ប្រសិនបើអ្នកជាម្ដាយដែលកំពុងបំបៅកូន អ្នកត្រូវដឹងថា អ្វីដែលអ្នកញ៉ាំនឹងកំណត់ បរិមាណ និងគុណភាពទឹកដោះរបស់អ្នក ។ លើសពីនេះ ជាទូទៅប្រភេទអាហារដែលត្រូវបានគេហៅថា ហ្គាឡាក់តាហ្គោក (galactagoges) ដែលមានដូចជា គ្រាប់អាល់ម៉ុន ដូង បន្លែបៃតង ម៉ឺមខ្ទឹម ខ្ញី និងគ្រាប់ធញ្ញជាតិជាច្រើនទៀត ត្រូវបានអ្នកជំនាញណែនាំឱ្យបរិភោគនៅអំឡុងពេលបំបៅកូន ព្រោះអាហារទាំងនេះ សុទ្ធសឹងតែជាអាហារជំរុញឱ្យរាងកាយរបស់ម្ដាយផលិតទឹកដោះបានកាន់តែច្រើន។  

សំណួរទូទៅដែលម្ដាយកំពុងបំបៅកូនតែងតែសួរនោះ គឺ តើខ្ញុំគួរញ៉ាំអ្វី ឬជៀសវាងញ៉ាំ ដើម្បីបង្កើនការផ្គត់ផ្គង់ម្ដាយ? ស្របជាមួយនឹងសំណួរនេះ ម្ដាយជនជាតិសិង្ហបុរី បានបង្ហាញពីគន្លឹះ និងបទពិសោធន៍របស់ខ្លួន ក្នុងការជំរុញការផលិតទឹកដោះនៅអំឡុងពេលបំបៅកូន។ យ៉ាងណាក៏ដោយ គន្លឹះនេះគ្រាន់តែជាបទពិសោធន៍របស់គាត់តែប៉ុណ្ណោះ។ ដើម្បីស្វែងយល់ឱ្យកាន់តែលម្អិត អ្នកអាចទៅពិគ្រោះជាមួយអ្នកផ្ដល់សេវាថែទាំសុខភាព ឬអ្នកប្រឹក្សាផ្នែកបំបៅដោះកូន មុនពេលផ្លាស់ប្ដូររបបអាហាររបស់អ្នក។

លោកស្រី ឌីឌី ឡាវ (Didi Lau) បានលើកឡើងថា អាហារសំខាន់ៗដែលពួកគាត់បរិភោគមានដូចជា ទឹករហូតដល់ប្រាំលីត្រក្នុងមួយថ្ងៃ (ដោយសារស្រេកមិនឈប់) មានទឹកសម្លរាល់ពេលញ៉ាំបាយ។ ក្រៅពីនេះមាន ត្រីសាលម៉ុន សាច់គោ ស្រូវសាលី (oats) និងឡេស៊ីទីន (Lecithin), គាត់បរិភោគអាហារទាំងនេះ ព្រោះវាអាចការពារបញ្ហាស្ទះទឹកដោះ។

គាត់បន្ថែមថា «ការមានរបបអាហារត្រឹមត្រូវ គឺជួយទាំងបរិមាណ និងគុណភាពនៃទឹកដោះខ្ញុំ។ ដូច្នេះ ត្រូវញ៉ាំអាហារឱ្យបានត្រឹមត្រូវ ព្រោះរាងកាយរបស់យើងត្រូវការថាមពល ដើម្បីមើលថែទារកដែលទើបនឹងកើត និងមើលថែខ្លួនឯង។»

អ្នកម្ដាយរូបនេះបន្តថា ទារកដែលទទួលបានការបំបៅដិតដល់គឺល្អបំផុត មិនថាជាទឹកដោះម្ដាយ ឬទឹកដោះគោនោះទេ។ លើសពីនេះ ក្នុងនាមជាម្ដាយមិនគួរមានអារម្មណ៍មិនគប្បី ឬបន្ទោសខ្លួនឯងនោះទេ ប្រសិនបើការផលិតទឹកដោះមិនអាចផ្គត់ផ្គង់តម្រូវការរបស់កូន ព្រោះលោកស្រីក៏បានឆ្លងកាត់រឿងនេះដែរ។ អ្វីដែលម្ដាយគ្រប់រូបត្រូវចងចាំនោះ គឺ ភាពតានតឹង គឺជាកត្តាដ៏ធំបំផុត ដែលបណ្ដាលឱ្យមានការកាត់បន្ថយការផលិតទឹកដោះ៕