ឱកាសសិក្សាអាហារូបករណ៍ថ្នាក់វេជ្ជបណ្ឌិតនៅសាកលវិទ្យាល័យ International University of Health and Welfare (IUHW) រយៈពេល៦ឆ្នាំ នៅប្រទេសជប៉ុន សម្រាប់ឆ្នាំសិក្សា២០២៥។ បេក្ខជនជ័យលាភីអាហារូបករណ៍នឹងត្រូវសិក្សាពីឆ្នាំទី១ឡើងវិញ ដែលនឹងចាប់ផ្ដើមសិក្សានៅខែមេសា ឆ្នាំ២០២៥។

លក្ខខណ្ឌនៃការជ្រើសរើស ៖ ជានិស្សិតដែលកំពុងសិក្សាថ្នាក់ឆ្នាំមូលដ្ឋានផ្នែកវេជ្ជសាស្ត្រ ដែលមានពិន្ទុប្រឡងចូលថ្នាក់ជាតិជ្រើសរើសចូលរៀនថ្នាក់ឆ្នាំសិក្សាមូលដ្ឋានសម្រាប់កម្រិតបរិញ្ញាបត្រនៅតាមគ្រឹះស្ថានបណ្ដុះបណ្ដាលវិស័យសុខាភិបាលផ្នែកវេជ្ជសាស្ត្រនៅសាកលវិទ្យាល័យវិទ្យាសាស្ត្រសុខាភិបាលឆ្នាំសិក្សា២០២៣-២០២៤ក្នុងលំដាប់ពិន្ទុខ្ពស់ជាងគេចំនួន២០នាក់ ឬជានិស្សិតឆ្នាំទី២ ផ្នែកវេជ្ជសាស្ត្រសាកលវិទ្យាល័យវិទ្យាសាស្រ្តសុខាភិបាលឆ្នាំសិក្សា២០២៣-២០២៤ ដែលមានពិន្ទុថ្នាក់ឆ្នាំមូលដ្ឋានក្នុងលំដាប់លេខរៀងខ្ពស់ជាងគេ២០នាក់។ ជាមួយគ្នានេះ បេក្ខជនត្រូវមានចំណេះដឹងភាសាអង់គ្លេស ដែលមានពិន្ទុ IELTS យ៉ាងតិច 6.0 ឬតេស្តផ្សេងទៀតដែលសមមូល។

ក្នុងការជ្រើសរើសមាន២ដំណាក់កាល ទី១ បេក្ខជនត្រូវបានជ្រើសរើសដោយសាកលវិទ្យាល័យវិទ្យាសាស្ត្រសុខាភិបាល ទី២នឹងត្រូវបានជ្រើសដោយតំណាងសាកលវិទ្យាល័យ IUHW ដោយមានការប្រឡងក្នុងវិញ្ញាសាសរសេរលើមុខវិជ្ជា គណិតវិទ្យា និងវិទ្យាសាស្ត្រ ( និស្សិតអាចជ្រើសរើសមុខវិជ្ជាចំនួន២ក្នុងចំណោមមុខវិជ្ជាវិទ្យាសាស្ត្រចំនួន៣ដូចជា គីមីវិទ្យា ជីវវិទ្យា និងរូបវិទ្យា)។ ជំហានបន្ទាប់គឺការសម្ភាសន៍ផ្ទាល់មាត់ជាភាសាអង់គ្លេស ឬជាភាសាអង់គ្លេស និងភាសាជប៉ុន។

ឯកសារចាំបាច់ដែលបេក្ខជនត្រូវភ្ជាប់ជាភាសាអង់គ្លេស ឬជប៉ុនរួមមាន Application form១ច្បាប់ Health Questionaire ១ច្បាប់ វិញ្ញាបនបត្រ ឬសញ្ញាបត្រមធ្យមសិក្សាទុតិយភូមិ ១ច្បាប់ លិខិតឆ្លងដែនថតចម្លង ១ច្បាប់ (ប្រសិនបើមាន) លិខិតបញ្ជាក់ការសិក្សាជាភាសាអង់គ្លេស១ច្បាប់។ ព្រឹត្តិបត្រពិន្ទុឆ្នាំសិក្សាមូលដ្ឋានសម្រាប់បេក្ខជនបេក្ខជនបេក្ខនារីជានិស្សិតឆ្នាំទី២ ផ្នែកវេជ្ជសាស្ត្រ ចំនួន១ច្បាប់ និងលិខិតបញ្ជាក់កម្រិតភាសាអង់គ្លេស IELTS យ៉ាងតិច ៦.០ ឬលិខិតបញ្ជាក់កម្រិតភាសាអង់គ្លេសផ្សេងដែលសមមូលនឹង IELTS យ៉ាងតិច ៦.០ ចំនួន១ច្បាប់។

ដើម្បីធ្វើការដាក់ពាក្យ សម្រាប់បេក្ខជននិស្សិតថ្នាក់ឆ្នាំសិក្សាមូលដ្នានផ្នែកវេជ្ជសាស្ត្រ ត្រូវដាក់សំណុំឯកសារនៅដេប៉ាតឺម៉ង់ឆ្នាំសិក្សាមូលដ្ឋាន។ សម្រាប់និស្សិតឆ្នាំទី២ នៃមហាវិទ្យាល័យវេជ្ជសាស្ត្រ ត្រូវដាក់សំណុំឯកសារនៅផ្នែកកិច្ចការនិស្សិតនៃមហាវិទ្យាល័យវេជ្ជសាស្ត្រ ។

សម្រាប់ព័ត៌មានបន្ថែមអាចទំនាក់ទំនងទៅកាន់សាកលវិទ្យាល័យតាមរយៈ វេជ្ជបណ្ឌិត តាន់ សុខស្រីយ៉ា ០១២ ២៧៩ ៧៣២, លោកស្រី ហែន មល្លិកា ០១៦ ៩៥១ ៣១៥, លោក ឡូញ សុខឡាយ ០៧៧ ២៧៥ ២២២, និងកញ្ញា ម៉ែន បញ្ញា ០៧៧ ៤៨៤ ១៦១ ។ ចាប់ទទួលពាក្យពីថ្ងៃជូនដំណឹងរហូតដល់ថ្ងៃទី ២៧ ខែឧសភា ឆ្នាំ២០២៤ វេលាម៉ោង ១៧:០០នាទី៕