ប្រទេសអ៊ីតាលី កំពុងដាក់ឱ្យប្រើប្រាស់បញ្ញាសិប្បនិម្មិត (AI) នៅក្នុងសាលាជាច្រើនទូទាំងប្រទេស ខណៈរដ្ឋាភិបាល ដែលដឹកនាំដោយលោកនាយករដ្ឋមន្ត្រី Giorgia Meloni កំពុងរិះរកវិធីថ្មី ដើម្បីលុបបំបាត់គម្លាតជំនាញឌីជីថលនៅក្នុងប្រទេស។ នេះបើយោងតាមការចុះផ្សាយរបស់សារព័ត៌មាន CNA ។

រដ្ឋមន្ត្រីក្រសួងអប់រំ អ៊ីតាលី លោក Giuseppe Valditara បាននិយាយនៅសប្ដាហ៍នេះថា សូហ្វវែ AI សម្រាប់ជាជំនួយការគ្រូបង្រៀន នឹងត្រូវបានសាកល្បងនៅក្នុងថ្នាក់រៀនចំនួន ១៥ នៅទូទាំងតំបន់ចំនួន ៤ នាពេលឆាប់ៗ ក្នុងគោលបំណងពង្រីកគ្រោងការណ៍នៅពេលក្រោយ ប្រសិនបើការសាកល្បងទទួលបានជោគជ័យ។

កម្មវិធី AI នៅលើថេបប្លេត និងកុំព្យូទ័រក្នុងថ្នាក់រៀននឹងដើរតួជា ជំនួយការនិម្មិត ដែលអាចធ្វើឱ្យការរៀនកាន់តែងាយស្រួលសម្រាប់សិស្ស និងជួយគ្រូឱ្យស្គាល់វិធីសាស្ត្រសម្រាប់ការអប់រំឱ្យស្របតាមបរិបទសង្គម និងតម្រូវការរបស់សិស្ស។ នេះបើតាមសម្ដីរបស់រដ្ឋមន្ត្រីអប់រំអ៊ីតាលី ប្រាប់បណ្ដាញព័ត៌មាន TGcom24 ។

យោងតាមទីភ្នាក់ងារស្ថិតិរបស់ប្លុក Eurosat បានឱ្យដឹងថា ប្រទេសអ៊ីតាលីជាប្រទេសមានពិន្ទុជំនាញឌីជីថលមូលដ្ឋានទាបបំផុតមួយនៅក្នុងសហភាពអ៊ឺរ៉ុប ដែលមានសមាជិករហូតដល់ ២៧ប្រទេស។ បើយោងតាមទីភ្នាក់ងានេះ បានឱ្យដឹងថា ប្រទេសដែលមានពិន្ទុទាក់ទងនឹងជំនាញឌីជីថលមូលដ្ឋានល្អបំផុតគឺ ប្រទេសឡាតវី ប៉ូឡូញ ប៊ុលហ្គារី និងរូម៉ានី។

ទោះយ៉ាងណាក៏ដោយ ក្រសួងអប់រំអ៊ីតាលីមិនទាន់អាចបញ្ជាក់ឈ្មោះសាលា ដែលនឹងសាកល្បងប្រើប្រាស់បច្ចេកវិទ្យាថ្មីនេះបានទេ។ ត្បិតថា មានការប្រើប្រាស់ បញ្ញាសិប្បនិម្មិត (AI) សម្រាប់ជំនួយដល់ការបង្រៀន ប៉ុន្តែរដ្ឋមន្ត្រីនៅតែហាមឃាត់ការប្រើប្រាស់ទូរស័ព្ទចល័តនៅក្នុងថ្នាក់រៀន បើទោះជាប្រើសម្រាប់តែគោលបំណងសិក្សាក៏ដោយ។

បច្ចុប្បន្ន ការព្យាយាមធ្វើបរិវត្តន៍កម្មឌីជីថលក្នុងសាលារៀនអ៊ីតាលីមានការលំបាក ដោយសារតែកត្តាអាយុបុគ្គលិកអប់រំនៃប្រទេសនេះមានវ័យចំណាស់ច្រើន ដោយជាងពាក់កណ្ដាលនៃពួកគេមានអាយុចាប់ពី ៥០ឆ្នាំឡើងទៅ។ នេះបើយោងតាមទិន្នន័យរបស់ OECD៕