ក្រោយការធ្វើបទបង្ហាញយ៉ាងស្វិតស្វាញអំពីគម្រោងអាជីវកម្មរបស់បេក្ខនិស្សិតចំនួន២១ក្រុម ទីបំផុតទៅក្រសួងអប់រំ យុវជន និងកីឡា បានរកឃើញបេក្ខនិស្សិត១០ក្រុមចុងក្រោយ ដែលពួកគេ​នឹងបន្តទៅវគ្គផ្ដាច់ព្រ័ត្រក្នុងការប្រកួតកម្មវិធីយុវជន២១ នាខែតុលាខាងមុខ។

បេក្ខនិស្សិត១០ក្រុម ដែលបានជាប់ក្នុងវគ្គជម្រុះ “នៃកម្មវិធី “យុវជន២១ (Youth21)” ក្រោមប្រធានបទ “Technopreneurship: Innovation for Sustainability” រួមមាន ទី១. សាកលវិទ្យាល័យប៊ែលធីអន្តរជាតិ គម្រោងអាជីវកម្ម ៖ យល់ចិត្ត២១, ទី២. សាកលវិទ្យាល័យជាតិជាស៊ីមកំចាយមារ ខេត្តព្រៃវែង គម្រោងអាជីវកម្ម៖ Banana Eco-Friendly, ទី៣. សាកលវិទ្យាល័យជាតិគ្រប់គ្រង គម្រោងអាជីវកម្ម៖ ត្រជាក់-Trojeak, ទី៤. បណ្ឌិតសភាបច្ចេកវិទ្យា គម្រោងអាជីវកម្ម៖ GreenLink, ទី៥. សាកលវិទ្យាល័យក្រចេះ គម្រោងអាជីវកម្ម៖ សេវាផ្គត់ផ្គង់ទូរសម្ងួតឆ្លាតវៃ, ទី៦. វិទ្យាស្ថានវិទ្យាសាស្រ្តសុខាភិបាល ខ.ភ.ម គម្រោងអាជីវកម្ម៖ មាតា-MEADA, ទី៧. សាកលវិទ្យាល័យភូមិន្ទវិចិត្រសិល្បៈ គម្រោងអាជីវកម្ម៖ ALFA: drink smart,live green, ទី៨. សាកលវិទ្យាល័យស្វាយរៀង គម្រោងអាជីវកម្ម៖ SRU-សម្ងួត, ទី៩. សាកលវិទ្យាល័យកម្ពុជា គម្រោងអាជីវកម្ម៖ ហាត់ប្រាណ និង ទី១០. សាកលវិទ្យាល័យភូមិន្ទកសិកម្ម គម្រោងអាជីវកម្ម៖ អេកូសំរាម។

ឯកឧត្តម សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា មានប្រសាសន៍ថា កម្មវិធីយុវជន២១ ត្រូវ​បាន​រៀបចំឡើងដោយ​មានទាំងការបណ្ដុះបណ្ដាល ការប្រកួតប្រជែង ការចុះកម្មសិក្សាជាក់ស្ដែងក្នុងកិច្ចការសហគ្រិនភាព និងធុរកិច្ចបែបឌីជីថល ដើម្បីធានាថា ប្អូនៗយុវជនអាចទទួលបានចំណេះ ជំនាញ បទពិសោធន៍ សម្រាប់ទុកជាមេរៀន និងជាដំណោះស្រាយទៅថ្ងៃអនាគត។

ឯកឧត្តម សេរី ជំនះ បញ្ជាក់ថា ការបង្កើតអាជីវកម្មជារឿងងាយស្រួលទេ ប៉ុន្តែអ្វី​ដែលពិបាក គឺត្រូវធ្វើយ៉ាងណាដើម្បីឱ្យដើរទៅមុខបាន និងអាចទទួលបានជោគជ័យ។ ឯកឧត្តមបន្តថា កម្មវិធីយុវជន២១ នឹងផ្ដល់នូវចំណេះដឹងសម្រាប់ត្រៀមលក្ខណៈឱ្យយុវជនចេះរៀបចំផែនការអាជីវកម្ម ការគិតគូរត្រៀមអំពីហានិភ័យក្នុងអាជីវកម្មជាដើម, ទន្ទឹមគ្នានេះ ក្រុមបេក្ខជនត្រូវយកចិត្តទុកដាក់ផ្ដួចផ្ដើមផែនការអាជីវកម្ម ដែលចូលរួមចំណែកដោះស្រាយបញ្ហាសហគមន៍ និងសង្គមជាតិផងដែរ។

ជាមួយគ្នានេះ ឯកឧត្តមរដ្ឋលេខាធិការ ក៏​បានកោតសរសើរ​ដល់ប្អូនៗជាបេក្ខជនដែលបានខិតខំតស៊ូ អត់ធ្មត់ ព្យាយាមរហូតមកដល់ដំណាក់កាលនេះ ប៉ុន្តែត្រូវខិតខំប្រឹងប្រែងបន្តទៀត ក្រេបជញ្ជក់យកចំណេះដឹង និងទទួលយកបទពិសោធន៍ផ្សេងៗដើម្បីអភិវឌ្ឍសមត្ថភាពឱ្យកាន់តែរីកចម្រើនក្នុងបរិបទឌីជីថល។ លើសពីនេះ សូមមានឥរិយាបទល្អ ក្នុងការប្រកួតប្រជែង ក៏ដូចជាការរស់នៅ ការប្រកបអាជីវកម្ម និងការទំនាក់ទំនងក្នុងសង្គម។ ជាពិសេស ខិតខំប្រឹងប្រែងធ្វើការងារជាក្រុមឱ្យបានល្អ ត្រូវរក្សាការសាមគ្គីភាពផ្ទៃក្នុង និងស្មារតីការងារជាក្រុម។ ឯកឧត្តមក៏លើកទឹកចិត្តប្អូនៗជាយុវជនឱ្យចូលរួមកម្មវិធីប្រកួតប្រជែងផ្សេងៗបន្ថែមទៀតទាំងក្នុងកម្រិតជាតិ និងអន្តរជាតិ។

គួរជំរាបជូនថា កម្មវិធី “យុវជន២១ (Youth21)” ត្រូវ​បាន​រៀបចំឡើងក្នុងគោលបំណងអភិវឌ្ឍសមត្ថភាព និងប្រែក្លាយយុវជនកម្ពុជាឱ្យមានជំនាញច្បាស់លាស់ និងបំណិនបែបឌីជីថល អាចប្រើប្រាស់បច្ចេកវិទ្យាក្នុងការដោះស្រាយបញ្ហា តាមរយ:ការរៀបចំផែនការអាជីវកម្មបែបឌីជីថល ដែលយុវជនត្រូវចូលរួមវគ្គបណ្តុះបណ្តាល ការប្រកួតជម្រុះ និងការប្រកួតដណ្តើមជ័យលាភីសម្រាប់ឆ្នាំ២០២៥។ កម្មវិធីយុវជន២១ ឆ្នាំ២០២៥ មានគ្រូដឹកនាំ និងបេក្ខនិស្សិតចំនួន ២១ក្រុម សរុប១៤៧នាក់ មកពីគ្រឹះស្ថានឧត្តមសិក្សារដ្ឋ និងឯកជនចូលរួមប្រកួតប្រជែង៕