ជាធម្មតាការប្រើប្រាស់ប្រព័ន្ធផ្សព្វផ្សាយ គឺទទួលបានទាំងផលវិជ្ជមាននិងអវិជ្ជមាន ហើយដើម្បីឱ្យអ្នកប្រើប្រាស់អាចទាញប្រយោជន៍ពីវាបាន គឺចាំបាច់ពឹងពាក់ទៅលើសមត្ថភាពរបស់ពួកគាត់ដែរ។ មានមតិមួយចំនួនបានលើកឡើងថា បណ្តាញសង្គម TikTok មួយនេះបានពង្វក់យុវជនឱ្យប្រព្រឹត្តសកម្មភាពមិនល្អជាច្រើន ជាពិសេសការប្រើប្រាស់ពាក្យពេចន៍មិនសមរម្យ និងការបង្ហោះរូបភាពមិនល្អជាដើម ក្នុងនោះអ្នកបង្កើតនិងផលិតមាតិកាមួយចំនួនបានយល់ឃើញថា បណ្តាញសង្គម TikTok ជាកម្មវិធី ដែលផ្តល់ភាពងាយស្រួល ​និងភាពច្នៃប្រតិដ្ឋបានច្រើន ឱ្យតែយើងចេះកំណត់នឹងប្រើប្រាស់វា។ ដោយឡែក កញ្ញា សារិទ្ធ សារ៉ានិមល បានជ្រើសយកបណ្តាញសង្គម TikTok ធ្វើការផ្សព្វផ្សាយអំពីប្រធានបទទាក់ទងនឹងសៀវភៅ ដោយដាក់នូវក្ដីសង្ឃឹមថា វានឹងក្លាយជាបំណែកមួយនៃការផ្លាស់ប្តូរទិសដៅអ្នកប្រើប្រាស់ទៅរកភាពវិជ្ជមានក្នុងបណ្តាញសង្គមមួយនេះ ។

កញ្ញា សារ៉ានិមល លើកឡើងថា បច្ចុប្បន្ន​យុវវ័យ ក៏​ដូចជា​ក្មេងៗភាគច្រើន ពួកគេនិយមលេងបណ្តាញសង្គម TikTok ប៉ុន្តែភាគច្រើនពួកគេ​ប្រើប្រាស់ក្រោមប្រធានបទរាំ ច្រៀង និង​ថតពីសកម្មភាពប្រចាំថ្ងៃ, ហេតុនេះហើយ ទើបជារូបនាង​មានគំនិតមួយថា ត្រូវ​តែបង្កើត​មាតិកាល្អៗឱ្យ​បានច្រើន​សម្រាប់​យុវជនយើង។

ក្នុងនោះ សារ៉ានិមល សង្កេតឃើញភាពខ្វះខាតនៃការជំរុញអំណាននៅក្នុងបណ្តាញសង្គម ទើបនាងសម្រេចចិត្តបង្កើតមាតិកាពាក់ព័ន្ធទៅនឹងការអានសៀវភៅ ដោយមានការជំរុញលើកទឹកចិត្ត និងរក្សាកម្លាំងចិត្តពីអ្នកម្តាយ និងបងស្រីជីដូនមួយរបស់នាង។ និមល បន្ថែមថា ម្តាយរបស់នាងជាមនុស្សម្នាក់ ដែលធ្វើឱ្យនាងមានទម្លាប់ និងកម្លាំងចិត្តក្នុងការអាន ចំណែកឯបងស្រជីដូនមួយនាងវិញ គាត់បានផ្តល់គំរូទៅកាន់នាង ដោយសារគាត់ក៏ជាអ្នកបង្កើតវិដេអូចែករំលែកសៀវភៅក្នុងបណ្តាញសង្គមដែរ ហើយក៏បានជំរុញឱ្យ សារ៉ានិមល ធ្វើមាតិការផ្សាយជាបន្តបន្ទាប់។

អ្នកដែលជំរុញឱ្យនាងខ្ញុំបន្តសកម្មភាពនេះ មានម៉ាក់ជាអ្នកផ្ដល់កម្លាំងចិត្តជាធំ ហើយខ្ញុំជាមនុស្សចូលចិត្តអានសៀវភៅក៏ព្រោះតែម៉ាក់ និងបងស្រីជីដូនមួយគាត់ជាអ្នកដែលចង់បង្កើតមាតិកាក្នុងការជំរុញឱ្យមានការអាននេះដល់ខ្ញុំផងដែរ…

