ការសិក្សានៅបរទេសសម្រាប់និស្សិត ត្រូវបានដឹងថា ជាការសិក្សាដែលចំណាយអស់ថវិកាយ៉ាងច្រើន ទាំងថ្លៃសិក្សា ថ្លៃស្នាក់នៅ និងការចំណាយផ្សេងៗ។ តាមរយៈគេហទំព័រ Scholarship Safe បង្ហាញនូវអាហារូបករណ៍កំពូលទាំង១០សម្រាប់និស្សិតបរទេសឱ្យសិក្សានៅក្រៅប្រទេស ដើម្បីកាត់បន្ថយការចំណាយសិក្សារបស់និស្សិត។

តើអាហារូបករណ៍ទាំង១០ មានអ្វីខ្លះ?

ទី១ អាហារូបករណ៍ Fulbright ឬ Fulbright Foreign Student Program ៖ ជាកម្មវិធីអាហារូបករណ៍មួយដែលផ្ដល់ឱ្យដល់និស្សិតអន្តរជាតិមកពីគ្រប់សញ្ជាតិសាសន៍ ដែលមកពី១៦០ប្រទេសក្នុងពិភពលោក។ អាហារូបករណ៍ផ្ដល់នូវការគាំទ្រដល់បេក្ខជនជ័យលាភីអាហារូបករណ៍ សម្រាប់ថ្លៃសិក្សា ថ្លៃធ្វើដំណើរ និងកន្លែងស្នាក់នៅ ក្នុងកំឡុងពេលសិក្សា។ ព័ត៌មានលម្អិតអំពីអាហារូបករណ៍អាចចូលទៅកាន់ https://foreign.fulbrightonline.org/about/foreign-student-program ។

ទី២ អាហារូបករណ៍ Chevening ឬ Chevening Scholarship ៖ មិនខុសគ្នាពីអាហារូបករណ៍ Fulbright ប៉ុន្មាន អាហារូបករណ៍ Chevening ក៏ផ្ដល់ជូនអាហារូបករណ៍សិក្សាពេញលេញលើថ្លៃសិក្សា កន្លែងស្នាក់នៅ ការចំណាយលើការស្នាក់នៅ និងថ្លៃធ្វើដំណើរក្នុងកំឡុងពេលសិក្សាផងដែរ។ Chevening ផ្ដល់ឱកាសសិក្សានៅចក្រភពអង់គ្លេសនាសាកលវិទ្យាល័យណាមួយដែលនិស្សិតបានស្នើ និងជ្រើសរើសសិក្សា។ ព័ត៌មានលម្អិតអំពីអាហារូបករណ៍អាចចូលទៅកាន់ https://www.chevening.org/scholarships/ ។

ទី៣ អាហារូបករណ៍ Rhodes ឬ Rhodes Scholarship ៖ ជាអាហារូបករណ៍ដែលមានវ័យចំណាយជាងគេ និងជាអាហារូបករណ៍ដែលមានកិត្យានុភាពសម្រាប់និស្សិតឆ្នើមមកពីជុំវិញពិភពលោក ដែលផ្ដោតលើគុណសម្បតិ្តសិក្សា សក្ដានុពលភាពជាអ្នកដឹកនាំ និងការប្ដេជ្ញាចិត្តក្នុងការជួយពិភពលោកឱ្យមានផលវិជ្ជមាន។ អាហារូបករណ៍គ្របដណ្ដប់ថ្លៃសិក្សា ថ្លៃរស់នៅ និងថ្លៃធ្វើដំណើរ សម្រាប់និស្សិតទៅសិក្សានៅសាកលវិទ្យាល័យ Oxford។ ព័ត៌មានលម្អិតអំពីអាហារូបករណ៍អាចចូលទៅកាន់ https://www.rhodeshouse.ox.ac.uk/scholarships/the-rhodes-scholarship/ ។

ទី៤ កម្មវិធីអាហារូបករណ៍ Erasmus+ ឬ Erasmus+ Program ៖ ជាគំនិតផ្ដួចផ្ដើមរបស់សហភាពអ៉ឺរ៉ុប ដែលផ្ដល់មូលនិធិសម្រាប់និស្សិតអន្តរជាតិសិក្សានៅសហភាពអ៉ឺរ៉ុប ដោយគាំទ្រ និងគ្របបណ្ដប់លើថ្លៃសិក្សា ថ្លៃរស់នៅ និងថ្លៃធ្វើដំណើរ។ កម្មវិធីអាហារូបករណ៍ផ្ដល់ជូនការសិក្សាលើថ្នាក់បរិញ្ញាបត្រ បរិញ្ញាបត្រជាន់ខ្ពស់ នៅសាកលវិទ្យាល័យនានាជាង៣០ប្រទេស។ ព័ត៌មានលម្អិតអំពីអាហារូបករណ៍អាចចូលទៅកាន់ https://erasmus-plus.ec.europa.eu/ ។

ទី៥ អាហារូបករណ៍ធនាគារពិភពលោក ឬ World Bank Scholarships Program ៖ ជាកម្មវិធីអាហារូបករណ៍ដែលផ្ដល់សម្រាប់ប្រជាជននៅក្នុងប្រទេសដែលកំពុងអភិវឌ្ឍ ឱ្យបានសិក្សានូវជំនាញដែលទាក់ទងនឹងការកំពុងអភិវឌ្ឍដើម្បីយកទៅបម្រើក្នុងប្រទេសកំណើតរបស់ខ្លួន។ អាហារូបករណ៍ ផ្ដល់ការគាំទ្រលើថ្លៃសិក្សា ថ្លៃចំណាយការរស់នៅ និងថ្លៃធ្វើដំណើរសម្រាប់និស្សិតក្នុងកំឡុងពេលសិក្សា។ ព័ត៌មានលម្អិតអំពីអាហារូបករណ៍អាចចូលទៅកាន់ https://www.worldbank.org/en/programs/scholarships ។

