សាកលវិទ្យាល័យកំពូលៗរបស់ប្រទេសចិន បានប្រកាសពីផែនការពង្រីកការចុះឈ្មោះចូលរៀនថ្នាក់បរិញ្ញាបត្រជំនាញ AI ដើម្បីផ្ដល់អាទិភាពដល់ការអភិវឌ្ឍធនធានមនុស្សលើវិស័យ AI និងវិស័យអាទិភាពជាច្រើនទៀត ឱ្យស្របទៅនឹង ផែនការយុទ្ធសាស្ត្រជាតិ ដែលចិនហៅថា «តម្រូវការយុទ្ធសាស្ត្រជាតិ – national strategic need» ។

ការប្រកាសនេះ ធ្វើឡើងបន្ទាប់ពីគេមើលឃើញពីការរះឡើងនៃក្រុមហ៊ុន AI DeepSeek ដែលទទួលបានការចាប់អារម្មណ៍យ៉ាងខ្លាំងពីសាធារណៈជនចិន និងអន្តរជាតិ។

អ្នកវិភាគជាច្រើន លើកឡើងថា ភាពជោគជ័យរបស់ DeepSeek គឺកើតឡើងបាន ដោយសារក្រុមអ្នកស្រាវជ្រាវឆ្នើមៗ មកពីសាកលវិទ្យាល័យកំពូលៗក្នុងស្រុក។ សមិទ្ធផលនេះ បង្ហាញពីការវិនិយោគ និងការយកចិត្តទុកដាក់ខ្លាំងរបស់រដ្ឋាភិបាលទីក្រុងប៉េកាំង ក្នុងការអភិវឌ្ឍធនធានមនុស្សក្នុងស្រុក លើវិស័យ STEM ។ ខណៈថ្មីៗនេះ សហរដ្ឋអាម៉េរិកកំពុងរឹតបន្តឹងលើទិដ្ឋាការនិស្សិតចិន បានជំរុញឱ្យចិនបង្កើនការផលិតធនធានមនុស្សក្នុងវិស័យ AI កាន់តែច្រើន។

សាកលវិទ្យាល័យប៉េកាំង បានប្រកាសកាលពីថ្ងៃសៅរ៍ថា ខ្លួននឹងបន្ថែមកន្លែងសិក្សាសម្រាប់ថ្នាក់បរិញ្ញាបត្រចំនួន ១៥០ កន្លែងនៅឆ្នាំ២០២៥ ដើម្បីផ្ដោតលើ «សារៈសំខាន់ជាយុទ្ធសាស្ត្រជាតិ – national strategic importance» ដែលជាវិញ្ញាសាមូលដ្ឋានត្រូវអនុវត្ត។ ខណៈនិស្សិតភាគច្រើន នឹងសិក្សាលើជំនាញ វិទ្យាសាស្ត្រព័ត៌មាន និងបច្ចេកវិទ្យា វិស្វកម្ម និងវេជ្ជសាស្ត្រគ្លីនិក។

សាកលវិទ្យាល័យ Renmin បាននិយាយកាលពីថ្ងៃសៅរ៍ថា ខ្លួនក៏នឹងបង្កើនកន្លែងសម្រាប់និស្សិតចូលរៀន ១០០ កន្លែងដែរ ពិសេស ជំនាញ AI ដើម្បីពង្រឹងសមត្ថភាពបង្កើតថ្មីបន្ថែមទៀត។

ការពង្រីកនេះត្រូវបានផ្សារភ្ជាប់យ៉ាងស៊ីជម្រៅទៅនឹងផែនការធ្វើឱ្យប្រទេសចិន ក្លាយជាប្រទេសមានប្រព័ន្ធអប់រំដ៏មានឥទ្ធិពលខ្លាំងបំផុត​នៅឆ្នាំ២០៣៥ ហើយរដ្ឋាភិបាលចិន ផ្ដោតសំខាន់លើការអភិវឌ្ឍធនធានមនុស្ស ដែលមានទេពកោសល្យ សម្រាប់យុគសម័យឌីជីថល។

ជាមួយគ្នានេះ សាកលវិទ្យាល័យ Shanghai Jiao Tong នឹងបន្ថែម កន្លែងចូលរៀនចំនួន ១៥០កន្លែង ដែលផ្ដោតលើ «ជំនាញបច្ចេកវិទ្យាទំនើប – Cutting-edge technology» និងជំនាញនៅក្នុងឧស្សាហកម្មថ្មីៗ ដែលកំពុងត្រូវការធនធានមនុស្សបន្ទាន់ ដូចជា ជំនាញ AI, ជំនាញផលិតកម្មឈីប (Intergrated circuits), ជំនាញជីវវេជ្ជសាស្ត្រ ការថែទាំសុខភាព និងថាមពលថ្មី (New Energy)។

គួរជម្រាបជូនថា កាលពីខែមករា ដើមឆ្នាំនេះ រដ្ឋាភិបាលចិន បានដាក់ចេញផែនការយុទ្ធសាស្ត្រ សកម្មភាពជាតិ ក្នុងការកសាងប្រទេសចិន ឱ្យក្លាយជាប្រទេសមានប្រព័ន្ធអប់រំខ្លាំងនៅឆ្នាំ២០៣៥ ដើម្បីជំរុញឱ្យការអប់រំរបស់ខ្លួន មានប្រសិទ្ធភាពជាងមុន លើការបង្កើតថ្មី និងកសាងជាតិឱ្យក្លាយជាប្រទេសខ្លាំងបំផុតមួយ។

ខណៈនៅខែធ្នូឆ្នាំនេះ អាជ្ញាធរអប់រំចិន នឹងចាប់ផ្ដើមការអប់រំ AI សម្រាប់សិស្សកម្រិតបឋមសិក្សា និងមធ្យមសិក្សា ដើម្បីជំរុញសមត្ថភាពច្នៃប្រឌិត ចំណាប់អារម្មណ៍ក្នុងវិស័យវិទ្យាសាស្ត្រ និងជំនាញឌីជីថលសម្រាប់យុវជនចិន៕