ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ស្ថិតក្នុងដំណាក់កាលមួយ ដែលសមត្ថភាពឌីជីថលមានការវិវឌ្ឍយ៉ាងលឿនរហ័ស នោះចំណេះដឹងអំពីមូលដ្ឋានគ្រឹះឌីជីថល ឬអក្ខរកម្មឌីជីថល បានក្លាយជាចំណែកមួយជួយបង្កើនភាពងាយស្រួលក្នុងការរស់នៅ។ គិតត្រឹមសតវត្សរ៍ទី២១ ការប្រើប្រាស់បច្ចេកវិទ្យាប្រកបដោយប្រសិទ្ធភាព គឺជាតម្រូវការចាំបាច់ខ្លាំង ហើយគេនឹងឈប់លើកយកសំណួរថា គួរ ឬ មិនគួរប្រើបច្ចេកវិទ្យាទៀតហើយ! ជំនួសមកវិញ គេត្រូវរកឱ្យឃើញថា តើប្រើបច្ចេកវិទ្យាបែបណាទើបអាចកាត់បន្ថយហានិភ័យ និងបង្កើនប្រសិទ្ធភាព? ព្រោះបច្ចេកវិទ្យាបានបង្ខិតគោលដៅទៅកាន់អ្នកធ្វើការ និងអ្នកសិក្សាស្រាវជ្រាវ។
តាមរយៈគេហទំព័រ The Digital Skill Standard បានបង្ហាញអំពីមូលហេតុ ៣ ដែលចំណេះដឹងមូលដ្ឋានគ្រឹះឌីជីថល មានសារៈសំខាន់សម្រាប់ពេលបច្ចុប្បន្ន និងអនាគត។
១. មូលដ្ឋានគ្រឹះនៃឌីជីថល ជាគ្រឹះដ៏រឹងមាំសម្រាប់សតវត្សរ៍ទី២១ ៖ ពាក់ព័ន្ធនឹងជំនាញសតវត្សរ៍ទី២១ គេច្រើននិយាយជាទូទៅអំពីការគិតពិចារណា ការគិតបែបស៊ីជម្រៅ ការច្នៃប្រតិដ្ឋ កិច្ចសហការក្រុម និងការប្រាស្រ័យទាក់ទងគ្នា ហើយជំនាញទាំងនេះ ក៏ជាការនាំផ្លូវឱ្យចេះប្រើប្រាស់ឌីជីថលប្រកបដោយប្រសិទ្ធភាព ព្រោះជំនាញដែលបានរៀបរាប់នេះ គេអាចយកទៅវាយតម្លៃពីភាពជឿជាក់ទៅលើកម្មវិធីឌីជីថលណាមួយ។ បន្ថែមពីនោះ និយមន័យនៃអក្ខរកម្មឌីជីថលមានចម្រុះ និងមានជំនាញជាច្រើនដូចជា របៀបនៃការប្រើប្រាស់កុំព្យូទ័រជាមូលដ្ឋាន ការប្រើប្រាស់ឌីជីថលប្រកបដោយសុវត្ថិភាពនិងប្រសិទ្ធភាព រួមទាំងការមានសមត្ថភាពប្រើប្រាស់ឌីជីថលជួយដោះស្រាយបញ្ហាដែលជួបប្រទះ។
២. ឱកាសជោគជ័យក្នុងការសិក្សា ៖ គេអាចផ្លាស់ប្តូរបរិយាកាសសិក្សាបែបប្រពៃណី តាមរយៈការរួមបញ្ចូលពាក់ព័ន្ធនឹងបច្ចេកវិទ្យាទៅក្នុងកម្មវិធីសិក្សារបស់ប្រព័ន្ធអប់រំ។ នៅពេលដែលសិស្សមានភាពស្ទាត់ជំនាញផ្នែកឌីជីថល នោះសិស្សអាចប្រើប្រាស់បច្ចេកវិទ្យា ហើយក៏ជាឱកាសក្នុងការបង្កើនវិសាលភាពនៃការស្រូបយកបទពិសោធថ្មីៗ តាមរយៈការសិក្សាស្រាវជ្រាវ និងការអភិវឌ្ឍសមត្ថភាពក្នុងល្បឿនលឿន។
៣. ការត្រៀមខ្លួនជាធនធានស្របនឹងតម្រូវការការងារនាពេលអនាគត ៖ កន្លែងធ្វើការមួយចំនួន ពិសេសពាក់ព័ន្ធនឹងការប្រើប្រាស់ឌីជីថល តម្រូវឱ្យធនធាននៅទីនោះមានចំណេះដឹងមូលដ្ឋានគ្រឹះឌីជីថលក៏ពិតមែន ប៉ុន្តែនៅមិនទាន់គ្រប់គ្រាន់ទាំងស្រុងនោះទេ ក្រៅពីចំណេះដឹងមូលដ្ឋានគ្រឹះ គឺត្រូវមានភាពបត់បែនសម្របខ្លួនទៅនឹងបច្ចេកវិទ្យាថ្មីៗដែលកំពុងវិវឌ្ឍន៍ទៅមុខ។
គួរជម្រាបបន្ថែមថា អក្ខរកម្មឌីជីថលមិនមែនគ្រាន់តែជាជំនាញធម្មតាៗទេ ប៉ុន្តែគឺជាធាតុផ្សំដ៏សំខាន់នៃការបង្ខិតភាពជោគជ័យរបស់សិស្សក្នុងសតវត្សរ៍ចុងក្រោយ។ ដូច្នេះសាលារៀនគួរតែផ្តល់ អាទិភាពដល់ចំណេះដឹងពាក់ព័ន្ធនឹងអក្ខរកម្មឌីជីថល ដើម្បីជួយឱ្យសិស្សកាន់តែមានភាពសម្បូរបែបក្នុងការទទួលបានឱកាសត្រៀមខ្លួនជាធនធានស្របនឹងតម្រូវការ ការងារ នាពេលខាងមុខ៕
