ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នាពេលបច្ចុប្បន្ន ម្ចាស់អាជីវកម្ម និងក្រុមហ៊ុនតូច-ធំ ទាំងអស់ដឹងថា អតិថិជនរបស់ពួកគេស្ទើរតែទាំងស្រុង គឺស្ថិតនៅលើប្រព័ន្ធអ៊ីនធឺណិត ជាពិសេសនៅលើបណ្តាញសង្គម ដូចជា Facebook, Instagram និង TikTok ជាដើម។ ទាំងនេះ ជាមូលហេតុដែលធ្វើឱ្យមានការកើនឡើងនូវតម្រូវការអ្នកជំនាញក្នុងការគ្រប់គ្រង និងបង្កើតគេហទំព័រ, អ្នកជំនាញទីផ្សារឌីជីថល, អ្នកជំនាញផ្នែកកម្មវិធីទូរស័ព្ទ និងអ្នកបង្កើតមាតិកាជាដើម។ បន្ថែមពីនេះទៀត ការដែលមានជំនាញឌីជីថលមួយ ឬច្រើន អាចកំណត់ថា អ្នកខុសពីបេក្ខជនផ្សេងទៀតនៅក្នុងទីផ្សារការងារ ហើយជំនាញទាំងនេះនឹងធ្វើឱ្យអ្នកមានឱកាសទទួលបានការងារច្រើនជាងអ្នកដែលមិនមានជំនាញឌីជីថល។
យោងតាមការអង្កេតរបស់ទីភ្នាក់ងារជាតិមុខរបរ និងការងារ ពីជំនាញ និងការងាររបស់កម្មករ-និយោជិត បានបង្ហាញថា បុគ្គលិកប្រមាណជា ៨៣,៨% បានលើកឡើងថា ការងាររបស់ពួកគេទាមទារឱ្យពួកគេត្រូវមានជំនាញឌីជីថល ដើម្បីបំពេញការងារ ក្នុងនោះ ៥០,២% នៃការងារទាមទារជំនាញឌីជីថលកម្រិតមធ្យម ហើយ ៣៣,៥% ទាមទារជំនាញឌីជីថលកម្រិតខ្ពស់។ ទិន្នន័យនេះ បានបង្ហាញពីកំណើន នៃតម្រូវការជំនាញឌីជីថលក្នុងស្រុក ក្នុងការបំពេញការងារ ខណៈដែលមូលធនមនុស្សដែលមានជំនាញឌីជីថលនៅមានកម្រិត។
ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ បានលើកឡើងថា ប្រជាជនកម្ពុជាប្រហែល ៣០% មានជំនាញឌីជីថលកម្រិតមូលដ្ឋាន និងមានលទ្ធភាពប្រើប្រាស់ប្រព័ន្ធអ៊ីនធឺណេត និងបច្ចេកវិទ្យាឌីជីថល។ ផ្អែកលើទិន្នន័យនេះ ឯកឧត្តមមានប្រសាសន៍ថា យុវជនគួរចាប់ផ្តើមសិក្សាពីជំនាញឌីជីថលកម្រិតមូលដ្ឋាន ដូចជា ការចេះប្រើប្រាស់ប្រព័ន្ធអ៊ីនធឺណិត, ម៉ាស៊ីនស្វែងរក, សារអេឡិចត្រូនិក និងកម្មវិធីរដ្ឋបាលសំខាន់ៗមួយចំនួន ដែលជំនាញទាំងនេះសុទ្ធតែជាជំហានចាំបាច់សម្រាប់ការងារប្រចាំថ្ងៃ និងអាចជាមូលដ្ឋានគ្រឹះមួយដ៏ល្អ មុននឹងឈានទៅចាប់យកជំនាញឌីជីថលនៅកម្រិតមធ្យម និងខ្ពស់។
“បន្ថែមពីនេះ ពួកគេក៏អាចកំណត់ពីជំនាញឌីជីថលផ្សេងៗដែលចាំបាច់សម្រាប់ទីផ្សារការងារ ដែលត្រូវសិក្សាស្រាវជ្រាវបន្ថែម ដើម្បីឱ្យពួកគាត់អាចពង្រឹងសមត្ថភាពឆ្លើយតបទៅនឹងការប្រែប្រួលនៃតម្រូវការ និងភាពប្រកួតប្រជែងក្នុងទីផ្សារការងារនាពេលបច្ចុប្បន្ន…”