ទី៦ អាហារូបករណ៍ Commonwealth ឬ Commonwealth Scholarships ៖ ជាកម្មវិធីអាហារូបករណ៍ ដែលផ្ដល់ការសិក្សាថ្នាក់ឧត្ដមសិក្សានៅសាកលវិទ្យាល័យផ្សេងក្នុងចក្រភពអង់គ្លេស ហើយអាហារូបករណ៍ផ្ដល់ការគាំទ្រលើថ្លៃសិក្សា ថ្លៃចំណាយស្នាក់នៅ និងការធ្វើដំណើរ។ ព័ត៌មានលម្អិតអំពីអាហារូបករណ៍អាចចូលទៅកាន់ https://study-uk.britishcouncil.org/scholarships-funding/commonwealth-scholarships ។

ទី៧ អាហារូបករណ៍ Australian Awards ឬ Australian Awards Scholarships ៖ ជាអាហារូបករណ៍សម្រាប់និស្សិតមកពីប្រទេសកំពុងអភិវឌ្ឍមានឱកាសសិក្សានៅប្រទេស​អូស្ត្រាលី ដោយអាហារូបករណ៍គ្របដណ្ដប់លើថ្លៃសិក្សា ថ្លៃចំណាយស្នាក់នៅ និងថ្លៃធ្វើដំណើរ។ បេក្ខជនដែលសាកសមនឹងអាហារូបករណ៍នេះ ជាបេក្ខជនដែលមានគុណសម្បត្តិសិក្សា សក្តានុពលក្នុងភាពជាអ្នកដឹកនាំ និងការប្ដេជ្ញាចិត្តក្នុងការធ្វើឱ្យមានផលប៉ះពាល់ជាវិជ្ជមានសម្រាប់ប្រទេសកំណើត។ ព័ត៌មានលម្អិតអំពីអាហារូបករណ៍អាចចូលទៅកាន់ https://www.dfat.gov.au/people-to-people/australia-awards/australia-awards-scholarships ។

ទី៨ អាហារូបករណ៍ Swiss Government Excellence ឬ Swiss Government Excellence Scholarships ៖​ ជាអាហារូបករណ៍ដែលផ្ដល់ឱ្យការសិក្សាទៅកាន់និស្សិតអន្តរជាតិជាង១៨០ប្រទេសជុំវិញពិភពលោក សិក្សាក្នុងថ្នាក់បណ្ឌិត ឬក្រោយបណ្ឌិត ទៅសិក្សានៅក្នុងប្រទេសស្វីស។ ព័ត៌មានលម្អិតអំពីអាហារូបករណ៍អាចចូលទៅកាន់ https://www.sbfi.admin.ch/sbfi/en/home/education/scholarships-and-grants/swiss-government-excellence-scholarships.html ។

ទី៩ អាហារូបករណ៍ New Zealand Development ឬ New Zealand Development Scholarships ៖ ជាអាហារូបករណ៍សម្រាប់និស្សិតអន្តរជាតិមកពីប្រទេសកំពុងអភិវឌ្ឍន៍ ទៅសិក្សានៅប្រទេសនូវែលហ្សេឡង់ ដោយគាំទ្រ និងគ្រប់ដណ្ដប់លើថ្លៃសិក្សាពេញលេញ ថ្លៃស្នាក់នៅ និងថ្លៃធ្វើដំណើរ។ ព័ត៌មានលម្អិតអំពីអាហារូបករណ៍អាចចូលទៅកាន់  https://www.nzscholarships.govt.nz/ ។

និង ទី១០ អាហារូបករណ៍ Gate Cambridge ឬ Gates Cambridge Scholarship ៖ ជាអាហារូបករណ៍ពេញលេញសម្រាប់និស្សិត ឬបេក្ខភាពឆ្នើមមកពីគ្រប់តំបន់នៃពិភពលោក ដើម្បីសិក្សានៅសាកលវិទ្យាល័យ Cambridge។ អាហារូបករណ៍គាំទ្រ និងគ្រប់ដណ្ដប់លើការសិក្សាពេញលេញ ថ្លៃកន្លែងស្នាក់នៅ និងថ្លៃធ្វើដំណើរ។ ព័ត៌មានលម្អិតអំពីអាហារូបករណ៍អាចចូលទៅកាន់ https://www.gatescambridge.org/ ។

ជារួមការសិក្សានៅបរទេសដោយអាហារូបករណ៍ អាចជាបទពិសោធន៍ដ៏សំបូរបែប និងជាឱកាសដ៏ធំបំផុតសម្រាប់លូតលាស់ក្នុងការអប់រំ សម្រាប់យុវជនក្នុងវិស័យផ្សេងៗគ្នា ត្បិតការដាក់ពាក្យស្នើសុំអាហារូបករណ៍មានភាពស្មុគ្រស្មាញ និងមានបញ្ហាប្រឈម ប៉ុន្តែបេក្ខជនជ័យលាភីនឹងទទួលបានលទ្ធផលសមស្របនឹងមូលនិធិអាហារូបករណ៍ផ្ដល់ឱ្យសម្រាប់សិក្សា៕