បន្ទាប់ពីបានឆ្លងកាត់ការលូតលាស់បន្តិចម្តងៗពីកុមារភាពដែលពោរពេញដោយការការពារ កុមារនឹងត្រូវឈានជើងចូលទៅក្នុងដំណាក់កាលបន្តបន្ទាប់ដែលស្មុគស្មាញ និងពោរពេញដោយការប្រែប្រួល។ វាគឺជាការផ្លាស់ប្តូរដែលមិនមែនមានតែផ្នែករូបរាងកាយប៉ុណ្ណោះទេ ប៉ុន្តែក៏​មានផ្នែកអារម្មណ៍ផងដែរ។ ការយល់ដឹងពីការវិវឌ្ឍរបស់កុមារ គឺជារឿង​ដ៏សំខាន់ដែលជួយឱ្យឪពុកម្តាយ អ្នក​អាណាព្យាបាលអាចផ្តល់នូវការគាំទ្រចំគោលដៅ និងប្រកបដោយក្តីស្រឡាញ់។

ខាងក្រោមនេះគឺជាយុទ្ធសាស្ត្រគាំទ្រកូនៗក្នុងដំណាក់កាលសំខាន់ៗទាំង ៥ នៃការលូតលាស់របស់កុមារ៖

១.ដំណាក់កាលទារក(០-១២ខែ) ៖ ទារកគឺជាដំណាក់កាលដ៏សំខាន់មួយ គឺពឹងផ្អែកទាំងស្រុងលើអ្នកថែទាំ ហើយការមើលថែ ក៏ជាផ្នែកមួយដែលកំណត់ឥរិយាបថនាពេលអនាគតរបស់ ទារក។ ក្នុងអំឡុងដំណាក់កាលនេះទារកលូតលាស់រាងកាយយ៉ាងឆាប់រហ័ស សមត្ថភាពចលនា និងការចាប់ផ្តើមចេះស្វែងយល់ពីអារម្មណ៍។ ក្នុងដំណាក់កាលនេះ សូមផ្តល់ការមើលថែជាចម្បងពីមាតាបិតា បង្កើតបរិយាកាសសុវត្ថិភាព និងការកម្សាន្តសម្រាប់កុមារ។

២. ដំណាក់កាលអាយុ ១-៣ ឆ្នាំ ៖ កុមារចាប់ផ្តើមចេះដើរ និយាយបានខ្លះ និងស្គាល់ពីបរិស្ថានជុំវិញខ្លួន។ ចាប់ផ្តើមចេះបង្ហាញពីតម្រូវការ និងការចង់បាន។ ដូច្នេះជាការគាំទ្រឪពុកម្តាយ អ្នកអាណាព្យាបាល គួរលេងជាមួយពួកគេ កំណត់ភាពច្បាស់លាស់ និងជួយកែសម្រួល អាកប្បកិរិយារបស់កូន។

៣. ដំណាក់កាលអាយុ ៣-៥ ឆ្នាំ ៖ កុមារចាប់ផ្តើមអភិវឌ្ឍជំនាញសង្គម ចេះមានទំនាក់ទំនងជាមួយមិត្តភក្តិ មនុស្សពេញវ័យ និងការដោះស្រាយបញ្ហា។ វិធីគាំទ្រពួកគេនៅក្នុងដំណាក់កាលនេះ គឺរៀបចំល្បែងសិក្សា លើកទឹកចិត្តឲ្យកុមារហ៊ានបញ្ចេញអារម្មណ៍ និងមានការអភិវឌ្ឍន៍។

៤. ដំណាក់កាលអាយុ ៦-១២ ឆ្នាំ ៖ កុមារចាប់ផ្តើមអភិវឌ្ឍជំនាញអប់រំ ជំនាញសង្គម និងការងារជាក្រុម។ វិធីគាំទ្រ​ពួកគេ​នៅពេលនេះ គឺលើកទឹកចិត្តឱ្យ​កុមារចូលរួមសកម្មភាពសង្គម និងលើកកម្ពស់ការសម្រេចចិត្តប្រកបដោយការទទួលខុសត្រូវ។ ។

៥. ដំណាក់កាលអាយុ ១៣-១៨ ឆ្នាំ ៖ នៅពេលដែលកុមារឈានចូលដល់វ័យជំទង់ ដំណើរការលូតលាស់របស់ពួកគេមានការវិវឌ្ឍន៍យ៉ាងខ្លាំង។ ការផ្លាស់ប្តូររាងកាយ អារម្មណ៍និងការយល់ដឹងអំពីការផ្លាស់ប្តូរនេះ គឺមាន សារៈសំខាន់ណាស់សម្រាប់ឪពុកម្តាយ ដើម្បីអភិវឌ្ឍជំនាញសំខាន់ៗដែលកំណត់ផ្លូវជីវិតរបស់ពួកគេ សង្កត់ធ្ងន់លើទំនាក់ទំនង ការស្វែងរកខ្លួនឯង និងការស្វែងយល់ពីចំណង់ចំណូលចិត្ត។

សរុបមកវិញ ដំណាក់កាលទាំង៥ នៃការអភិវឌ្ឍន៍កុមារភាពគឺ មានសារៈសំខាន់ ណាស់ ទាមទារការគាំទ្រពីឪពុកម្តាយយ៉ាងសកម្មនៅគ្រប់ដំណាក់កាល។ ការស្វែងយល់ពីដំណាក់កាលនីមួយៗ និងការបន្តចូលរួមអាចបង្កើតមូលដ្ឋានគ្រឹះដ៏រឹងមាំសម្រាប់អនាគតរបស់កូន៕