ការប្រែក្លាយគោលដៅឱ្យទៅជាលទ្ធផល អ្នក​ចាំបាច់​ត្រូវការដឹងពីវិធីរក្សាថាមពលកម្លាំងចិត្ត ប្រើប្រាស់ការគិតបង្កើតជាសកម្មភាព ដើម្បីរកឱ្យឃើញនូវគំនិតបន្ថែមក្នុងការធ្វើឱ្យបំណងប្រាថ្នាដែលខ្លួនមាន ប្រែក្លាយជាការពិត។

តាមរយៈគេហទំព័រ Best  Life បានឱ្យដឹងថា ការធ្វើឱ្យគោលដៅក្លាយជាការពិតបាន ជាដំបូងត្រូវដឹងអំពីអ្វីដែលខ្លួនឯងចង់បានជាមុនសិន ឧទាហរណ៍ដូចជា ៖ ទទួលបានរង្វាន់ពីអាជីពដែលខ្លួនកំពុងធ្វើ រកថវិកាបន្ថែម ហិរញ្ញវត្ថុមានសុវត្ថិភាព ធ្វើការក្នុងក្ដីស្រមៃ ទិញផ្ទះក្នុងក្ដីស្រមៃ ដើរកម្សាន្តបន្ថែមឱ្យច្រើន ស្រឡាញ់ខ្លួនឯងឱ្យបានច្រើន ស្វែងរកដៃគូជីវិតដែលល្អ មានសន្តិភាពផ្លូវចិត្ត រកបានមិត្តភ័ក្រ្តថ្មីៗ ឬក៏ទទួលបាននូវសុខភាពរឹងមាំជាដើម។ ខាងក្រោមជាគន្លឹះ៦ចំណុចដើម្បីជំរុញការប្រែក្លាយគោលដៅឱ្យទៅជាការពិត ៖

១. កំណត់អំពីចេតនាផ្ទាល់ខ្លួនឱ្យបានច្បាស់ ៖ ដើម្បីសម្រេចនូវមហិច្ឆតារបស់ខ្លួនបាន គឺត្រូវកំណត់អំពីចេតនាផ្ទាល់ខ្លួនឱ្យបានច្បាស់ជាមុនសិន បើពុំដូច្នោះទេ ពិបាកក្នុងការផ្ទៀងផ្ទាត់ថា តើគោលដៅនីមួយៗបានសម្រេចហើយឬនៅ ? ការប្រែក្លាយគោលដៅឱ្យទៅជាលទ្ធផល គឺត្រូវដឹងឱ្យច្បាស់ អំពីអ្វីដែលខ្លួនត្រូវការ និងចង់បាន ហើយត្រូវកំណត់គោលដៅប្រកបដោយភាពជាក់លាក់ និងធ្វើឱ្យប្រាកដចិត្តថា រាល់អ្វីដែលរំពឹង ឬដៅទុក បានឆ្លើយតបជាមួយនឹងអ្វីដែលខ្លួនចង់បាន។ ពេលដែលដឹងថា ខ្លួនឯង ចង់បានអ្វីមួយហើយ គឺផ្តល់ភាពងាយស្រួលក្នុងការបោះជំហានទៅកាន់សកម្មភាព ហើយក៏នឹងបង្កភាពងាយស្រួលក្នុងការបង្កើតទស្សនវិស័យជីវិតមួយ ដែលមានភាពប្រាកដប្រជា។

២. គូសវាសអំពីរូបភាពដែលនឹងត្រូវសម្រេច ៖ ដាក់ចិត្ត ដាក់កាយ ស្រមៃអំពីរូបភាពដែលនឹងត្រូវសម្រេចឱ្យបានក្នុងពេលខាងមុខ ដើម្បីជាការជំរុញចិត្តឱ្យស្ថិតក្នុងគោលដៅ និងផ្តោតអារម្មណ៍ចំពោះសកម្មភាពនីមួយៗឱ្យបាននឹងធឹង ។ បន្ថែមពីនោះ ការគូសវាសអំពីរូបភាពដែលនឹងត្រូវសម្រេច គឺជាដើមហេតុធ្វើឱ្យសុខភាពផ្លូវចិត្តមានសភាពរឹងមាំបន្ថែម។

៣. និយាយពាក្យល្អៗរៀងរាល់ថ្ងៃ ៖ ការប្រើប្រាស់ភាសា ឬប្រយោគវិជ្ជមាន ចាត់ទុកថាជាវិញ្ញាសាមួយ ដែលត្រូវបញ្ចូលទៅក្នុងទម្លាប់ប្រចាំថ្ងៃ។ មិនតែប៉ុណ្ណោះ ប្រសិនបើ ក្នុងមួយថ្ងៃ អាចនិយាយពាក្យល្អៗ ទៅកាន់ខ្លួនឯងឱ្យបានច្រើនដង គឺរឹងរឹតតែល្អប្រសើរ។ បើក្នុងករណីមិនទាន់មានពាក្យល្អនៅឡើយទេ! ជាដំបូងអាចស្វែងរកក្នុងអ៊ីនធឺណិត ហើយសម្រេចចិត្តជ្រើសយកតែពាក្យណាដែលពាក់ព័ន្ធនឹងខ្លួនឯង ឧទាហរណ៍ដូចជា “ខ្ញុំនឹងសម្រេចគោលដៅរបស់ខ្ញុំ ឬខ្ញុំគួរតែទទួលបាននូវក្ដីស្រលាញ់និងមានការគាំទ្រជាដើម“។ ត្រូវប្រាកដថា រាល់ពាក្យពេចន៍ដែលយកមកប្រើប្រាស់ មានជាប់ទាក់ទងនឹងអ្វីដែលខ្លួនបានប្រាថ្នា។

