តាមរយៈក្រសួងប្រៃសណីយ និងទូរគមនាគមន៍ (ក.ប.ទ) ប្រកាសជ្រើសរើសសិស្សនិស្សិត និងសាធារណជនចូលសិក្សាអាហារូបករណ៍ថ្នាក់បរិញ្ញាបត្រជាន់ខ្ពស់ចំនួន១០០នាក់ ដើម្បីសិក្សាលើជំនាញបច្ចេកវិទ្យាឌីជីថល នៅបណ្ឌិត្យសភាបច្ចេកវិទ្យាឌីជីថលកម្ពុជា និងសាកលវិទ្យាល័យអាមេរិកាំងភ្នំពេញ (ទីតាំងសាខាថ្មី)។

អាហារូបករណ៍ផ្ដល់ជូនការសិក្សានៅ១០០%នៅ បណ្ឌិតសភាបច្ចេកវិទ្យាឌីជីថលកម្ពុជា ចំនួន២៥កន្លែងលើផ្នែកវិទ្យាសាស្ត្រកុំព្យូទ័រ, ជំនាញបញ្ញាសិប្បនិម្មិត និងវិទ្យាសាស្ត្រទិន្នន័យ។ ជាមួយគ្នានេះ អាហារូបករណ៍៧៥% និង ៥០% នៅសាកលវិទ្យាល័យអាមេរិកាំងភ្នំពេញ លើមុខជំនាញ (៧៥%) វិទ្យាសាស្ត្របញ្ញាសិប្បនិម្មិត១៥កន្លែង ច្បាប់បច្ចេកវិទ្យាឌីជីថល១៥កន្លែង ច្បាប់សន្តិសុខសាយប័រ១៥កន្លែង ច្បាប់បញ្ញាសប្បនិម្មិត១៥កន្លែង និងអាហារូបករណ៍៥០% សម្រាប់កម្មវិធីថ្នាក់ទ្វេបរិញ្ញាបត្រជាន់ខ្ពស់ (Dual Degree) ជាមួយសាកលវិទ្យាល័យ Fort Hays State University នៅសហរដ្ឋអាមេរិក លើមុខជំនាញ វិទ្យាសាស្ត្រកុំព្យូទ័រ១៥កន្លែង។

លក្ខខណ្ឌនៃការជ្រើសរើស បេក្ខជនជាសិស្សបានបញ្ចប់សញ្ញាបត្របរិញ្ញាបត្រវិទ្យាសាស្ត្រកុំព្យូទ័រ ឬជំនាញដែលពាក់ព័ន្ធ និងមានលក្ខខណ្ឌមួយចំនួនដូចជា បានឆ្លងកាត់ការដាក់ពាក្យ មាន GPA យ៉ាងតិច៣.០ មានកម្រិតភាសាអង់គ្លេស IELTS យ៉ាងតិច៥.០ ឬវិញ្ញាបនបត្រដែលមានតម្លៃស្មើ បានឆ្លងកាត់ការសម្ភាសន៍ជាមួយគណៈកម្មាការរៀបចំការជ្រើសរើសនិស្សិតអាហារូបករណ៍ និងឯកសារភ្ជាប់រួមមាន អត្តសញ្ញាណប័ណ្ណ ឬលិខិតឆ្លងដែនសញ្ជាតិខ្មែរ ប្រវត្តិរូបសង្ខេប (CV) លិខិតចំណាប់អារម្មណ៍ ច្បាប់ចម្លងនៃប្រតិបត្តិពិន្ទុចាប់ពីឆ្នាំទី១ ដល់ឆ្នាំចុងក្រោយ (GPA៣.០យ៉ាងតិច)។ សម្រាប់សាកលវិទ្យាល័យអាមេរិកាំងភ្នំពេញតម្រូវបន្ថែមរួមមាន កម្រិតភាសាអង់គ្លេស IELTSយ៉ាងតិច៦.៥ ឬ TOEFL iBT យ៉ាងតិច៧៩ (បេក្ខជនអាចស្នើធ្វើតេស្តកម្រិតភាសាអង់គ្លេសក្នុងករណីមិនទាន់មានពិន្ទុ IELTS ឬ TOEFL) Recommendation Letter ចំនួន២ច្បាប់។

អត្ថប្រយោជន៍ដែលអាហារូបករណ៍ផ្ដល់ជូនរួមមាន ការរ៉ាប់រងថ្លៃសិក្សាតាមអាហារូបករណ៍ដល់ចប់ថ្នាក់បរិញ្ញាបត្រជាន់ខ្ពស់ ទទួលបានឱកាសបន្តថ្នាក់បណ្ឌិតនៅប្រទេសបារាំង និងប្រទេសផ្សេងៗទៀត។ លើសពីនេះ ទទួលបានឱកាសការងារល្អ និងប្រាក់បៀវត្សខ្ពស់ក្នុងក្រសួង ស្ថាប័ន ឬក្រុមហ៊ុន​ឯកជនជាដើម។ កាលបរិច្ឆេទទទួលពាក្យសម្រាប់បណ្ឌិត្យសភាបច្ចេកវិទ្យាឌីជីថលកម្ពុជា និសិ្សតចុះឈ្មោះអាចដាក់ពាក្យតាមរយៈតំណភ្ជាប់ https://graduate-school.cadt.edu.kh ចាប់ពីថ្ងៃជូនដំណឹងរហូតដល់ថ្ងៃទី១៥ ខែមករា ឆ្នាំ២០២៥។ ក្រោយដាក់ពាក្យ បេក្ខជនបេក្ខនារី ដែលបានដាក់ពាក្យ និងឯកសារតាមប្រព័ន្ធអនឡាញ ត្រូវរង់ចាំរហូតដល់មានការជូនដំណឹងដើម្បីទៅសម្ភាសន៍។ ការសម្ភាសន៍នឹងធ្វើឡើងនៅអគារបណ្ឌិតសភាបច្ចេកវិទ្យាឌីជីថលកម្ពុជា តាមពេលវេលា និងកាលបរិច្ចេទដែលនឹងរៀបចំដោយគណៈកម្មការរៀបចំការជ្រើសរើសនិស្សិតអាហារូបករណ៍។

សម្រាប់សាកលវិទ្យាល័យអាមេរិកាំងភ្នំពេញ និស្សិតចុះឈ្មោះដាក់ពាក្យតាមរយៈតំណភ្ជាប់ https://www.sisaupp.com/masters-online-application ចាប់ពីថ្ងៃជូនដំណឹងរហូតដល់ថ្ងៃទី១៨ ខែធ្នូ ឆ្នាំ២០២៤។ សម្រាប់ព័ត៌មានបន្ថែមអាចទាក់ទងទៅកាន់ ០៩៣ ៣៦៦ ៦២៣ / ០៦៩ ២៦៦ ៦២៣ ឬ Email: [email protected] ៕