វិទ្យាស្ថានជាតិសុខភាពផ្លូវចិត្ត សហរដ្ឋអាម៉េរិក បានបង្ហាញថា ជំងឺផ្លូវចិត្ត ចំនួន ៣ រួមមាន ជំងឺបាក់ទឹកចិត្ត ជំងឺថប់បារម្ភ និងវិបល្លាសនៃការបរិភោគអាហារ (ភាពមិនប្រក្រតីនៃការញ៉ាំ) ងាយកើតឡើងលើស្ដ្រីច្រើនជាងបុរស។

មានរោគសញ្ញាមួយចំនួន កើតឡើងចំពោះតែស្ត្រីប៉ុណ្ណោះ មិនកើតឡើងចំពោះបុរសឡើយ។ ជាក់ស្ដែង ស្ត្រីមួយចំនួន មានរោគសញ្ញាធ្លាក់ទឹកចិត្ត នៅពេលមានការផ្លាស់ប្ដូរអរម៉ូន អំឡុងពេល ឬក្រោយពេលមានផ្ទៃពោះ អំឡុងពេលមករដូវ និងអំឡុងពេលអស់រដូវ។

អ្នកស្រី ហាន វុទ្ធី អ្នកជំនាញចិត្តវិទ្យាគ្លីនិក និងប្រឹក្សាយោបល់ផ្លូវចិត្ត បានមានប្រសាសន៍ប្រាប់ AMS Education ថា មូលហេតុ ដែលនាំឱ្យស្ត្រីងាយប្រឈមនឹងបញ្ហាផ្លូវចិត្តទាំងនេះ ព្រោះកត្តាមួយចំនួន ដូចជា ៖

• វិបត្តិដែលស្ត្រីជួបប្រទះកន្លងមក ឬកំពុងមានបច្ចុប្បន្ន រួមមាន វិបត្តិផ្ទាល់ខ្លួន វិបត្តិគ្រួសារ វិបត្តិការងារ និងវិបត្តិសង្គម។
• ការផ្លាស់ប្ដូរអរម៉ូន ដែលកើតឡើង អំឡុងពេលមករដូវ ការមានផ្ទៃពោះនិងការអស់រដូវ អាចប៉ះពាល់ដល់អារម្មណ៍ និងបង្កើនហានិភ័យនៃជំងឺធា្លក់ទឹកចិត្ត និងការថប់បារម្ភ។
• ដំណើរការបន្តពូជ ដោយការមានផ្ទះពោះ ការសម្រាលកូន និងរយៈពេលក្រោយសម្រាលកូនអាចជាបញ្ហាប្រឈមខ្លាំងសម្រាប់ស្ត្រី និងបង្កើនហានិភ័យនៃជំងឺធ្លាក់ទឹកចិត្ត និងការថប់បារម្ភ។
• មានបន្ទុកក្នុងការមើលថែទាំជាប្រចាំ ព្រោះស្ត្រីជាអ្នកមើលថែចម្បងសម្រាប់កុមារ និងឪពុកម្ដាយវ័យចំណាស់ ដែលអាចនាំឱ្យស្ត្រីមានភាពតានតឹងជាប្រចាំ ព្រោះតែការនឿយហត់ គ្មានអ្នកលើកទឹកចិត្ត ឬការយល់ចិត្តពីប្ដី និងសមាជិកគ្រួសារ ហើយជួនកាលអាចទទួលរងការស្ដីបន្ទោសពីប្តីថែមទៀត។
• កត្តាសង្គម និងវប្បធម៌, ស្ត្រីអាចជួបប្រទះនឹងការរើសអើងអំពើហិង្សា និងវិសមភាព (ភាពមិនទៀងទាត់ ភាពមិនស្មើគ្នា និងលំអៀងនៅក្នុងសង្គម សេដ្ឋកិច្ច និងកត្តាជាច្រើនទៀត) ទាំងអស់នេះ សុទ្ធតែនាំឱ្យស្ត្រីងាយមានបញ្ហាផ្លូវចិត្ត និងឈានដល់ជំងឺផ្លូវចិត្តធ្ងន់ធ្ងរ។