កញ្ញា សារិទ្ធ សារ៉ានិមល

ក្នុងនោះសកម្មភាពដែល សារ៉ានិមល បានបង្ហោះចែកចាយ នៅក្នុងបណ្តាញសង្គម TikTok តាមរយៈគណនីផ្ទាល់ខ្លួនរបស់នាង គឺមានដូចជា ការចូលរួមកម្មវិធីពិព័រណ៍សៀវភៅ និងសមិទ្ធផលពីការចូលរួមកម្មវិធី, ការប្រើប្រាស់ថវិកាវិនិយោគលើការអាន, ការអធិប្បាយចំណាប់អារម្មណ៍ក្រោយការអាន, អត្ថប្រយោជន៍ពីការចំណាយពេលអាន, ការសង្ខេបសៀវភៅខ្លីៗ​, ប្រវត្តិនៃសៀវភៅនីមួយៗដែលនាងធ្លាប់អាន ដែលសៀវភៅបានអានភាគច្រើនទាក់ទងនិងប្រលោមលោក និងការអភិវឌ្ឍសមត្ថភាពជាដើម។

ត្បិតថា មានការលើកទឹកចិត្តនិងការជំរុញចិត្តពីសមាជិកគ្រួសារ ប៉ុន្តែ សារ៉ានិមល នៅតែប្រឈមនឹងបញ្ហាមួយចំនួន ដែលធ្វើឱ្យនាងស្ទើរតែបោះបង់កិច្ចការបែបនេះចោល។ អ្វីដែលនាងជួបប្រទះមានដូចជា មិនបានចេញវីដេអូទៀងទាត់ព្រោះរវល់នឹងការសិក្សា ហើយពេលខ្លះទៀតក៏មានក្ដីបារម្ភអំពីការរំលោភបំពានសិទ្ធអ្នកនិពន្ធដោយប្រការអចេតនាណាមួយ ហើយពេលខ្លះទៀតអត់មានអ្នកមើលវីដេអូ ទាំងដែលប្រឹងប្រែងចំណាយពេលវេលាទាំងកម្លាំងកាយចិត្តក្នុងការធ្វើ។ ជាដំណោះស្រាយឆ្លើយតបទៅនឹងបញ្ហានេះ គឺការរៀបចំពេលវេលា និងការតាំងចិត្ត។

ម្តងម្កាល ខ្ញុំធ្លាប់ចង់បោះបង់សកម្មភាពជំរុញការអានតាមកម្មវិធី TikTok ដែរ ព្រោះថា ចំណាយលុយខ្លួនឯងទៅទិញសៀវភៅមកអាន ហើយចំណាយពេលវេលានិងកម្លាំងទៅធ្វើជាវីដេអូទាំងដែលគ្មានបានអីមកវិញផង គួបផ្សំធ្វើហើយអត់មានអ្នកមើលទៀត ប៉ុន្តែខ្ញុំបានគិតវិញថា បើអត់មានអ្នកមើល ក៏ធ្វើហើយទុកមើលពេលខ្លួនឯងចាស់ទៅក៏បាន។

កញ្ញា សារិទ្ធ សារ៉ានិមល

អ្នកចែកចាយមាតិកាជំរុញការអាននៅក្នុងបណ្តាញសង្គមរូបនេះ បន្ថែមថា បច្ចុប្បន្នមានក្មេងៗច្រើនមែនទែន ដែលបានធ្វើវីដេអូ ពីការសង្ខេបសៀវភៅ ហើយមុនពេលពួកគាត់បង្កើតបានជាមាតិកាមួយៗ គឺត្រូវចំណាយថវិកា និងពេលវេលាក្នុងការអានឱ្យដឹងសាច់រឿងជាមុនសិន ទើបអាចធ្វើមាតិកានៃការអានបាន ដែលចំណុចទាំងនេះហើយវាកាន់តែធ្វើឱ្យពួកគាត់កាន់តែចាប់អារម្មណ៍ទៅលើការអាន ជៀសជាងទៅធ្វើរឿងដែលមិនសូវកើតជាប្រយោជន៍។  មិនតែប៉ុណ្ណោះ ក៏មានការលើកទឹកចិត្តពីអ្នកនិពន្ធមួយចំនួនផងដែរ ដោយគាត់បានផ្តល់ជាសៀវភៅរបស់ពួកគាត់ទៅកាន់អ្នកណា ដែលមានចំណង់ចំណូលចិត្តសង្ខេបសៀវភៅ ទាំងនេះហើយ សុទ្ធសឹងជាការចូលរួមចំណែកជំរុញការអានក្នុងសង្គមយើង៕