ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឪពុកម្ដាយមិនគួរទិញស្មាតហ្វូនសម្រាប់កុមារអាយុក្រោម ១១ឆ្នាំប្រើនោះទេ, នេះបើតាមការណែនាំរបស់ក្រុមហ៊ុនផ្ដល់បណ្ដាញទូរស័ព្ទចល័តដ៏ធំមួយរបស់អង់គ្លេស EE ។
ក្រុមហ៊ុននេះ បានផ្ដល់អនុសាសន៍ថា កុមារថ្នាក់បឋមសិក្សាមិនគួរទទួលបានសិទ្ធិប្រើស្មាតហ្វូន ដែលអាចចូលដំណើរការអ៊ីនធឺណិត និងគេហទំព័រប្រព័ន្ធផ្សព្វផ្សាយសង្គមនោះឡើយ។ ការណែនាំនេះ ធ្វើឡើង បន្ទាប់ពីម្ដាយឪពុកជាច្រើន បានបង្ហាញក្ដីបារម្ភអំពីហានិភ័យនៃកុមារប្រើប្រាស់ប្រព័ន្ធផ្សព្វផ្សាយសង្គម។
ក្រុមហ៊ុនបានលើកឡើងក្នុងសេចក្ដីថ្លែងការណ៍លើបណ្ដាញអ៊ីនធឺណិតថា គំនិតផ្តួចផ្ដើមនេះកើតឡើង ដើម្បីឆ្លើយតបទៅនឹងការព្រួយបារម្ភកាន់តែខ្លាំងឡើងរបស់ម្ដាយឪពុក អំពីពេលវេលាដែលកុមារចំណាយជាមួយអេក្រង់ សុវត្ថិភាពអនឡាញ និងឥទ្ធិពលនៃឧបករណ៍ឌីជីថលលើសុខុមាលភាពកុមារ។
EE បានណែនាំឱ្យឪពុកម្ដាយ ផ្ដល់ឧបករណ៍ឌីជីថល ដែលមានការកំណត់មុខងារច្បាស់លាស់ សម្រាប់កូនៗរបស់ខ្លួន ដោយអនុញ្ញាតសម្រាប់តែការផ្ញើសារ និងហៅទូរសព្ទប៉ុណ្ណោះ។ លើសពីនេះ ក្រុមហ៊ុន ក៏តម្រូវឱ្យមានការគ្រប់គ្រងពីសំណាក់ឪពុកម្ដាយផងដែរ សម្រាប់ក្មេងជំទង់អាយុក្រោម ១៦ឆ្នាំ និងគ្រប់គ្រងមាតិកាលើប្រព័ន្ធផ្សព្វផ្សាយសង្គម សម្រាប់កុមារអាយុក្រោម ១៣ឆ្នាំ។
ការសិក្សានាពេលថ្មីៗនេះ ដោយនិយតករទំនាក់ទំនងចក្រភពអង់គ្លេស បានរកឃើញថា ប្រហែល ២៥ភាគរយ នៃកុមារអង់គ្លេស ដែលមានអាយុចាប់ពី ៥ ទៅ៧ឆ្នាំ មានស្មាតហ្វូនប្រើ។ ទន្ទឹងនឹងទិន្នន័យដែលបានបង្ហាញនេះ ឪពុកម្តាយអង់គ្លេស កាន់តែច្រើន ជ្រើសរើសការមិនផ្ដល់ឱ្យកូនរបស់ខ្លួនប្រើប្រាស់ស្មាតហ្វូន អំឡុងពេលកុមារមានអាយុក្រោម ១១ឆ្នាំ។ ខណៈការប្រើប្រាស់ស្មាតហ្វូន អនុញ្ញាតតែសម្រាប់ការសិក្សាក្នុងថ្នាក់រៀនប៉ុណ្ណោះ ការមិនឱ្យកូនប្រើទូរស័ព្ទ ព្រោះអាណាព្យាបាលបារម្ភថា កុមារអាចនឹងញៀនអ៊ីនធឺណិត រងការគំរាមកំហែងតាមអ៊ីនធឺណិត ទទួលរងសម្ពាធសង្គម និងទទួលយកខ្លឹមសារមាតិកាគ្រោះថ្នាក់ផ្សេងៗ។
សេចក្ដីណែនាំនេះ ក៏បានរំពឹងផងដែរថា មាតាបិតាត្រូវតែបំពេញកាតព្វកិច្ចរបស់ខ្លួន ក្នុងការបង្រៀនកូនៗអំពីរបៀបប្រើប្រាស់ស្មាតហ្វូន ប្រកបដោយទំនួលខុសត្រូវ ដោយកំណត់គោលការណ៍ប្រើប្រាស់អ៊ីនធឺណិតឱ្យបានច្បាស់លាស់ តាមដានសកម្មភាពប្រើប្រាស់អ៊ីនធឺណិតរបស់កុមារ គ្រប់គ្រងមាតិកាឱ្យបានត្រឹមត្រូវ និងលើកទឹកចិត្តឱ្យកុមារ ពិចារណាឱ្យបានល្អិតល្អន់ និងមានការប្រុងប្រយ័ត្នខ្ពស់មុនចែករំលែកទិន្នន័យ ឬព័ត៌មានផ្ទាល់ខ្លួននៅលើអ៊ីនធឺណិត៕