ជាមួយគ្នានេះ បើយោងតាមករណីសិក្សាជំនាញឌីថលនៅកម្ពុជា ដែលចុះផ្សាយដោយមជ្ឈមណ្ឌលកម្ពុជា ៤.០ គេបានរកឃើញជំនាញសំខាន់ៗចំនួន៥ ដែលយុវជនកម្ពុជាគួរចាប់យក រួមមាន ៖
– ការរចនាក្រាហ្វិក ៖ ការរចនាក្រាហ្វិកបាន និងកំពុងក្លាយជាជំនាញមួយដែលមានតម្រូវការខ្ពស់នៅក្នុងទីផ្សារការងារកម្ពុជា។ ជំនាញនេះ គឺជាសិល្បៈ ឬវិជ្ជាជីវៈ នៃការបង្ហាញ ដែលរួមបញ្ចូលរូបភាព, អក្សរ និងគំនិត ដើម្បីបញ្ជូនព័ត៌មានដល់ទស្សនិកជន។ ការរចនាក្រាហ្វិកនេះដែរ គឺជាជំនាញឌីជីថលដែលមានឥទ្ធិពលយ៉ាងខ្លាំងក្នុងការប្រកបអាជីវកម្ម ជាពិសេស ស្ថាប័នឯកជន។ គេសង្កេតឃើញថា តម្រូវការរបស់ក្រុមហ៊ុន និងអាជីវកម្មទាំងអស់មិនថាតូច ឬធំ គឺត្រូវការអ្នករចនាក្រាហ្វិកជាចាំបាច់ ព្រោះថា ការរចនាក្រាហ្វិកនេះអាចជួយដល់ការផ្សព្វផ្សាយពាណិជ្ជកម្ម ការធ្វើទីផ្សារ និងការបង្កើត artwork ប្រកបដោយប្រសិទ្ធភាព។
– ជំនាញបណ្តាញសង្គម ៖ យោងតាមទិន្នន័យរបស់ក្រុមហ៊ុនប្រឹក្សាឌីជីថល Kepios ក្នុងឆ្នាំ២០២៤ បានបង្ហាញថា ប្រជាជននៅលើសាកលលោកបានប្រើប្រាស់បណ្តាញសង្គម ៥ពាន់លាននាក់ ដែលស្មើនឹង ៦២,៣ភាគរយ នៃចំនួនប្រជាជនពិភពលោកសរុប, ក្នុងនោះកម្ពុជា មានចំនួនអ្នកប្រើប្រាស់បណ្តាញសង្គមប្រមាណ ១៣លាននាក់។ តួលេខទាំងនេះបានបង្ហាញពីការកើនឡើងនៃចំនួនអ្នកប្រើប្រាស់បណ្តាញសង្គមទូទាំងពិភពលោក ក៏ដូចប្រទេសកម្ពុជា ដែលមិនមានសញ្ញាថមថយឡើយ។ ដោយមើលឃើញពីការកើនឡើងនៃចំនួនអ្នកប្រើប្រាស់នេះ បានជំរុញឱ្យអាជីវកម្មជាច្រើនបានជ្រើសរើសបណ្តាញសង្គម ដើម្បីទំនាក់ទំនងជាមួយអតិថិជនរបស់ពួកគេ និងផ្សព្វផ្សាយផលិតផល និងសេវាកម្មផងដែរ។ ការណ៍នេះបង្ហាញថា សមត្ថភាពក្នុងការយល់ដឹង និងប្រើប្រាស់ប្រព័ន្ធផ្សព្វផ្សាយសង្គមប្រកបដោយប្រសិទ្ធភាព គឺជាជំនាញមួយដែលកំពុងមានតម្រូវការខ្ពស់ ដែលយើងស្គាល់ថា ជាជំនាញបណ្តាញសង្គម។ ជំនាញនេះសំដៅដល់ការប្រាស្រ័យទាក់ទងនៅលើបណ្តាញសង្គម ការបង្ហោះមាតិកា ការលក់ផលិតផល ការផ្តល់ជាសេវា និងសកម្មភាពផ្សេងទៀតជាច្រើន។
