ព្រឹកថ្ងៃទី ៩ ខែ កុម្ភៈ ឆ្នាំ ២០២៣ នៅសាកលវិទ្យាល័យសេដ្ឋកិច្ចនិងហិរញ្ញវត្ថុ មានរៀបចំសិក្ខាសាលាស្តីពី “ការសិក្សា និង ធុរកិច្ច” ដែលសហការរៀបចំដោយសាកលវិទ្យាល័យសេដ្ឋកិច្ចនិងហិរញ្ញវត្ថុ និង មជ្ឈមណ្ឌលអភិវឌ្ឍធុរកិច្ច ក្រោមអធិបភាពលោកបណ្ឌិត ជួន រតនៈ សាកលវិទ្យាធិការសាកលវិទ្យាល័យសេដ្ឋកិច្ចនិងហិរញ្ញវត្ថុ និង ឯកឧត្តម អុឹម សុខធី នាយកប្រតិបត្តិមជ្ឈមណ្ឌលអភិវឌ្ឍធុរកិច្ច និង មានការចូលរួមពីបុគ្គលិក សាស្ត្រាចារ្យ និង និស្សិតចំនួន ១០០ នាក់ ។

ឯកឧត្តម អុឹម សុខធី នាយកប្រតិបត្តិមជ្ឈមណ្ឌលអភិវឌ្ឍធុរកិច្ច បានឱ្យដឹងថា សិក្ខាសាលានេះ មានគោល-បំណងផ្សារភ្ជាប់ការសិក្សាទៅនឹងការធុរកិច្ច ពិសេសការបណ្តុះទស្សនធុរកិច្ច និង នវានុវត្តន៍ ស្របតាមស្មារតីនៃអនុ-ស្សារណៈយោគយល់ស្តីពីកិច្ចសហការរវាងស្ថាប័នទាំងពីរ។ ឯកឧត្តមបានបន្តថា មជ្ឈមណ្ឌលអភិវឌ្ឍធុរកិច្ច បាន និងកំពុងធ្វើកិច្ចសហការជាមួយសកលវិទ្យាល័យសេដ្ឋកិច្ច និង ហិរញ្ញវត្ថុ ដើម្បីកសាងសមត្ថភាពធនធានមនុស្ស ពិសេសនិស្សិត ឱ្យមានចំណេះដឹង ចំណេះធ្វើ សមត្ថភាព ជំនាញ និង គំនិតច្នៃប្រឌិតក្នុងវិស័យធុរកិច្ច ដើម្បីរួមចំណែកក្នុងការបង្កើតមុខរបរ ការងារធ្វើ និង ការអភិវឌ្ឍ​សង្គម-សេដ្ឋកិច្ចជាតិ ។ អនុស្សរណៈយោគយល់គ្នានេះ នឹងផ្តល់ឱកាសកាន់តែទូលាយដល់បុគ្គលិក សាស្ត្រាចារ្យ និង និស្សិតរបស់សាកលវិទ្យាល័យក្នុងការចូលរួមកម្មវិធីផ្លាស់ប្តូរបទពិសោធន៍, ការទទួលបានចំណេះដឹង និង បទពិសោធន៍ថ្មីៗពាក់ព័ន្ធវិស័យធុរកិច្ច, និង ការចូលរួមកម្មវិធីសិក្ខាសាលា និង វគ្គបណ្តុះ-បណ្តាលនានា ។

អង្គសិក្ខាសិលា ក៏មានការធ្វើបទបង្ហាញ ដោយវាគ្មិនកិត្តិយស ចំនួន ២ រូប ពាក់ព័ន្ធនឹងការត្រៀមខ្លួន​ និង កិច្ចខិតខំប្រឹងប្រែងក្នុងពេលសិក្សា និង ក្នុងពេលធ្វើធុរកិច្ច, ការចាប់ឱកាសអាជីពការងារ និង មុខរបរក្នុងវិស័យធុរកិច្ច, និង ការអភិវឌ្ឍសមត្ថភាពផ្នែកឌីជីថល សម្រាប់បម្រើដល់ការសិក្សា និង ការធ្វើធុរកិច្ច ។ អង្គសិក្ខាសាលាក៏បានចែករំលែក ចំណេះដឹង និង បទពិសោធន៍ក្នុងវិស័យធុរកិច្ច ដល់និស្សិត ពិសេសជំរុញ និង លើកទឹកចិត្តឱ្យនិស្សិតខិតខំទាំងការសិក្សា និងការសម្លឹងឆ្ពោះទៅអនាគត លើការចាប់អាជីពការងារ និង មុខរបរ ។

សូមជម្រាបជូនថា សកលវិទ្យាល័យសេដ្ឋកិច្ច និង ហិរញ្ញវត្ថុគឺជាគ្រឹះស្ថានឧត្តមសិក្សាឯកជន ដែលឈានមុខ ក្នុងការកសាងធនធានមនុស្ស ក្នុងវិស័យសេដ្ឋកិច្ច និង ហិរញ្ញវត្ថុ ពិសេសមុខជំនាញគណនេយ្យ ធនាគារ និង ហិរញ្ញវត្ថុ ដែលមានការទទួលស្គាល់ជាទូទៅ និងមានឱកាសការងារខ្ពស់ បន្ទាប់ពីបញ្ចប់ការសិក្សា ។ បន្ថែមពីលើនេះ សកលវិទ្យាល័យសេដ្ឋកិច្ច និង ហិរញ្ញវត្ថុមានកិច្ចសហការជាមួយស្ថាប័នជាច្រើន រួមទាំងនិយ័តករអចលនវត្ថុ និង បញ្ចំ និង មជ្ឈមណ្ឌលអភិវឌ្ឍធុរកិច្ច ដែលតាមនេះ និស្សិតសកលវិទ្យាល័យមានឱកាសខ្ពស់ក្នុងការទទួលបាននូវការសិក្សា និង ការអភិវឌ្ឍសមត្ថភាព ប្រកបដោយគុណភាព និង ភាពសម្បូរបែប ។

ថ្លែងក្នុងពិធីនោះ លោកបណ្ឌិតសាកលវិទ្យាធិការ ក៏បានថ្លែងអំណរគុណ ចំពោះការគាំទ្រពីសំណាក់មាតាបិតា អាណាព្យាបាល និង និស្សិតដែលបានជ្រើសរើសយកសាកលវិទ្យាល័យសេដ្ឋកិច្ចនិងហិរញ្ញវត្ថុ ជាគ្រឹះស្ថានឧត្តមសិក្សា ដើម្បីសម្រេចក្តីសុបិនរបស់ខ្លួន និង បានប្រកាសអំពីការបន្តទទួលចុះឈ្មោះសិក្សាសម្រាប់ថ្នាក់បិរញ្ញាបត្រ និង បរិញ្ញាបត្រជាន់ខ្ពស់ នៅសាកលវិទ្យាល័យសេដ្ឋកិច្ចនិងហិរញ្ញវត្ថុផងដែរ ៕