ភ្នំពេញ – មជ្ឈមណ្ឌល​ផលិតកម្មឌីជីថល​កម្ពុជា-ជប៉ុន (CJDM) ដែលមានទីតាំងស្ថិត​នៅ​ក្នុងបរិវេណសាកលវិទ្យាល័យ​ភូមិន្ទភ្នំពេញ ត្រូវ​បានដាក់សម្ពោធ​ឱ្យ​ដំណើរ​ការ​កាលពីថ្ងៃទី២៤ ឧសភា ។ មជ្ឈមណ្ឌល​មួយ​នេះ នឹង​ត្រូវ​រំពឹងថា ជាកន្លែងបណ្តុះបណ្តាលធនធាន​មនុស្ស​ សម្រាប់​បម្រើ​ការងារ​ក្នុងវិស័យ​ឧស្សាហកម្ម៤.០ ដើម្បី​ការ​រីកចម្រើន​ខាង​វិទ្យាសាស្រ្ត និង​បច្ចេកទេស​របស់កម្ពុជា។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និង​កីឡា បានមានប្រសាសន៍ថា មជ្ឈមណ្ឌលផលិតកម្មឌីជីថលកម្ពុជា-ជប៉ុន (CJDM) ដើរតួនាទីសំខាន់ ក្នុងការជំរុញការអភិវឌ្ឍជំនាញវិជ្ជាជីវៈ និងធនធានមនុស្សក្នុងកម្រិតខ្ពស់ នៃឧស្សាហកម្មឌីជីថលនៅក្នុងប្រទេសកម្ពុជា។

ឯកឧត្តមរំលឹកថា នៅឆ្នាំ២០២២ ពេលដែលសម្តេចតេជោ ហ៊ុន សែន និងនាយករដ្ឋមន្ត្រីជប៉ុន លោក Fumio Kishida បានចុះហត្ថលេខារួមគ្នា លើសេចក្តីថ្លែងការណ៍រវាងព្រះរាជាណាចក្រកម្ពុជា និងជប៉ុន ដែល CJDM នៃសាកលវិទ្យាល័យភូមិន្ទភ្នំពេញ ដើរតួនាទីយ៉ាងសំខាន់ ក្នុងការជំរុញការអភិវឌ្ឍជំនាញវិជ្ជាជីវៈ និងធនធានមនុស្សក្នុងកម្រិតខ្ពស់ នៃឧស្សាហកម្មឌីជីថលនៅកម្ពុជា ដែលបំពេញតម្រូវការការងារ ក៏ដូចជាតម្រូវការការងារឧស្សាហកម្ម។

បើតាម​ប្រសាសន៍​របស់ ឯកឧត្តម ហង់ជួន ណារ៉ុន នៅក្នុងមជ្ឈមណ្ឌលផលិតកម្មឌីជីថលកម្ពុជា-ជប៉ុន មានបំពាក់ម៉ាស៊ីន CNC  (Computerized Numerical Control) ដែលជា «មេនៃម៉ាស៊ីនអនាគត» គឺជាសមាសធាតុសំខាន់នៃឧស្សាហកម្មឌីជីថល នៅក្នុងបដិវត្តន៍ឧស្សាហកម្ម ៤.០។ ហើយ​ជាមួយ​គ្នានេះ ឯកឧត្តម ក៏​បាន​ថ្លែង​អំណរគុណ​ចំពោះ​លោកបណ្ឌិត Masahiko MORI ប្រធានក្រុមហ៊ុន DMG MORI សម្រាប់កិច្ចសហប្រតិបត្តិការដ៏ល្អជាមួយសាកលវិទ្យាល័យភូមិន្ទភ្នំពេញ (RUPP) លើជំនួយបច្ចេកទេស និងការបណ្តុះបណ្តាលម៉ាស៊ីន CNC នៅ CJDM ។

លោក ឃឹម ចំរើន អ្នកសម្របសម្រួល នៃមជ្ឈមណ្ឌលកម្ពុជា-ជប៉ុន ឌីជីថល បានថ្លែងថា ម៉ាស៊ីន​សម្រាប់ផលិតម៉ាស៊ីន ឬត្រូវបានគេស្គាល់ជាទូទៅថា ម៉ាស៊ីន CNC (Computerized Numerical Control) ឬម៉ាស៊ីនក្រឡឹង គឺជាម៉ាស៊ីនដែលផលិតគ្រឿងបន្លាស់ឱ្យ​ម៉ាស៊ីនផ្សេងទៀត។ លោក​បាន​លើកឧទាហរណ៍ថា នៅពេល​យើងចង់ផលិតម៉ាស៊ីនមួយសម្រាប់ប្រើប្រាស់ យើងត្រូវការគ្រឿងបន្លាស់ច្រើន ហើយម៉ាស៊ីន CNC អាចក្រឡឹង ឬបង្កើតគ្រឿងបន្លាស់នោះ ដើម្បីយកទៅផ្សំបញ្ចូលគ្នាឱ្យ​ក្លាយជាគ្រោងឆ្អឹង បង្កើតបានជាម៉ាស៊ីនមួយទៀត។

គួរបញ្ជាក់ផងដែរថា មជ្ឈមណ្ឌល CJDM ត្រូវបានបង្កើតឡើងជាមួយនឹងការរំពឹងទុកដើម្បីក្លាយជាមជ្ឈមណ្ឌលបច្ចេកវិទ្យាសម្រាប់ ការផលិតឌីជីថលកម្រិតខ្ពស់នៅក្នុង តំបន់ដោយផ្អែកលើ R&D ជាមួយនឹងម៉ាស៊ីន CNC ទំនើបចុងក្រោយបំផុត និងអាចកាត់បន្ថយកាកសំណល់ បង្កើនផលិតភាព និងបង្កើនគុណភាពនៃផលិតផល ដែលមានម៉ាស៊ីនទំនើបៗចំនួន៣គ្រឿង មានសមត្ថភាពផលិតគ្រឿងបន្លាស់ និងគ្រឿងបង្គំគ្រប់ប្រភេទ និងគ្រប់ទំហំពីសមាសធាតុលោហធាតុផ្សេងៗ ដោយប្រើបច្ចេកវិទ្យាឌីជីថល៕Si