ចំពោះ រោគសញ្ញាទូទៅនៃជំងឺផ្លូវចិត្តស្ត្រី អ្នកចិត្តសាស្ត្របានបញ្ជាក់ថា មានអាការជាច្រើន គួរឱ្យកត់សម្គាល់ នៅពេលស្ត្រីមានបញ្ហាផ្លូវចិត្ត ដែលរោគសញ្ញាទាំងនោះ រួមមាន ទុក្ខព្រួយជាប់លាប់ ឬមានអារម្មណ៍អស់សង្ឃឹម, អារម្មណ៍ផ្លាស់ប្ដូរញឹកញាប់, ពិបាកគេង ឬគេងច្រើន, ផ្លាស់ប្ដូរចំណង់អាហារ ដែលនាំឱ្យទម្ងន់ប្រែប្រួល, ភ័យខ្លាច ឬមានការព្រួយបារម្ភខ្លាំងពេក, ឃើញ ឬឮអ្វីដែលមិនមានរូបរាង, ឈឺចាប់មិនជាក់លាក់, ឈឺក្បាល ឈឺពោះ ឈឺក្រពះ មានកំហឹង ឬឆាប់ខឹង, ផ្ដាច់ខ្លួនពីសង្គម, មានគំនិត ឬអាក្បកិរិយារំខានដល់ខ្លួនឯង ការងារ គ្រួសារ និងសង្គម, ប្រើប្រាស់គ្រឿងញៀន និងគ្រឿងស្រវឹង, មានគំនិតចង់ស្លាប់ មានអារម្មណ៍ថារស់គ្មានន័យ ឬចង់ធ្វើអត្តឃាត។

សម្រាប់ស្ត្រីទូទៅ ឬស្ដ្រីកំពុងមានបញ្ហាផ្លូវចិត្ត ដើម្បីថែទាំផ្លូវចិត្តឱ្យបានល្អ អ្នកចិត្តសាស្ត្រ បានណែនាំ គោលការណ៍សំខាន់ៗ ចំនួន ៤ ដើម្បីអនុវត្ត រួមមាន ៖ ទី១ គេងឱ្យបានគ្រប់គ្រាន់ ព្រោះការគេង គឺជាការអនុញ្ញាតឱ្យរាងកាយ និងខួរក្បាលបានសម្រាក ខណៈការសម្រាកមិនគ្រប់គ្រាន់ អាចមានហានិភ័យខ្ពស់ នាំឱ្យមានអារម្មណ៍សោកសៅ។

ទី២ ថែទាំខ្លួន​ឯងឱ្យបានល្អ តាមរយៈការហាត់ប្រាណ, ធ្វើសម្មាធិ, ញ៉ាំអាហារ ដែលល្អសម្រាប់សុខភាព, មានទំនាក់ទំនងល្អក្នុងសង្គម និងបង្កើតដែនកំណត់ផ្ទាល់ខ្លួន ដើម្បីសម្រាកឱ្យបានគ្រប់គ្រាន់។ ទី៣ ទទួលយកការលើកទឹកចិត្តពីអ្នកដទៃ សរសេរកំណត់ហេតុ ឬនិយាយទៅកាន់មនុស្សទុកចិត្ត និងលេងជាមួយសត្វចិញ្ចឹម និងទី៤ សម្ដែងការដឹងគុណ និងកោតសរសើរ ចំពោះជីវិតខ្លួនឯង ដើម្បីជំរុញអារម្មណ៍វិជ្ជមាន។

អ្នកជំនាញចិត្តសាស្ត្ររូបនេះ បានគូសបញ្ជាក់ថា ជំងឺផ្លូវចិត្តអាចព្យាបាលជាដោយខ្លួនឯងជោគជ័យ ប្រសិនបើស្ត្រីអាចអនុវត្តតាមគោលការណ៍ណែនាំទាំង ៤នេះបាន។ យ៉ាងណាក៏ដោយ អ្នកស្រី ហាន វុទ្ធី សង្កត់ធ្ងន់ថា ក្នុងករណីដែលអ្នកជំងឺអនុវត្តហើយ ដឹងថា ស្ថានភាពមិនធូរស្រាល ឬប្រសើរឡើង អ្នកជំងឺត្រូវស្វែងរកសេវាថែទាំផ្លូវចិត្ត ពីអ្នកជំនាញឱ្យបានត្រឹមត្រូវ៕