បម្រែបម្រួលអាកាសធាតុ បានធ្វើ​ឱ្យ​ប៉ះពាល់មកកាន់យើងទាំងអស់គ្នា គ្រោះមហន្តរាយដែលបង្កដោយគ្រោះថ្នាក់នៃបរិយាកាសនេះបានកើតមានពីមួយពេល ទៅមួយពេល។ ការបំពុលបរិស្ថាន ធ្វើឱ្យមនុស្សមួយចំនួនប្រទះនឹងអារម្មណ៍អៀនខ្មាសចំពោះសកម្មភាពដែលបានប្រព្រឹត្ត ឬនាំឱ្យមានផលអវិជ្ជមានចំពោះការរស់នៅ និងកើតអាការៈថប់បារម្ភ តានតឹង និងតប់ប្រមល់ដោយសារតែបរិយាកាសផ្លាស់ប្តូរមិនទៀង។ ធម្មជាតិជាគូរនឹងមនុស្ស ហើយការដាក់ខ្លួនឱ្យផ្សារភ្ជាប់ទៅនឹងបរិស្ថាន ជាចំណែកមួយជួយកាត់បន្ថយស្រ្តេស និងជំរុញឱ្យសុខភាពផ្លូវចិត្តល្អប្រសើរជាងមុន។

មូលហេតុអ្វីបានជាគិតអំពីបរិស្ថានជាកត្តាចាំបាច់ ?

បម្រែបម្រួលអាកាសធាតុ បង្កឱ្យបរិយាកាសឈានទៅរកគ្រោះថ្នាក់ និងបង្កផលប៉ះពាល់ដល់សុខភាពមនុស្សទាំងចិត្តនិងកាយ ។ បើជជែកជាសកលតែម្តង ពិភពលោកកំពុងតែជួបប្រទះនូវបញ្ហាជាច្រើនដែលបង្កដោយបម្រែបម្រួលអាកាសធាតុមានដូចជា ការកើនឡើងកម្តៅផែនដី ភាពរាំងស្ងួត និងគ្រោះមហន្តរាយនានាចំពោះធម្មជាតិ ឬសត្វក្នុងសភាពមួយដែលធ្ងន់ខ្លាំងនៅក្នុងតំបន់មួយចំនួន ហើយគ្រោះថ្នាក់ទាំងនេះ គឺពាក់ព័ន្ធនឹងការរស់នៅប្រចាំថ្ងៃរបស់មនុស្សដែលប្រើប្រាស់ធម្មជាតិច្រើនលើសចំណុះ រហូតដល់ធម្មជាតិមិនអាចផលិតតម្រូវការឱ្យឆ្លើយតបនឹងការប្រើប្រាស់របស់មនុស្ស។

បម្រែបម្រួលអាកាសធាតុមិនមែនជាបញ្ហាបុគ្គលណាម្នាក់នោះទេ ពីព្រោះវាពាក់ព័ន្ធ និងប៉ះពាល់ដល់ការរស់នៅរបស់មនុស្សទាំងអស់គ្នា ជាហេតុដែលយើងត្រូវយកចិត្តទុកដាក់រួមគ្នា ក៏ដូចជាមានសកម្មភាពការពារបរិស្ថានពីគ្រប់ភាគីសំខាន់ៗដែលពាក់ព័ន្ធ។ នៅពេលដែលយើងបានរួមចំណែកក្នុងការជួយទៅកាន់បរិស្ថាន វាក៏ជាចំណែកមួយដែលជួយឱ្យសុខភាពផ្លូវចិត្ត និងកាយមានភាពល្អប្រសើរជាងមុន។ តាមរយៈគេហទំព័រ verywellmind បានប្រាប់គន្លឹះមួយចំនួន ដើម្បីយកទៅអនុវត្ត បង្ហាញពីការយកចិត្តទុកចំពោះបរិស្ថាន។

១. ចូលរួមជាសកម្មភាពក្នុងសហគមន៍ ៖ សកម្មភាពក្នុងសហគមន៍មានច្រើនប្រភេទ ក្រៅតែពីការចូលរួមសម្អាតទីតាំង គេអាចចូលរួមថែទាំសួនច្បារដែលជិតផ្ទះ ឬដាំបន្លែបង្ការជាការជំរុញទីតាំងឱ្យមានបរិយាកាសផាសុកភាព និងមានអាហារបរិភោគល្អៗអាចឆ្លើយតបនឹងសុខភាពរាងកាយ។ ការចូលរួមសកម្មភាពទាំងនេះ គឺជាកត្តានាំឱ្យកាត់បន្ថយភាពតាងតឹង បង្កើនទំនាក់ទំនងថ្មីៗ ដែលជារួមទៅជំរុញទាំងសុខភាពផ្លូវចិត្ត និងសុខភាពផ្លូវកាយ។

២. ប្រើប្រាស់កង់ជាមធ្យោបាយធ្វើដំណើរ ​៖ ការប្រើប្រាស់កង់ជាមធ្យោបាយធ្វើដំណើរ បានកាត់បន្ថយប្រេង និងផ្សែងពុល ដែលជាចំណែកមួយជួយទៅដល់បរិស្ថាន។ ការប្រើប្រាស់កង់ឱ្យបានច្រើនតាមដែលអាចធ្វើទៅបាន ជាពិសេសនៅពេលមានការធ្វើដំណើរជិតៗ ព្រោះសកម្មភាពនេះបានចូលរួមកាត់បន្ថយការបំពុលបរិយាកាស។

៣. ទិញរបស់របរចាស់ៗ ៖ ការប្រើរបស់របរចាស់ៗ ឬការប្រើប្រាស់សម្លៀកបំពាក់មួយទឹកគឺជាចំណែកមួយក្នុងការកាត់បន្ថយជាតិពុលទៅក្នុងបរិយាកាស ដោយហេតុថា ឧស្សាហកម្មជំនាញច្នៃម៉ូតនីមួយៗ គឺជាដើមចមក្នុងការបំពុលបរិស្ថាន។ ដូច្នេះការទិញសម្លៀកបំពាក់ដែលប្រើម្តងរួចហើយ(ខោអាវមួយទឹក) អាចជួយដល់បរិស្ថាន និងកាត់បន្ថយការបម្រែបម្រួលអាកាសធាតុ។

៤. បង្កើតទម្លាប់នៃការប្រើប្រាស់ឡើងវិញ ៖ មានរបស់របរជាច្រើនដែលមនុស្សបានបោះចោល ខណៈវានៅអាចប្រើប្រាស់បានម្តងទៀត ហើយមានពេលខ្លះយើងបានចម្អិនអាហារក្នុងបរិមាណដែលច្រើនជ្រុល និងទទួលទានមិនអស់សឹងតែគ្រប់ពេល, ទាំងនេះក៏ជាចំណែកមួយបង្កផលប៉ះពាល់ទៅកាន់បរិស្ថាន។ ដូច្នេះត្រូវកាត់បន្ថយទម្លាប់ខ្ជះខ្ជាយអាហារ ឬទិញសម្ភារៈពាក់ព័ន្ធនឹងប្លាស្ទិកបន្ថែមដែលមិនចាំបាច់មកទុកក្នុងទីសម្រាប់ស្នាក់អាស្រ័យ។ ព្យាយាមប្រើរបស់របរចាស់ៗឡើងវិញ និងសន្សំសំចៃអាហារ ដើម្បីជាការរួមចំណែកធ្វើឱ្យបរិស្ថានល្អ៕