៤. ធ្វើបន្ទះក្ដាមួយដែលរៀបរាប់អំពីគោលដៅនិងក្ដីប្រាថ្នា ៖ការជ្រើសយកបន្ទះមួយ ហើយច្នៃទៅជាផ្ទាំងដែលរៀបរាប់អំពីអ្វីដែលនឹងគ្រោងសម្រេចនៅពេលអនាគត មិនត្រឹមតែផ្តល់ប្រយោជន៍ ក្នុងការរក្សាទឹកចិត្តឱ្យបន្តសកម្មភាពនោះទេ ប៉ុន្តែបានផ្តល់នូវការកម្សាន្ត និងភាពរីករាយបន្ថែម។ ក្រោយពេលធ្វើបន្ទះ ដែលរៀបរាប់អំពីបំណងប្រាថ្នារួចហើយ ជាកិច្ចបន្ទាប់ គួរតែ រក្សាទុកនៅកន្លែងមួយដែលងាយក្នុងការសម្លឹងឃើញ ហើយអាចទាញអារម្មណ៍ឱ្យងាកទៅមើល និងផ្តោតស្មារតីចំពោះបន្ទះនោះ។ កន្លែងទុកមានដូចជាទុកនៅខាងមុខទូទឹកកក មុខទ្វារចេញចូល ឬក្បែរកញ្ជក់ជាដើម។

៥. ជ្រើសសកម្មភាពដែលផ្តល់ជាកម្លាំងចិត្ត ៖ តើធ្លាប់មានការងឿងឆ្ងល់នៅក្នុងចិត្តដែរទេថា តើធ្វើដូចម្តេចទើបក្ដីស្រមៃដំណើរការដោយរលូនបាន ? ខណៈដំណើរទៅកាន់ក្ដីប្រាថ្នានីមួយៗ មានការប្រកួតប្រជែងជាមួយខ្លួនឯងជាច្រើនចំណុច? ឆ្លើយតបទៅនឹងចំណោទបញ្ហានេះ គឺចាប់ផ្តើមដោយការបំបែកគោលដៅ ឱ្យទៅ ជាជំហានតូចៗ ដែលធ្វើយ៉ាងណាមើលទៅសមល្មមអាចសម្រេចបាន រួចបន្តអនុវត្តន៍ឱ្យបានរឿយៗ។ ការដាក់កំហិតខ្លួនឯងឱ្យធ្វើបានទៀងទាត់ប្រចាំថ្ងៃ ប្រៀបដូចជាការបង្ខិតខ្លួនឯងឱ្យដល់គោលដៅដែលបានរំពឹងទុក។ ដើម្បីបន្តល្បឿនរក្សាទឹកចិត្តឱ្យធ្វើសកម្មភាពជារៀងរាល់ថ្ងៃ គួរតែប្រើប្រាស់កម្មវិធីឌីថលមួយចំនួនដើម្បីផ្ទៀងផ្ទាត់តាមដានកិច្ចការឱ្យបានជាប្រចាំ។

៦. មានសេចក្ដីអំណរជាប្រចាំ ៖ ស្របពេលដែលយកចិត្តទុកដាក់អំពីការសម្រេចឱ្យបាននូវបំណងប្រាថ្នាសំខាន់ៗ លោកអ្នកមិនគួរបំភ្លេចអំពីអ្វីៗដែលមានស្រាប់ ឬកំពុងមានក្នុងពេលបច្ចុប្បន្ននេះទេ គួរតែមានសេចក្ដីសប្បាយចិត្តចំពោះខ្លួនឯង និងមនុស្សជុំវិញខ្លួន និងពេញចិត្តចំពោះដំណើរលូតលាស់រៀងរាល់ថ្ងៃ។ ការធ្វើសេចក្ដីអំណរជាប្រចាំ ជាកត្តាពង្រឹងបាននូវផ្នត់គំនិតវិជ្ជមាន ក៏ដូចជាទឹកចិត្តក្នុងការបន្តអនុវត្តន៍សកម្មភាពទាំងឡាយណា ដែលប្រែក្លាយគោលដៅឱ្យទៅជាលទ្ធផល និងសម្រេចក្ដីស្រមៃដែលប៉ងមកជាយូរយាណាស់ហើយ៕