ការឈប់សម្រាកគឺជាពេលវេលាមួយ ដែលមានសុភមង្គលចំពោះមនុស្សភាគច្រើន ព្រោះគេអាចឆ្លៀតឱកាសនេះ ដើម្បីធ្វើសកម្មភាពឆ្លើយតបនឹងចំណូចចិត្តផ្ទាល់ខ្លួន។ យ៉ាងណាមិញ ភាពរីករាយកំឡុងពេលវិស្សមកាល មិនមែនកើតមានចំពោះគ្រប់គ្នាឡើយ មនុស្ស​មួយចំនួនបែរជាកើតមានអារម្មណ៍សោកសៅ ឬសេចក្ដីសង្រេងកំឡុងពេលវិស្សមកាល។ អាការបែបនេះកើតចំពោះមនុស្សដែលទើបតែជួបនូវបទពិសោធន៍នៃការបាត់បង់អ្វីមួយ ដូចជា បាត់វត្តមានមនុស្សជិតស្និទ្ធ ឬសមាជិកគ្រួសារដែលធ្លាប់ប្រើប្រាស់ពេលការឈប់សម្រាកជាមួយគ្នាកន្លងមក។ បន្ថែមពីនោះ ការដាក់សម្ពាធឱ្យខ្លួនឯងត្រូវតែសប្បាយ និងការស្ថិតក្នុងដំណាក់កាលផ្លាស់ប្តូរទម្លាប់អ្វីមួយ ក៏ជាដើមចមជំរុញភាពសោះកក្រោះចំពោះខ្លួនឯងដែរ។

ទោះស្ថិតក្នុងកាលៈទេសៈស្រដៀងគ្នាក៏ដោយ ការដែលមានទុក្ខព្រួយកំឡុងពេលវិស្សមកាលជាប្រចាំ មិនអាចជ្រើសយកវិធីសាស្រ្តដូចៗគ្នាទេ តែយ៉ាងណា តាមរយៈគេហទំព័រ Woman`s Day បានឱ្យដឹងថា ក្នុងករណីសង្កេតឃើញថា អាការស្ងៀមស្ងាត់ ទុក្ខសោក បាត់បង់ខ្លួនឯង និងភាពឈឺចាប់ណាមួយបានកើតមានកាន់តែច្រើន កំឡុងពេលមានឱកាសឈប់សម្រាក សូមកុំទាន់បន្ទោសខ្លួនឯងបន្ថែម ជំនួសឱ្យការអនុវត្ត គន្លឹះ៣ចំណុច ខាងក្រោមជាមុនសិន ដើម្បីសម្រួលដល់សុខភាពផ្លូវចិត្ត រក្សាស្មារតីមោះមុត និងបន្ថយភាពតានតឹង។

១.ធ្វើសកម្មភាពដែលស្របនឹងស្ថានភាពផ្ទាល់ខ្លួន ៖ ជាដំបូងកុំទាន់បារម្ភខ្លាំងអំពីថា តើគួរ ឬមិនគួរ ឬក៏ថា តើអ្នកដទៃនឹងគិតយ៉ាងណា ចំពោះខ្លួនឯង ឬ ផ្តោតលើ តើគេមើលមកយើងក្នុងន័យល្អ ឬមិនល្អ? សូមកុំទាន់គិតទាំងប៉ុន្មានសំណួរដែលលើកមកអម្បាញ់មិញក្នុងស្ថានការណ៍ដែលត្រូវជំរុញខ្លួនឯង ឱ្យមានភាពរីករាយកំឡុងពេលវិស្សមកាល ដោយហេតុថាបុគ្គលម្នាក់ៗមានវិធីសាស្រ្តខុសៗគ្នាដើម្បីលួងលោមខ្លួនឯង។ ប្រសិនបើអាចចំណាយពេលជាមួយគ្រួសារបាន នោះរឹងរឹតតែផ្តល់នូវផ្លូវចិត្តល្អ ចំពោះបច្ចុប្បន្ន និងអនាគត។

២.បន្សល់ការចង់ចាំល្អៗចំពោះមនុស្សជាទីស្រឡាញ់ ៖ ការផ្តល់កិត្តិយស និងបង្កើតសកម្មភាពដែលមានអត្ថន័យទៅកាន់ដំណើរជីវិតមនុស្សជុំវិញខ្លួន ជាពិសេសមនុស្សស្និទ្ធស្នាលដូចជា គ្រួសារ គឺជាការកសាងមូលដ្ឋានគ្រឹះនៃទំនាក់ទំនងដ៏រឹងមាំមួយ ពង្រឹងបាននូវផលជះជាវិជ្ជាមានចំពោះខ្លួនឯង និងអ្នកដទៃ ដូចជាការបង្កើតអនុស្សាវរីយ៍ ការបរិច្ចាគ ចែករំលែក​សកម្មភាពសប្បុរស ធ្វើកម្មវីធីអបអរថ្ងៃខួបកំណើត និងសកម្មភាពជាច្រើនទៀតដែលបង្កឱ្យបរិយាកាសឱ្យកាន់តែរីករាយ។

កាលដែលរិះរកវិធីសាស្រ្ត និងមានផ្នត់គំនិតធ្វើឱ្យអ្នកដទៃ ស្ថិតក្នុងបច្ចុប្បន្នភាព គឺជាការបង្ហាញក្ដីស្រឡាញ់ដែលមានឥទ្ធិពល។ ប្រសិនបើពួកគាត់ចូលចិត្តចម្អិនអាហារ សូមយកថ្ងៃឈប់សម្រាក ទៅធ្វើអាហារបរិភោគជាមួយគ្នា ដោយបន្ថែមរស់ជាតិថ្មីៗ មានការរចនាតុបតែង ឬក៏រកគន្លឹះណាមួយដែលបង្ហាញអំពីភាពខុសប្លែកពីថ្ងៃធម្មតា។

៣.សរសេរ ៖ ប្រើប្រាស់វិធីសាស្រ្តសរសេរអារម្មណ៍ខ្លួនឯង មិនថាតាមរយៈសៀវភៅ ឬក៏ឧបករណ៍អេឡិចត្រូនិចនោះទេ ។ ឧទារណ៍ប្រសិនបើកំពុងនឹកនរណាម្នាក់ គួរសរសេរចេញមកថា កំពុងតែនឹកទៅដល់ពួកគេ ឬក៏ថា តើមានពាក្យពេចន៍អ្វីខ្លះ ដែលអ្នកគ្រោងនឹងនិយាយ ប្រសិនបើមានវត្តមានពួកគេនៅទីនេះ? ការសរសេរពី អារម្មណ៍ផ្ទាល់ខ្លួនចេញមកក្រៅ គឺជាដំណើរការជំរុញឱ្យខ្លួនឯងចេះទទួលស្គាល់កាពិត ឬមានស្មារតីស្ថិតក្នុងបច្ចុប្បន្នភាព និងរៀនរីករាយ ជាមួយនឹងវិស្សមកាលដែលខ្លួនមាន៕