ក្នុង​ការ​ប្រកួត​រ៉ូបូត​អន្តរជាតិ​ឆ្នាំ​២០២៥ ដែល​បាន​ប្រព្រឹត្ត​ទៅ​នៅ​ប្រទេស​ម៉ុងហ្គោលី កាលពីពេលថ្មីៗនេះ ក្រុម​កម្ពុជា​បាន​​ឈាន​ទៅ​ដល់វគ្គ៨ក្រុមចុងក្រោយ, ត្បិត​តែ​មិន​បាន​លើកពាន​សម្រាប់​ការ​ប្រកួត​ថ្នាក់អន្តរជាតិ​នេះ ប៉ុន្តែក្រុម​​កម្ពុជា​ទទួលបានពាន​វិស្វកម្ម​ល្អបំផុត “Best Enginerr Award” ដែលបង្ហាញពីការ​ទទួល​ស្គាល់សមត្ថភាពច្នៃប្រតិដ្ឋ និង​បច្ចេកទេសខ្ពស់របស់យុវជន​កម្ពុជា។

លោក សយ ក្សត្រា និស្សិត​ឆ្នាំទី៤ ផ្នែក​អគ្គិសនី និងថាមពល នៃវិទ្យាស្ថានបច្ចេកវិទ្យាកម្ពុជា ជាតំណាងក្រុមកម្ពុជា​បានឱ្យដឹងថា សម្រាប់ការប្រកួតរ៉ូបូតអន្តរជាតិដែលធ្វើ​ឡើង​កាលពីចុងខែសីហា ក្រុមរ៉ូបូតកម្ពុជា បានប្រកួតត្រឹមវគ្គ៨ក្រុមចុងក្រោយ ដោយប៉ះជាមួយហុងកុង ជាអ្នកឈ្នះ។ ប៉ុន្តែនៅពេលប្រកាសលទ្ធផល គឺក្រុមរ៉ូបូតកម្ពុជា បានជាប់ពានរង្វាន់ល្អបំផុត “Best Engineer Award”។ ការឈ្នះពាន “Best Engineer Award” នេះ លោក ក្សត្រា បញ្ជាក់ថា គឺដោយសារតែរ៉ូបូតរបស់ក្រុមកម្ពុជា​បានប្រើប្រាស់បច្ចេកវិទក្យាបាញ់បាល់ និងដេញតាមកន្ត្រកបានដោយស្វ័យប្រវត្តិ។ បច្ចេកវិទ្យា​នេះ គឺតែ៤ទៅ៥ក្រុមប៉ុណ្ណោះបានប្រើទម្រង់បច្ចេកទេសនេះ។ ម្យ៉ាង​ពាន “Best Engineer Award” ក៏​គណៈកម្មការផ្តោត​ទៅក្រុមមេកានិក ឬការឌីសាញរបស់ក្រុមបានល្អ មាំ និងមានភាពច្នៃប្រតិដ្ឋ។

“ពេលចាញ់ហុងកុងមានអារម្មណ៍ស្រពន់ចិត្តដែរ ប៉ុន្តែនៅពេលគណៈកម្មការប្រកាសក្រុមកម្ពុជាជាប់ពានរង្វាន់ល្អបំផុត Best Engineer Award គឺមានអារម្មណ៍សប្បាយចិត្ត និងមានមោទនភាព ដែលក្រុមអាចទទួលបានជ័យលាភីនេះ​ ព្រោះជ័យលាភីនេះបានមកដោយសារគណៈកម្មការមើលឃើញពីភាពច្នៃប្រតិដ្ឋរបស់យើង បច្ចេកទេសកើនឡើងល្អស្មើនឹងក្រុមខ្លាំងៗដែរ”

ការប្រកួតរ៉ូបូតអន្តរជាតិឆ្នាំ២០២៥ នៅប្រទេសម៉ុងហ្គោលី មានក្រុម​បេក្ខជនមកពី ១២ប្រទេសចូលរួមប្រកួត រួមមានប្រទេស​កម្ពុជា អេហ្ស៊ីប ហ្វីជី ហុងកុង ឥណ្ឌា ឥណ្ឌូនេស៊ី ជប៉ុន ម៉ាឡេស៊ី ណេប៉ាល់ ស្រីឡាំងកា ថៃ និងប្រទេសវៀតណាម។

