កម្មវិធីអាហារូបករណ៍ជប៉ុន JDS ក្រោម​ជំនួយ​របស់​រដ្ឋាភិបាល​សម្រាប់​ការ​អភិវឌ្ឍធន​ធាន​មនុស្ស​នៅ​កម្ពុជា នឹងទទួល​បណ្តុះបណ្តាលនិស្សិត (ជាមន្រ្តីរាជការ) ដោយ​ផ្តល់​អាហារូបករណ៍​ថ្នាក់បរិញ្ញាបត្រ​ជាន់ខ្ពស់ (Master Degree) រយៈពេល​ ២ឆ្នាំ ចំនួន២៤នាក់ និង​ថ្នាក់បណ្ឌិត (Ph.D Degree) រយៈពេល ៣ឆ្នាំ ចំនួន២នាក់ ទៅ​សិក្សា​នៅ​ប្រទេស​ជប៉ុន ក្នុងឆ្នាំ​២០២៥។

មធ្យោបាយ​ធ្វើដំណើរទៅមក ប្រទេស​កម្ពុជា/ជប៉ុន/កម្ពុជា ថ្លៃសិក្សា និង​ប្រាក់អាហារូបករណ៍ ជាបន្ទុក​របស់​រដ្ឋាភិបាល​ជប៉ុន។

លក្ខខណ្ឌនៃការជ្រើសរើស​សម្រាប់ថ្នាក់​បរិញ្ញាបត្រជាន់ខ្ពស់ ៖ ត្រូវមានសញ្ជាតិខ្មែរ, មានសញ្ញាបត្របរិញ្ញាបត្រ, មានអាយុចន្លោះពី២២ ទៅ​៣៩ឆ្នាំ គិតដល់ថ្ងៃទី១ ខែមេសា ឆ្នាំ២០២៥, មានចំណេះដឹង​ភាសាអង់គ្លេស​គ្រប់គ្រាន់ (ការ​សិក្សា​ភាសាអង់គ្លេស​ជាយាន), មានបទពិសោធន៍​ការងារ​យ៉ាង​តិច២ឆ្នាំ ជាបុគ្គលិក​រដ្ឋ​ដែលធ្វើការ​ពេញម៉ោង​តាម​ស្ថាប័ន​ពាក់ព័ន្ធ (ចំពោះបុគ្គលិក​ជាប់កិច្ចសន្យា​មិន​ត្រូវ​បានអនុញ្ញាត​ទេ), មានសុខភាពល្អបរិបូណ៌ទាំងកាយសម្បទា និងសតិបញ្ញា។

លក្ខខណ្ឌជ្រើសរើស​សម្រាប់ថ្នាក់បណ្ឌិត ៖ មានសញ្ជាតិខ្មែរ, មន្រ្តីដែលបញ្ចប់ការ​សិក្សាថ្នាក់បរិញ្ញាបត្រជាន់ខ្ពស់​ក្រោម​កម្មវិធី​អាហារូបករណ៍ JDS, មានអាយុក្រោម ៤៥ឆ្នាំ គិត​ដល់ថ្ងៃទី១ ខែមេសា ឆ្នាំ២០២៥, ត្រូវ​មានអត្ថបទ​ត្រួតពិនិត្យ​រួមគ្នា យ៉ាងហោចណាស់មួយអត្ថបទ ដែលត្រូវ​បានបោះពុម្ពផ្សាយ​នៅ​ក្នុង​ទស្សនាវដ្តី​វិទ្យាសាស្រ្ត​ដែលទទួលស្គាល់ជាអន្តរជាតិ ឬ​មានផែនការ​ច្បាស់លាស់​ក្នុងការ​បោះពុម្ពផ្សាយក្នុងកំឡុងពេលដាក់ពាក្យ (ការ​វាយតម្លៃពីសាស្រ្តាចារ្យដឹកនាំ នឹង​តម្រូវ​ឱ្យ​មានជាចាំបាច់​ក្នុងលិខិត​ណែនាំ), មានសុខភាព​ល្អបរិបូរណ៌​ទាំងកាយសម្បទា និងសតិបញ្ញា។

មុខជំនាញទៅសិក្សា (សម្រាប់ពីរកម្រិត) ៖ 1. Infrastructure Development, 2. Private Sector Development, 3. Improvement of Education Quality≤ 4. Agriculture and Rural Development, 5. Improvement of Urban Living Environment, 6. Improvement of Healthcare and Social Security System, 7. Improvement of Administrative Functions, 8. Legal and Judicial Development, 9. Building of International Relations។

កាលបរិច្ឆេទ និង​ទីកន្លែងទទួលពាក្យ ៖ បេក្ខជន​ដែលមានបំណងដាក់ពាក្យ​កម្មវិធីអាហារូបករណ៍នេះ សូម​បំពេញ​សំណុំ​ឯកសារ​ផ្សេងៗ និង​ផ្ញើមក​កាន់ការិយាល័យ JICE-JDS ដែល​មានអាសយដ្ឋាន ៖ អគារ AURA Condominium ជាន់ទី៣ ផ្ទះលេខ៨៧ ផ្លូវលេខ​៦៣ សង្កាត់បឹងរាំង ខណ្ឌដូនពេញ រាជធានីភ្នំពេញ (វិថីព្រះត្រសក់ផ្អែម) ចាប់ពីថ្ងៃទី១៩ ខែកញ្ញា ឆ្នាំ​២០២៤ រហូត​ដល់ថ្ងៃទី១៩ ខែវិច្ឆិកា ឆ្នាំ២០២៤ ត្រឹម​ម៉ោង ១៥:០០នាទី ពេល​រសៀល។ សេចក្តីណែនាំអំពីការ​ដាក់ពាក្យ និង​ពាក្យ​សុំអាហារូបករណ៍ អាច​ទាញ​យកបាន​តាមគេហទំព័រ JDS តាមរយៈអាសយដ្ឋាន http://jds-scholarship.org ៕