ទី១​ មានចំណេះដឹងភាសាបរទេស ជាពិសេស គឺភាសាចិន និងអង់គ្លេស, ទី២ ជំនាញទន់ រួមមានដូចជា មានអត្តចរិតល្អ ចេះដាក់ខ្លួន ស្មោះត្រង់ និងខិតខំធ្វើការ, ទី៣ យុវជន ត្រូវមានជំនាញទាក់ទំនង។

បើតាមអ្នកជំនាញធនធានមនុស្ស ទីផ្សារការងារនៅប្រទេសកម្ពុជាបច្ចុប្បន្ន កំពុងមានការប្រកួតប្រជែង ដូច្នេះ ទាមទារឱ្យយុវជន ត្រូវបន្តអភិវឌ្ឍជំនាញ សមត្ថភាព និងចំណេះដឹងជាប់ជាប្រចាំ ប្រសិនបើយុវជន មានជំនាញបច្ចេកទេសពូកែ ជំនាញទន់ និងភាសា គាត់មានទទួលបានអាទិភាពខ្ពស់ក្នុងទីផ្សារ៕