ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការមានផ្ទៃពោះ គឺជាផ្លាស់ប្តូរដ៏ធំធេងមួយនៅក្នុងជីវិតរបស់ស្រ្តីគ្រប់រូប។ ក្រៅពីការប្រែប្រួលរូបរាងកាយ ស្រ្តីពពោះតែងតែជួបប្រទះនូវការប្រែប្រួលអារម្មណ៍យ៉ាងខ្លាំង ដូចជា ងាយខឹងមួលម៉ៅ ស្មុគស្មាញ ឬមានអារម្មណ៍កើតទុក្ខជាដើម។ ដូច្នេះ ការយកចិត្តទុកដាក់លើ “សុខភាពផ្លូវចិត្ត” គឺជារឿងដែលមិនអាចខ្វះបាន ដើម្បីធានាបាននូវសុភមង្គលទាំងម្តាយ និងទារកក្នុងផ្ទៃ។
១. អ្វីដែលអ្នកគួរអនុវត្ត ដើម្បីបង្កើនភាពវិជ្ជមាន
ដើម្បីរក្សាស្មារតីឱ្យបានស្រស់ថ្លា និងកាត់បន្ថយភាពតានតឹង អ្នកគួរយល់ដឹងពីវិធីសាស្ត្រមួយចំនួនដូចខាងក្រោម៖
ការចែករំលែកអារម្មណ៍ ៖ កុំទុកទុក្ខព្រួយតែម្នាក់ឯង។ អ្នកគួរនិយាយបើកចិត្តអំពីអារម្មណ៍របស់អ្នកជាមួយដៃគូ មិត្តភក្តិ សមាជិកគ្រួសារ ឬពិភាក្សាជាមួយវេជ្ជបណ្ឌិតជំនាញ។
បច្ចេកទេសដកដង្ហើម ៖ នៅពេលមានអារម្មណ៍មិនល្អ ព្យាយាមអនុវត្តលំហាត់ប្រាណដកដង្ហើមចេញ-ចូលឱ្យបានវែងៗ និងយឺតៗ វានឹងជួយឱ្យអារម្មណ៍ស្ងប់បានយ៉ាងរហ័ស។
ធ្វើលំហាត់ប្រាណសម្រាល ៖ ការហាត់ប្រាណស្រាលៗសម្រាប់អ្នកមានផ្ទៃពោះ មិនត្រឹមតែជួយដល់សុខភាពរាងកាយប៉ុណ្ណោះទេ ប៉ុន្តែថែមទាំងជួយឱ្យអារម្មណ៍ល្អ និងគេងលក់បានស្ងប់ស្ងាត់ទៀតផង។
របបអាហារមានតុល្យភាព ៖ ការទទួលទានអាហារដែលល្អសម្រាប់សុខភាព និងញ៉ាំឱ្យបានទៀងទាត់ គឺជាគ្រឹះដ៏សំខាន់សម្រាប់សុខភាពផ្លូវចិត្ត។
ការស្វែងយល់បន្ថែម ៖ ព្យាយាមចូលរួមក្នុងកម្មវិធីផ្សេងៗសម្រាប់ស្រ្តីមានផ្ទៃពោះ ដូចជាវគ្គសិក្សាខ្លីៗ ឬសិក្ខាសាលា ដើម្បីទទួលបានចំណេះដឹង និងការលើកទឹកចិត្តពីអ្នកដទៃ។
២. អ្វីដែលអ្នកគួរជៀសវាង ដើម្បីការពារសុខភាពផ្លូវចិត្ត
ដើម្បីការពារខ្លួនអ្នកពីភាពស្មុគស្មាញ និងផលប៉ះពាល់អវិជ្ជមាន អ្នកមិនគួរធ្វើរឿងទាំងនេះឡើយ៖
កុំប្រៀបធៀបខ្លួនឯងនឹងអ្នកដទៃ ៖ ត្រូវចាំថា រាងកាយ និងបទពិសោធន៍នៃការពពោះរបស់មនុស្សម្នាក់ៗគឺខុសៗគ្នា។ ការប្រៀបធៀបមានតែធ្វើឱ្យអ្នកមានសម្ពាធផ្លូវចិត្តកាន់តែខ្លាំង។
កុំលាក់បាំងបញ្ហាជាមួយគ្រូពេទ្យ ៖ កុំភ័យខ្លាចក្នុងការប្រាប់គ្រូពេទ្យអំពីបញ្ហាផ្លូវចិត្តរបស់អ្នក។ ពួកគាត់គឺជាអ្នកជំនាញដែលរង់ចាំស្តាប់ និងជួយស្វែងរកដំណោះស្រាយដ៏ល្អបំផុតសម្រាប់អ្នក។
ជៀសវាងគ្រឿងស្រវឹង និងសារធាតុញៀន ៖ ដាច់ខាតកុំប្រើប្រាស់គ្រឿងស្រវឹងដើម្បីបំបាត់ភាពតានតឹង។ វាវានឹងធ្វើឱ្យសុខភាពផ្លូវចិត្តអ្នកកាន់តែដុនដាប ហើយបង្កផលប៉ះពាល់ធ្ងន់ធ្ងរដល់ការលូតលាស់ និងសុខភាពរបស់ទារកក្នុងផ្ទៃ។
សរុបមកវិញ ការមើលថែទាំផ្លូវចិត្តឱ្យបានល្អ នឹងនាំមកនូវភាពរីករាយក្នុងអំឡុងពេលប្រាំបួនខែដប់ថ្ងៃ និងជួយឱ្យបុត្រធីតារបស់អ្នកចាប់កំណើតមកប្រកបដោយសុខភាពល្អ៕