តាមលក្ខន្តិកៈនៃការ​ប្រកួត ក្រុម​តំណាងប្រទេស​នីមួយៗ​ដែល​ចូលរួម​ប្រកួត តម្រូវ​ឱ្យ​បង្កើត​រ៉ូបូត​ចំនួន២ ដើម្បីប្រជែង​ប្រកួត​តាមរយៈ​ការ​បោះបាល់​ចូលទៅ​ក្នុងកន្រ្តក ដូចជាការ​លេងបាល់បោះ, ដូច្នេះ​ក្រុម​កម្ពុជា​បាន​ផលិតរ៉ូបូតទីមួយ ជារ៉ូបូតចាំទទួលបាល់ពីរ៉ូបូតមួយទៀត ហើយបាញ់បាល់បញ្ចូលកន្រ្តក និង រ៉ូបូតទីពីរ ជារ៉ូបូតអាចបោកបាល់ និងអាចបាញ់ចូលកន្រ្តក ឬបាញ់ទៅឱ្យរ៉ូបូតមួយទៀត ព្រមទាំងមានរនាំងបើកការពារកុំឱ្យភាគីម្ខាងទៀតបាញ់បាល់ចូលកន្រ្តកបាន។

សម្រាប់រ៉ូបូតដែលក្រុមកម្ពុជាយកទៅប្រកួត រ៉ូបូតទី១ ហៅថា R1- Black Mamba និងរ៉ូបូតទី២ ហៅថា R2- Night Hawk, ពួកវាមានបាតរាងជារង្វង់ កង្កត់ផ្ចិត ៨០០មីលីម៉ែត្រ កម្ពស់ចុះក្រោម ១.៥ម៉ែត្រ និងកម្ពស់លោតឡើងប្រមាណ ២.៤ម៉ែត្រ។ ក្រុមយុវជន​កម្ពុជា បាន​ប្រើប្រាស់​រយៈ​ពេល​ប្រមាណជិត១ឆ្នាំ ទើប​អាច​បង្កើតរ៉ូបូត​ទាំងពីរនេះ​ចេញជា​រូបរាង។

យ៉ាងណាក៏ដោយ​បន្ទាប់ពីចូលរួមប្រកួតរ៉ូបូតថ្នាក់អន្តរជាតិនេះ សម្រាប់លោក សយ ក្សត្រា ក៏​ដូចជា​បេក្ខជន​ផ្សេង​ទៀត ពិតជារៀនសូត្របានច្រើនពីការ​ប្រកួតមួយនេះ ជាពិសេសជំនាញបច្ចេកទេសដែលប្រើប្រាស់ថ្មីៗក្នុងការប្រកួត ហើយក៏រៀនពីការធ្វើការងារជាក្រុម ការអត់ធ្មត់ ការតស៊ូខ្លាំងជាដើម។ ពិសេស​ទៅទៀតនោះ បទពិសោធន៍​ពីកម្មវិធី​ប្រកួត​នេះ ក៏​គឺបានជួយ​​បណ្ដុះគំនិតច្នៃប្រតិដ្ឋក្នុងការគិតដើម្បីបង្កើតបច្ចេកវិទ្យាថ្មីៗ។

លោក សយ ក្សត្រា បានលើកទឹកចិត្តប្អូនៗសិស្សានុសិស្សដែលស្រឡាញ់ផ្នែកបច្ចេកវិទ្យា ត្រូវព្យាយាម ខិតខំសិក្សារៀនសូត្រ ព្រោះបច្ចេកវិទ្យាសំខាន់ខ្លាំងណាស់ទៅ​លើគ្រប់វិស័យទាំងអស់ ទាំងផ្នែកកសិកម្ម ឧស្សាហកម្ម និងក្នុងវិស័យការពារជាតិផងដែរ។

សូមជំរាបជូនដែរថា ចាប់តាំងពីឆ្នាំ២០១៤មក ប្រទេស​កម្ពុជា​បាន​រៀបចំព្រឹត្តិការណ៍ប្រកួតរ៉ូបូតថ្នាក់ជាតិ​ជា​រៀងរាល់ឆ្នាំ ដោយ​ប្រមូលផ្តុំ​និស្សិតផ្នែកវិស្វកម្មមកពីសាកលវិទ្យាល័យផ្សេងៗទូទាំង​ប្រទេស។ សម្រាប់ការ​ប្រកួត​រ៉ូបូតថ្នាក់ជាតិ​ឆ្នាំ២០២៥នេះ ក្រុម​មក​ពីវិទ្យាស្ថាន​បច្ចេកវិទ្យា​កម្ពុជា ទទួលបានជ័យលាភីលេខ១ ដែល​ត្រូវ​តំណាង​កម្ពុជា ទៅ​ប្រកួត​នៅ​អន្តរជាតិ៕