ដើម្បីទទួលបាននូវភាពរីករាយ មនុស្សអាចអនុវត្តន៍តាមរយៈវិធីសាស្រ្ត និងសកម្មភាពផ្សេងៗគ្នា មិនថាតាមរយៈការនៅជាមួយខ្លួនឯង ឬស្វែងរកភាពសប្បាយពីមជ្ឈដ្ឋានខាងក្រៅ។ យ៉ាងណាមិញ គេហទំព័រ bestlifeonline បានបង្ហាញសកម្មភាពប្រាំពីរចំណុច ដែលក្រុមមនុស្សរីករាយតែងអនុវត្តន៍នៅចុងសប្តាហ៍៖

១. ថែទាំខ្លួនឯង ៖ បន្ទាប់ពីការចំណាយពេលពេញមួយសប្តាហ៍ ជាមួយនឹងកិច្ចការដ៏មមាញឹកហើយ មនុស្សដែលមានទម្លាប់រីករាយ ពួកគេបានដឹងយ៉ាងច្បាស់ថាពេលណាដែលត្រូវចំណាយពេលមកមើលថែខ្លួនឯង ដែលសកម្មភាពទាំងនោះរួមបញ្ចូលទាំងការធ្វើចលនាតាមរយៈការហាត់ប្រាណ ការអានសៀវភៅ ងូតទឹកឬត្រាំទឹកក្ដៅឧណ្ហៗ ការចេញទៅក្រៅដើម្បីមើលកុន សមាធិ រួមទាំងសកម្មភាពដទៃទៀតដែលអាចទាញថាមពលត្រឡប់មកវិញបាន។ ការចាប់ផ្តើមនៅព្រឹកថ្ងៃសៅរ៍ ដោយសកម្មភាពការធ្វើសមាធិ ដកដង្ហើមវែងៗ ឬអង្គុយក្នុងកន្លែងស្ងប់ស្ងាត់យ៉ាងហោចណាស់២០នាទី វាគឺជាសកម្មភាពដែលផ្តល់ផលវិជ្ជមានទៅកាន់សុខភាពផ្លូវចិត្ត។​

២. ចំណាយពេលជាមួយមនុស្សជាទីស្រឡាញ់ ៖ ទម្លាប់របស់មនុស្សដែលមានភាពរីករាយ ពួកគេតែងតែគិតគូរអំពីការចំណាយពេលវេលា ហើយនៅរៀងរាល់សម្រាកពីការងារ ពួកគេបានចែករំលែកពេលខ្លះ សម្រាប់មនុស្សដែលសិទ្ធស្នាល ឬជាទីស្រឡាញ់ណាម្នាក់ ដូចជាមិត្តជិតស្និទ្ធ សមាជិកគ្រួសារ តាមរយៈការញាំអាហារជុំគ្នា បង្កើតកិច្ចសន្ទនាដែលបង្កប់ដោយភាសាយល់ចិត្ត ដែលសកម្មភាពទាំងនេះបង្កើតបានទៅជាភាពស្និតរមូតរវាងគ្នានឹងគ្នា។

៣.ធ្វើផែនការសម្រាប់សប្តាហ៍បន្ទាប់ ៖ ប្រសិនបើអ្នកចំណាយពេលស្មុគស្មាញក្នុងរយៈពេលប្រាំទៅប្រាំមួយថ្ងៃរួចហើយ នោះការសរសេរផែនការសកម្មភាពទុកសម្រាប់សប្តាហ៍ថ្មី គឺជាការរៀបចំភាពរប៉ាត់រប៉ាយសម្រាប់ពេលបន្ទាប់ ។ ដែលសកម្មភាពទាំងនេះ រួមបញ្ចូលទាំងការសរសេរគោលដៅ ការត្រៀមនិងរៀបចំអាហារ ឬរៀបចំប្រភេទការងារជាដើម។ ប៉ុន្តែក៏មិនត្រូវចំណាយពេលពេញម៉ោងនៅថ្ងៃឈប់សម្រាក់ក្នុងការបំពេញនោះដែរ គ្រាន់តែចំណាយពេលខ្លះក្នុងការរៀបចំផែនការតែប៉ុណ្ណោះ។

៤. ធ្វើសកម្មភាពដែលមានចំណង់ចំណូលចិត្តខ្លាំង ៖ នៅពេលអ្នកបានបំពេញប្រភេទការងារ ឬសកម្មភាពដែលលោកអ្នកចូលចិត្ត វានឹងមិនធ្វើឱ្យអ្នកមានអារម្មណ៍ថាវាមានសម្ពាធនោះទេ ព្រោះការធ្វើដោយចំណាប់អារម្មណ៍វានឹងនាំឱ្យអារម្មណ៍មានសេរីភាពដោយមិនបារម្ភអំពីកាតព្វកិច្ចដែលចាំបាច់ត្រូវតែបំពេញនោះឡើយ។

៥. សកម្មភាពនាំឱ្យមានអត្ថន័យនៃជីវិត  ៖ បើអនុវត្តន៍តែមួយសប្តាហ៍ នោះវាមិនអាចនាំមកនូវភាពរីករាយបានទេ ដូច្នេះជាគន្លឹះ គឺ ស្វែងរកសកម្មភាពទាំង​ឡាយ​ណាដែលជំរុញឱ្យចិត្តមានអារម្មណ៍ថា ទទួលបានអត្ថន័យ ឬក៏វាឆ្លើយតបនឹងកិច្ចការដែលធ្វើប្រចាំថ្ងៃ។ ប្រសិនបើអ្នក កំពុងគិតអំពីអ្វីទៅជាសកម្មភាពរីករាយ គឺត្រូវដឹងអំពីខ្លួនឯងជាមុន តើចូលចិត្តភាពរីករាយម្នាក់ឯង ឬចាំបាច់មានការផ្សារភ្ជាប់ជាមួយអ្នកដទៃ ឬក៏យើងត្រូវការទាំងពីរផ្នែក។

៦. ទៅកន្លែងដែលមានធម្មជាតិ ៖ នៅក្នុងចំណោមសកម្មភាពជាច្រើន ការចំណាយពេលនៅខាងក្រៅគឺជាសកម្មភាពដ៏ពេញនិយមរបស់មនុស្ស ដែលមានភាពរីករាយ។ ការចំណាយពេលជាមួយធម្មជាតិ គឺជាចំណែកដ៏សំខាន់ក្នុងការជំរុញឱ្យមនុស្សមើលពិភពខាងក្រៅក្នុងភាពវិជ្ជមាន។  

៧. បង្កើនឱកាសផ្សងព្រេង ៖ មនុស្សដែលមានភាពរីករាយ មិនដែលទុកឱ្យពេលរបស់ពួកគេមានសភាពទទេស្អាតនោះទេ ពួកគេតែងតែបង្កើតវាឱ្យមានន័យ និងសកម្មភាពដែលអាចចាក់ទម្លុះបញ្ហាប្រឈម។ មនុស្សដែលមានភាពរីករាយ តែងមានសិល្បៈក្នុងការបំបែកសភាពឯកោតាមរយៈការធ្វើដំណើរផ្សងព្រេង ដូចជាឡើងភ្នំ ដើររុកទៅក្នុងព្រៃ បង្កើនជំនាញថ្មីៗ ឬក៏ទៅដើរលេងតាមរយៈដំណើរកម្សាន្តផ្សេងដោយខ្លួនឯងជាមួយមនុស្សមិនធ្លាប់ស្គាល់ពីមុន៕