ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បើទោះបីជាទឹកជំនន់ក្នុងរយៈពេលថ្មីៗនេះ បានធូរស្រាលទៅវិញហើយក្តី ប៉ុន្តែក្រសួងអប់រំ នៅតែពិនិត្យតាមដានជាប្រចាំ ដើម្បីជៀសវាងគ្រោះថ្នាក់នានាដែលអាចកើតមានជាយថាហេតុដល់សិស្សានុសិស្ស ក៏ដូចជាបុគ្គលិកសិក្សា ខណៈរដូវភ្លៀងចូលមកដល់ ដែលធ្វើឱ្យទឹកនៅទន្លេ បឹងបួរ ចាប់ផ្តើមហក់ឡើងនោះ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ទាក់ទងនឹងបញ្ហាទឹកជំនន់ កន្លងមក ក្រសួងអប់រំ យុវជន និងកីឡា តែងតែតាមដាន ក៏ដូចជាធ្វើការជិតស្និទជាមួយមន្ទីរអប់រំ ក៏ដូចជានៅតាមសាលារៀន ក្នុងការផ្ដល់ព័ត៌មានជាប្រចាំអំពីស្ថានភាពសាលារៀន។ ក្នុងនោះ នៅខេត្តបាត់ដំបង ធ្លាប់មានសាលារៀនចំនួន៦ បានផ្អាកការសិក្សារយៈពេល១ទៅ២ថ្ងៃ ដោយសារទឹកជំនន់លិចសាលា។ ដើម្បីធ្វើយ៉ាងណាឱ្យសិស្សានុសិស្សមានសុវត្ថិភាព ជៀសវាងគ្រោះថ្នាក់នានា សាលាបានសម្រេចចិត្តផ្អាកដំណើរការសាលារៀនបណ្ដោះអាសន្ន ទើបបើកទ្វារឡើងវិញក្នុងរយៈពេល ២ទៅ៣ថ្ងៃក្រោយទឹកស្រកទៅវិញ។ បើតាមលោកជំទាវ មកដល់ពេលនេះ សាលារៀនទាំងកម្រិតបឋមសិក្សា និងមធ្យមសិក្សា ដំណើការធម្មតាវិញទាំងស្រុង។
ចំពោះវិធានការដោះស្រាយបញ្ហាទឹកជំនន់លិចសាលានេះ លោកជំទាវ ឃួន វិច្ឆិកា បញ្ជាក់ថា ក្រសួងអប់រំ ក៏បានបង្កើតក្រុមការងារ ដើម្បីផ្ដល់ព័ត៌មានមកក្រសួងវិញ ហើយសាលាត្រូវតាមដានស្ថានភាពជាក់ស្ដែង និងមានចំណាត់ការជាបន្ទាន់ក្នុងករណីចាំបាច់ណាមួយ ដោយជូនដំណឹង និងពិគ្រោះយោបល់ជាមួយមន្ទីរអប់រំ យុវជន និងកីឡា គ្រប់ខេត្តក្រុង និងការិយាល័យអប់រំស្រុកជាដើម។
ពាក់ព័ន្ធជាមួយសាលាដែលនឹងជ្រើសរើសធ្វើជាមណ្ឌលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅប៉ុន្មានខែខាងមុខនេះ បើតាមលោកជំទាវ ឃួន វិច្ឆិកា គឺស្ថិតក្នុងដំណាក់កាលដែលក្រសួងកំពុងពិនិត្យ និងវាយតម្លៃជ្រើសរើសសាលារៀន ហើយចំពោះការជ្រើសរើសនេះ ក្រសួងក៏មានការប្រុងប្រយ័ត្នដែរចំពោះទឹកជំនន់ ដោយជ្រើសរើសតែអគារប្រឡងដែលមានភាពបិទជិត និងមានសុវត្ថិភាពក្នុងដំណើរការប្រឡងប៉ុណ្ណោះ។
«យើងជឿជាក់ថា នៅក្នុងដំណើរការប្រឡងបាក់ឌុបនាពេលខាងមុខនេះ នឹងដំណើរការទៅយ៉ាងល្អដោយក្រសួងកំពុងប្រុងប្រយ័ត្នក្នុងការជ្រើសរើសមណ្ឌលប្រឡងនានាដោយមានការចុះពិនិត្យផ្ទាល់ពីភាគីពាក់ព័ន្ធ»
លោកស្រីបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា
គួរបញ្ជាក់ថា ជារៀងរាល់ឆ្នាំនៅរដូវវស្សា និងអំឡុងពេលទឹកជំនន់ គ្រឹះស្ថានសិក្សាភាគច្រើននៅតាមដងទន្លេ ជុំវិញបឹងទន្លេសាប និងទំនាបផ្សេងៗ តែងរងនូវការជន់លិច និងខូចខាតបរិស្ថាន ក៏ដូចជាហេដ្ឋារចនាសម្ព័ន្ធសម្ភារៈ និងឯកសារជាដើម។ យ៉ាងណាក៏ដោយ ជាវិធានការបង្ការ និងទប់ស្កាត់គ្រោះថ្នាក់ ក្រសួងអប់រំ យុវជន និងកីឡា តែងស្នើដល់ មន្ទីរអប់រំយុវជន និងកីឡា រាជធានីខេត្ត និងការរិយាល័យអប់រំ យុវជន និងកីឡានៃរដ្ឋបាល ក្រុង ស្រុក ខណ្ឌ ធ្វើការជិតស្និទ្ធជាមួយក្រសួងអប់រំ យុវជន និងកីឡា សម្រាប់ការព្យាករណ៍អាកាសធាតុ និងជូនដំណឹងទៅគ្រប់សាលារៀនពាក់ព័ន្ធ។ ពិនិត្យមើលកម្រិតហានិភ័យដែលនឹងអាចកើតមាន ដូចជា ស្ថានភាពផ្លូវ ខ្យល់ព្យុះ ជំនន់ទឹកភ្លៀង ឬស្ទឹង បឹង ទន្លេ ជាដើម៕
