លទ្ធផល ឬក៏សមិទ្ធផល មានភាពពាក់ព័ន្ធជាមួយនឹងទម្លាប់ប្រចាំថ្ងៃ ឬក៏ការប្រត្តិបត្តិសកម្មភាពដដែលៗ ដើម្បីឆ្ពោះតម្រង់ទៅរកវិថីវិជ្ជមាន។ ហើយការមើលពីចម្ងាយអំពីអនាគតទៀតសោធ គេអាចឆ្លុះបញ្ចាំងតាមរយៈការសម្រេចចិត្ត និងការអនុវត្តសកម្មភាពប្រចាំថ្ងៃ ឬក៏ការជ្រើសវិធីសាស្រ្តនៃការអភិវឌ្ឍន៍ខ្លួន។ មួយវិញទៀត ការប្រើប្រាស់ផ្នត់គំនិតមើលទៅកាន់រូបភាព ​និងពិភពខាងក្រៅ បានជះឥទ្ធិពលទៅកាន់ការអភិវឌ្ឍរបៀបរស់នៅ ទៅរកភាពល្អប្រសើរ។ ខាងក្រោម គឺជា​ចំណុចតូចៗមួយចំនួន ដែលវាអាចជួយ​ដល់ការអភិវឌ្ឍការ​រស់​នៅ​របស់លោកអ្នក។

១.  ហែលទឹក ៖ ចំពោះអ្នកដែលត្រូវចំនាយពេលអង្គុយក្នុងការិយាល័យមានរយៈពេលយូរ ឬអ្នកឧស្សាហ៍ឈឺឆ្អឹងខ្នង ឬក៏រាងកាយមិនសូវស្រួល សុទ្ធសឹងតែ ជាកត្តារំខានដល់ការរស់នៅ ដូច្នេះការជ្រើសយកវិធីសាស្រ្តហែលទឹកឱ្យបានទៀងទាត់ អាចថាជាដំណោះស្រាយមួយ។

២. គ្រប់គ្រងកំហឹងពេលធ្វើដំណើរតាមផ្លូវ ៖ ការធ្វើដំណើរ នៅតាមផ្លូវ អាចនឹងមានកត្តាជាច្រើនបណ្តាលឱ្យអារម្មណ៍តឹងតែង ទោះបីជាអ្នក មានការគោរពច្បាប់ចរាចរណ៍ដោយខ្ជាប់ខ្ជួនយ៉ាងណាក៏ដោយ ប៉ុន្តែការប៉ះពាល់តាមរយៈ ការបំពានលើគំនូសផ្លូវ ការវ៉ាជែងគន្លង​ផ្លូវដោយ​មិនគោរពការប្រកាន់ឆ្វេងស្តាំ ឬក៏បើកមិនគោរពអាទិភាព បានប៉ះពាល់ស្មារតីជាខ្លាំង ទៅកាន់អ្នកអមដំណើរជាមួយ។ ដូច្នេះការដកដង្ហើមវែងៗ ការអនុគ្រោះ គឺជាការគ្រប់គ្រងកំហឹងពេលធ្វើដំណើរតាមផ្លូវបានមួយផ្នែក និងជាគំរូសម្រាប់មនុស្សដទៃ។

៣. ដាក់ដែនកំណត់ចំពោះសមាជិកគ្រួសារ ៖ មិនមែនរាល់សមាជិកគ្រួសារទាំងអស់សុទ្ធតែ មានសមត្ថភាព និងលទ្ធភាពផ្តល់ការគាំទ្រនោះទេ ក្នុងករណីនេះ ការដាក់ដែលកំណត់ ឬក៏ការរក្សាគម្លាតមួយរយៈដើម្បីផ្តោតលើខ្លួនឯង គឺជាវិធីនាំទៅរកការអភិវឌ្ឍក្នុងរយៈពេលវែង។

៤. សម្អាត ៖ ការចំណាយពេល ១០ ទៅ ១៥នាទី ក្នុងការសម្អាតកន្លែងស្នាក់នៅ មិនត្រឹមតែជួយបង្កើនរបៀបរៀបរយនោះទេ ប៉ុន្តែបានបង្កើននៅអារម្មណ៍ល្អៗ បង្កើនស្មារតីផ្តោត ជៀសអាការៈភ្លេចភ្លាំង ហើយអភិវឌ្ឍន៍ដល់ការរស់នៅប្រចាំថ្ងៃ។ កន្លែងរស់នៅ មានរបៀបរៀបរយ ផ្តល់ភាពងាយស្រួលក្នុងការស្វែងរករបស់របររៀបចំខ្លួន ឬការរៀបសម្ភារៈមុននឹងចេញទៅធ្វើការ ឬការរៀនសូត្រ៕