– ការធ្វើទីផ្សារបែបឌីជីថល ៖ បច្ចុប្បន្នការកើនឡើង នៃចំនួនអ្នកប្រើប្រាស់អ៊ីនធឺណេត និងប្រព័ន្ធផ្សព្វផ្សាយសង្គម បានផ្លាស់ប្តូរការធ្វើទំនាក់ទំនងរវាងអាជីវកម្មជាមួយនឹងអតិថិជន និងកែប្រែយុទ្ធសាស្រ្តក្នុងការធ្វើទីផ្សាររបស់អាជីវកម្ម។ អាជីវកម្មអាចទាញយកផលប្រយោជន៍ពីការធ្វើទីផ្សារបែបឌីជីថល តាមរយៈការផ្សព្វផ្សាយផលិតផល និងសេវាកម្មនៅលើបណ្តាញសង្គមដូចជា Facebook, Instagram, YouTube ដើម្បីបង្កើនការជ្រួតជ្រាបរបស់អតិថិជន ឈានទៅបង្កើនការលក់ផលិតផល និងសេវាកម្ម។ ការធ្វើទីផ្សារបែបឌីជីថល ក៏អនុញ្ញាតឱ្យអាជីវកម្មអាចផ្សារភ្ជាប់ជាមួយអតិថិជនដោយផ្ទាល់បានគ្រប់ពេលវេលា និងគ្រប់ទីកន្លែង រាល់ពេលពួកគេប្រើប្រាស់អ៊ីនធឺណេត និងប្រព័ន្ធផ្សព្វផ្សាយសង្គម។ ការណ៍នេះ បានបង្ហាញពីសារៈសំខាន់នៃការមានជំនាញក្នុងការធ្វើទីផ្សារបែបឌីជីថលសម្រាប់អាជីវកម្ម ដែលធ្វើឱ្យមានតម្រូវការខ្ពស់នូវជំនាញនេះនៅ ក្នុងទីផ្សារការងារ។
– ការវិភាគទិន្នន័យ ៖ ការវិភាគទិន្នន័យ គឺជាជំនាញមួយដ៏សំខាន់បំផុតសម្រាប់ស្ថាប័នរដ្ឋ និងឯកជន។ ទិន្នន័យអាចឱ្យយើងទទួលបាននូវព័ត៌មានដ៏សម្បូរបែប និងអាចឱ្យយើងរៀបចំយុទ្ធសាស្រ្តទីផ្សារប្រកបដោយប្រសិទ្ធភាព។ ជំនាញក្នុងការវិភាគទិន្នន័យ អាចជួយឱ្យអាជីវកម្មបង្កើនប្រសិទ្ធភាពប្រតិបត្តិការរបស់ពួកគេ។ ការចេះវិភាគ និងប្រើប្រាស់ទិន្នន័យក្នុងគំរូអាជីវកម្ម មានន័យថា ក្រុមហ៊ុនអាចកាត់បន្ថយការចំណាយ ដោយកំណត់យុទ្ធសាស្រ្តដ៏មានប្រសិទ្ធភាពជាងមុន។ ក្រុមហ៊ុនក៏អាចប្រើប្រាស់ការវិភាគទិន្នន័យ ដើម្បីធ្វើការសម្រេចចិត្តលើអាជីវកម្មឱ្យបានប្រសើរ និងបំពេញតម្រូវការរបស់អតិថិជនបានល្អជាងមុន។ ដូច្នេះ ការវិភាគទិន្នន័យ ក៏ជាជំនាញសំខាន់មួយផងដែរ ដែលយុវជនគួរគិតគូរសិក្សា ដើម្បីប្រើប្រាស់ជំនាញនេះជាប្រយោជន៍សម្រាប់បំពេញការងារផ្សេងៗ។
– សន្តិសុខសាយប័រ ៖ បច្ចុប្បន្ន បច្ចេកវិទ្យាឌីជីថលមានការវិវត្តឥតឈប់ឈរ ដែលធ្វើឱ្យសកម្មភាពប្រចាំថ្ងៃរបស់យើងដូចជា ការបំពេញការងារ, ការសិក្សា, ការទំនាក់ទំនង, ការកំសាន្ត សុទ្ធតែត្រូវពឹងផ្អែកលើអ៊ីនធឺណេត។ ទន្ទឹមនឹងការរីកចម្រើននៃបច្ចេកវិទ្យាឌីជីថល ការគំរាមកំហែងតាមប្រព័ន្ធអ៊ីនធឺណេតបានបន្តកើនឡើងជាលំដាប់ ដែលធ្វើឱ្យមានការខាតបង់ជាច្រើនផងដែរ ដោយយោងតាមគេហទំព័រ Cybersecurity ការខូចខាតពីឧក្រិដ្ឋកម្មតាមប្រព័ន្ធអ៊ីនធឺណេត ត្រូវបានគេរំពឹងថា នឹងកើនឡើងប្រមាណ ១៥% ក្នុងមួយឆ្នាំ។ ដូច្នេះ ការយល់ដឹងពីសន្តិសុខសាយព័រ ពិតជាមានសារៈសំខាន់សម្រាប់បុគ្គលគ្រប់រូប ដើម្បីបង្ការការខូចខាតដោយសារតែហានិភ័យតាមប្រព័ន្ធអ៊ីនធឺណេត៕
