ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងកម្មវិធីផ្លាស់ប្តូរនិស្សិតចិន ខេត្តគួយចូវ លើកទី២ ឆ្នាំ២០២៥ រយៈពេល ១៤ថ្ងៃ ក្រោមប្រធានបទ «ផែនការនិស្សិតឆ្នើម ទៅសិក្សានៅបរទេសរាប់ពាន់នាក់» កាលពីថ្ងៃច័ន្ទ (៩ មិថុនា) ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា កម្មវិធីផ្លាស់ប្តូរនិស្សិតដើរតួនាទីយ៉ាងសំខាន់ក្នុងការបណ្តុះបណ្តាលធនធានមនុស្ស ពង្រឹងចំណងមិត្តភាព និងលើកកម្ពស់ការស្វែងយល់ពីវប្បធម៌គ្នាទៅវិញទៅមកឱ្យកាន់តែស៊ីជម្រៅ ដើម្បីកសាងអនាគតរួមគ្នាឆ្ពោះទៅរកការអភិវឌ្ឍប្រកបដោយសុខសន្តិភាព វិបុលភាព និងចីរភាព។
រដ្ឋមន្ត្រីក្រសួងអប់រំ បានអបអរសាទរ និងទទួលស្វាគមន៍យ៉ាងកក់ក្តៅដល់និស្សិតឆ្នើមទាំងអស់ ដែលបានមកដល់ប្រទេសកម្ពុជា ដោយបានគូសបញ្ជាក់អំពីសារៈសំខាន់នៃកម្មវិធីផ្លាស់ប្តូរនេះ ក្នុងការលើកកម្ពស់ចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ កម្ពុជា-ចិន និងលើកទឹកចិត្តដល់និស្សិតទាំងអស់ឱ្យទាញយកអត្ថប្រយោជន៍ពីឱកាសដ៏វិសេសវិសាលនេះ ដើម្បីសិក្សាស្វែងយល់ពីវប្បធម៌ ប្រពៃណី និងភាពសម្បូរបែប នៃប្រទេសកម្ពុជា ព្រមទាំងចែករំលែកបទពិសោធន៍ចំណេះដឹងរបស់ខ្លួនទៅវិញទៅមក។
ឯកឧត្តមបណ្ឌិតសភាចារ្យ ហង់ជួន ណារ៉ុន បញ្ជាក់ថា តាមរយៈកម្មវិធីនេះ សិស្សនិស្សិត និងទទួលបាននូវអត្ថប្រយោជន៍ជាច្រើនដូចជា៖
ទី១. បង្កើនការយល់ដឹងពីគ្នាទៅវិញទៅមក៖ ឱកាសសិក្សាស្វែងយល់ដោយផ្ទាល់អំពីប្រវត្តិសាស្ត្រ វប្បធម៌ ប្រពៃណី ការរស់នៅរបស់ប្រជាជន តម្លៃសន្តិភាព និងការរីកចម្រើនសេដ្ឋកិច្ចសង្គម, យល់ពីតម្លៃ នៃវប្បធម៌ចម្រុះជាតិសាសន៍ ដើម្បីសុខដុមនីយកម្មសង្គម ការទំនាក់ទំនង និងការពង្រឹងចំណងមិត្តភាព។
ទី២. ស្វែងយល់ពីតម្លៃភាសា និងពង្រឹងជំនាញ ៖ ឱកាសរៀននិយាយភាសាខ្មែរ ក៏ដូចជាអភិវឌ្ឍជំនាញជាក់ស្តែងផ្សេងៗទៀត តាមរយៈការសិក្សា និងការអនុវត្តនៅក្នុងបរិយាកាសកម្ពុជា។
ទី៣. ភាពជាម្ចាស់ការ ៖ ការដកបទពិសោធន៍នៃការរស់នៅក្នុងបរិបទថ្មី ដោយទីពឹងលើខ្លួនឯង ដែលនេះ គឺជាការសាកល្បងសមត្ថភាពក្នុងការសម្របខ្លួនទៅនឹងស្ថានភាពផ្សេងៗ ក៏ដូចជាហ្វឹកហាត់សមត្ថភាពក្នុងការដោះស្រាយបញ្ហាប្រឈមនានា។
ទី៤. ជំរុញកិច្ចសហប្រតិបត្តិការអប់រំ ៖ កម្មវិធីនេះក៏ជាស្ពានសម្រាប់ពង្រឹងកិច្ចសហប្រតិបត្តិការរវាងគ្រឹះស្ថានឧត្តមសិក្សាកម្ពុជា និងចិន តាមរយៈការផ្លាស់ប្តូរកម្មវិធីសិក្សា បទពិសោធន៍ និងការស្រាវជ្រាវរួមគ្នា។
គួរជំរាបជូនថា កម្មវិធីផ្លាស់ប្តូរការសិក្សារយៈពេល ១៤ថ្ងៃ របស់និស្សិត នៃសាកលវិទ្យាល័យខេត្តគួយចូវ លើកទី២ ឆ្នាំ២០២៥ មកកាន់ប្រទេសកម្ពុជា រៀបចំឡើងក្នុងគោលបំណងដើម្បីពង្រឹងទំនាក់ទំនង និងជំរុញការអប់រំរវាងប្រទេសកម្ពុជា និងសាធារណរដ្ឋប្រជាមានិតចិន ជាពិសេសស្វែងយល់អំពីទំនៀមទម្លាប់ ប្រពៃណី វប្បធម៌ អក្សរសាស្ត្រខ្មែរ និងតំបន់ទេសចរណ៍នានា ដែលជាកេរមរតកដ៏សម្បូរបែបដែលបុព្វបុរសខ្មែរបានបន្សល់ទុករាប់ពាន់ឆ្នាំមកហើយ។
កម្មវិធីនេះ ក៏នឹងក្លាយជាឱកាសដើម្បីឱ្យសាកលវិទ្យាល័យចិន និងសាកលវិទ្យាល័យកម្ពុជា បានផ្លាស់ប្តូរការអប់រំជាលក្ខណៈអន្តរជាតិ ជាពិសេសបានផ្តល់ឱ្យគណៈគ្រប់គ្រងស្ថាប័នអប់រំ អ្នកជំនាញអប់រំ បានពង្រឹងការទំនាក់ទំនង និងកិច្ចសហប្រតិបត្តិការទល់មុខគ្នា ហើយក៏នឹងក្លាយជាវេទិកាមិត្តភាព ដើម្បីលើកកម្ពស់វិស័យអប់រំ ទេសចរណ៍ និងវប្បធម៌ រវាងកម្ពុជា-ចិន ជាពិសេសអាចពិនិត្យលទ្ធភាពក្លាយជាដៃគូសហការគ្នា នាពេលអនាគតផងដែរ៕
