ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
វត្តអារាម មិនត្រឹមតែជាទីកន្លែងគោរពសក្តារៈបូជាសម្រាប់សាសនិកជនប៉ុណ្ណោះទេ ប៉ុន្តែក៏ត្រូវបានចាត់ទុកជាកន្លែងថែរក្សានូវវប្បធម៌ ទំនៀមទម្លាប់ អក្សរសាស្រ្ត និងប្រពៃណីដ៏ផូរផង់របស់ខ្មែរផងដែរ។
ក្នុងឱកាសអញ្ជើញជួបសំណេះសំណាលជាមួយអាចារ្យ អាចារិនី នៅទូទាំងប្រទេសកាលពីចុងសប្តាហ៍កន្លងទៅនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា ដូនតារបស់យើងបានបន្សល់ទុកនូវប្រពៃណី ទំនៀមទម្លាប់ ជាមរតកដ៏សម្បូរបែប ។ ក្នុងនោះ បណ្តាទីអារាមរបស់យើងទាំងអស់ ដើរតួនាទីសំខាន់ក្នុងការថែរក្សានូវទំនៀមទម្លាប់ប្រពៃណីរបស់ជាតិសាសន៍យើង។
សម្តេចតេជោមានប្រសាសន៍បញ្ជាក់ថា កាលពីជំនាន់បារាំងត្រួតត្រាប្រទេសខ្មែរ ទំនៀមទម្លាប់ ក្បួនខ្នាត អក្សរសាស្រ្តរបស់យើងត្រូវបានរក្សា ដោយក្នុងនោះទីវត្តអារាមបានដើរតួនាទីយ៉ាងសំខាន់។
សម្តេចតេជោ ហ៊ុន សែន
“ឥឡូវយើងពិនិត្យមើលប្រទេសជាច្រើន ពេលដែលបារាំងចូលទៅ បារាំងយកភាសាបារាំងទៅដាក់ឱ្យតែម្តង។ …ប៉ុន្តែខ្មែរ បារាំងធ្វើអត់បានទេ ខ្មែរនៅរក្សាបាននូវអក្សរសាស្រ្ត និងភាសារបស់ខ្លួនយ៉ាងច្បាស់ ដែលនោះជាចំណុចខ្លាំងនៃរបបរាជានិយមអាស្រ័យរដ្ឋធម្មនុញ្ញនៅកម្ពុជា ហើយដែលមានព្រះពុទ្ធសាសនាជាបង្អែកដ៏រឹងមាំ នៃវប្បធម៌ជាតិ “
ពាក់ព័ន្ធទៅនឹងទីវត្តអារាមក្នុងការថែរក្សានូវវប្បធម៌ប្រពៃណីជាតិនេះដែរ សម្តេចតេជោក៏បានអំពាវនាវទៅដល់លោកអាចារ្យ អាចារិនី ទាំងអស់ត្រូវពិភាក្សាជាមួយព្រះសង្ឃក្នុងការអនុញ្ញាតឱ្យប្រជាពលរដ្ឋអាចលេងល្បែងប្រជាប្រិយ៍ខ្មែរនៅក្នុងទីវត្តអារាម ដូចជាល្បែងចោលឈូង លាក់កន្សែង ទាញព្រ័ត្រ រាំវង់ វាំក្បាច់ ជាដើម ខណៈពិធីបុណ្យចូលឆ្នាំខ្មែរខិតជិតមកដល់ ដើម្បីបង្កលក្ខណៈឱ្យប្រជាពលរដ្ឋ ក៏ដូចជាយុវជនស្គាល់នូវទំនៀមទម្លាប់ខ្មែរ។
សម្តេចតេជោ ហ៊ុន សែន
” រឿងទំនៀមទម្លាប់ វប្បធម៌នេះ សំខាន់ណាស់ ឥឡូវនេះ បើយើងមិនរក្សាក្បួនខ្នាតចាស់ទេ ស្មើនឹងការបំផ្លាញ ព្រោះអ្វីដែលបានកើតឡើងនៅពេលនេះ វាត្រូវរក្សាមរករាប់រយឆ្នាំតទៅទៀត…”
គួរបញ្ជាក់ដែរថា តាំងពីបុរាណកាលរៀងមក វត្តអារាម នៃព្រះពុទ្ធសាសនានៅកម្ពុជា បានរួមចំណែកយ៉ាងសំខាន់ក្នុងការថែរក្សា លើកតម្កើងអត្តសញ្ញាណជាតិខ្មែរ ជាវប្បធម៌ សីលធម៌ ប្រពៃណី ទំនៀមទម្លាប់ដ៏ល្អរបស់ជាតិ៕
