ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្រាប់អ្នករស់នៅជាមួយបញ្ហាថប់បារម្ភ ទំនងជាឆាប់តានតឹងជាមួយនឹងការងារ ជាងមនុស្សទូទៅ។ ហេតុនេះ ការជ្រើសរើសអាជីព និងជំនាញ ដែលសក្តិសមនឹងស្ថានភាពផ្លូវចិត្តពិតជាសំខាន់ណាស់ សម្រាប់ការរស់នៅ។ មានអាជីពមួយចំនួន ដែលអ្នកងាយថប់បារម្ភ អាចជ្រើសរើសបាន។
ជំងឺថប់បារម្ភ គឺជាក្រុមនៃស្ថានភាពផ្លូវចិត្ត ដែលជាធម្មតាពាក់ព័ន្ធនឹងការបន្ត ឬកើតឡើងម្ដងហើយម្ដងទៀត នៃអារម្មណ៍ភ័យខ្លាច និងការព្រួយបារម្ភ។ បញ្ហានេះ ក៏អាចស្ដែងឡើង តាមរយៈរោគសញ្ញាលើរាងកាយផងដែរ ដូចជា ការផ្លាស់ប្ដូរចលនាដង្ហើម ការបែកញើស និងពិបាកគេង។
ការរស់នៅជាមួយនឹងរោគសញ្ញាទាំងនេះ អាចធ្វើឱ្យស្មុគស្មាញដល់ការស្វែងរកការងារ ដោយសារតែពួកគេចង់ស្វែងរកការងារ ដែលសក្ដិសមនឹងស្ថានភាពផ្លូវចិត្តខ្លួនឯង។
សមាគមថប់បារម្ភ និងជំងឺធ្លាក់ទឹកចិត្តអាម៉េរិក (ADAA) ណែនាំថា ជំងឺថប់បារម្ភ គឺជាស្ថានភាពផ្លូវចិត្តទូទៅបំផុត ដែលកំពុងកើតមានលើមនុស្សពេញវ័យ។ ADAA ក៏ចង្អុលបង្ហាញផងដែរថា ការបំពេញការងារ អាចជាកត្តារួមចំណែកធ្វើឱ្យមនុស្សមានបញ្ហាថប់បារម្ភ និងប៉ះពាល់ដល់ជីវិតប្រចាំថ្ងៃរបស់ពួកគេ។
យ៉ាងណាក៏ដោយ ការថប់បារម្ភ ក៏នាំមកនូវចំណុចវិជ្ជមានផងដែរ ដែលចំណុចនោះគឺ អ្នកជំនាញរកឃើញថា ការថប់បារម្ភ គឺបង្កប់នូវអារម្មណ៍អវិជ្ជមាន ហើយអារម្មណ៍អវិជ្ជមាន មានសក្កានុពលក្នុងការជំរុញគំនិតច្នៃប្រឌិត និងមានកម្លាំងជំរុញទឹកចិត្តខ្ពស់។
ខណៈការស្រាវជ្រាវនៅឆ្នាំ២០២០ បានបង្ហាញថា មនុស្សដែលរស់នៅជាមួយដំណើរការនៃការថប់បារម្ភ ធ្វើឱ្យពួកគេមានប្រតិកម្មយ៉ាងឆាប់រហ័ស ដែលអាចជួយបុគ្គលម្នាក់ៗកាន់តែមាន លទ្ធភាព ផលិតភាព និងភាពច្នៃប្រឌិតក្នុងការងារ។
ចំណុចដែលត្រូវពិចារណា ចរចាលើតួនាទីគឺ ហិរញ្ញវត្ថុ ម៉ោងធ្វើការ និងទីតាំង។ ខណៈហិរញ្ញវត្ថុ អាចជាប្រភពនៃភាពតានតឹង និងការថប់បារម្ភ ដែលប៉ះពាល់លើមនុស្សពេញវ័យខ្លាំងជាងគេ ក្រៅពីស្ថិរភាពហិរញ្ញវត្ថុ មនុស្សម្នាក់ត្រូវបង្កើតតុល្យភាពការងារ និងពង្រឹងសុខភាព បើមិនដូច្នេះទេ សុខភាពផ្លូវចិត្តរបស់គេ នឹងកាន់តែធ្ងន់ធ្ងរ។
លើសពីនេះ ការស្រាវជ្រាវរកឃើញថា ចម្ងាយក៏ជាកត្តាចម្បងដែលមានឥទ្ធិពលផ្លូវចិត្តដែរ ប្រសិនបើការងារ មានចម្ងាយជិត និងអាចបត់បែនបាន គឺអាចកាត់បន្ថយភាពតានតឹង និងបង្កើនផលិតភាពបុគ្គលិក ដោយអាចចៀសវាងពីប្រភព ដែលនាំឱ្យមានបញ្ហាថប់បារម្ភដូចជា ការធ្វើទំនាក់ទំនងជាមួយក្រុមការងារ បរិយាកាសរំខាន និងកង្វះគម្លាតផ្ទាល់ខ្លួន។
បើតាម Medical News Today មានការងារមួយចំនួន ដែលសក្ដិសមបំផុត សម្រាប់អ្នកមានបញ្ហាថប់បារម្ភ ដែលការងារទាំងនោះ មានដូចជា អ្នកស្រាវជ្រាវក្នុងបន្ទប់ពិសោធន៍ (Lab technician) គណនេយ្យករ បណ្ណារក្ស គ្រូបង្វឹកផ្នែកកាយសម្បទា អ្នកនិពន្ធ អ្នកឌីហ្សាញកម្មវិធីកុំព្យូទ័រ អ្នករចនាក្រហ្វិក អ្នកធ្វើការផ្នែកគ្រប់គ្រងឃ្លាំង និងអ្នកអនាម័យ ដែលការងារទាំងនេះភាគច្រើន ជាការងារដែលផ្ដល់ឯករាជ្យភាពពេញលេញ និងមានទំនាក់ទំនងជាមួយមនុស្សតិចតួច។
សម្រាប់អាជីពដែលមានអត្រា នៃភាពតានតឹង ការបាក់ទឹកចិត្ត និងថប់បារម្ភខ្ពស់ គឺ អ្នកជំនាញផ្នែកសុខភាព គ្រូង្រៀន និងអ្នកជំនាញក្នុងវិស័យអប់រំ អ្នកសេវាកម្មផ្នែកការពារ (protective service occupations) និងអ្នកផ្ដល់សេវាបម្រើសេវាអតិថិជន (customer service occupations) ៕
