ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានប្រកាសពីការដាក់ឱ្យសាកល្បងម៉ោងបន្ថែមចំនួន២ម៉ោង នៅថ្នាក់បឋមសិក្សា ដើម្បីជាការពង្រឹងមូលដ្ឋានអប់រំ។
ក្នុងឱកាសអញ្ជើញជាអធិបតី សម្ពោធបើកឱ្យប្រើប្រាស់ជាផ្លូវការ «កំពង់ផែពហុបំណងកំពត» នាព្រឹកថ្ងៃទី៦ មិថុនា សម្តេចធិបតីមានប្រសាសន៍ថា ការពង្រឹងមូលដ្ឋានអប់រំ គឺនឹងផ្តើមពីថ្នាក់បឋមសិក្សា រហូតទៅដល់ថ្នាក់ទី១២ ។ ការពង្រឹងមូលដ្ឋានអប់រំនេះ បើតាមសម្តេចធិបតី សិស្សនឹងត្រូវបានពង្រឹងទៅលើឥរិយាបទ ក៏ដូចជាការអប់រំផ្សេងៗ ។
សម្តេចធិបតីក៏បានឱ្យដឹងដែរថា ការសាកល្បងបន្ថែមម៉ោងសិក្សានៅសាលាបឋមសិក្សារដ្ឋនេះ ឃើញថា មានការគាំទ្រពីសំណាក់ឪពុកម្តាយអ្នកអាណាព្យាបាលសិស្ស ដោយការបន្ថែម២ម៉ោងនេះ អាចចាត់ទុកថាជាម៉ោងបន្ថែម ដើម្បីឱ្យសិស្សកាន់តែរឹងមាំ។
អញ្ចឹងជាជាងក្មេងថ្នាក់បឋមទៅផ្ទះ សល់ពេលច្រើន អត់ធ្វើអ្វី… អ្នកដែលគ្មានលទ្ធភាពរៀនគួរ ឥឡូវថែម២ម៉ោងនេះ ចាត់ទុកជាម៉ោងបំប៉នបន្ថែម ដើម្បីឱ្យសិស្សយើងកាន់តែរឹងមាំ…
សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា
បើតាមប្រសាសន៍សម្តេចធិបតី ការរៀបចំថែមម៉ោងសិក្សានេះ សម្តេចបានប្រកាសបង្កើតគណៈកម្មការពង្រឹងវិស័យអប់រំ ដែលមាន ឯកឧត្តម ហង់ជួន ណារ៉ុន ជាអនុប្រធានប្រចាំការ ព្រមទាំងមានលេខាធិការដ្ឋានមួយនៅក្នុងនោះ ក្នុងការចុះអនុវត្ត ។ ដោយឡែកលោកគ្រូអ្នកគ្រូដែលចូលរួមអនុវត្ត ឬបង្រៀនសិស្សនៅម៉ោងបន្ថែមនេះ ក៏នឹងទទួលបានប្រាក់លើកទឹកចិត្តផងដែរ។
គួររំលឹកដែរថា ក្នុងពិធីបិទសន្និបាទប្រចាំឆ្នាំ២០២២-២០២៣ របស់ក្រសួងអប់រំ យុវជន និងកីឡា កាលពីដើមខែមេសា សម្តេចធិបតី ហ៊ុន ម៉ាណែត មានប្រសាសន៍ថា កម្ពុជានឹងអនុវត្តផែនការដំណាក់កាលដំបូងសម្រាប់កម្រិតបឋមសិក្សាចំនួន៥០សាលា ដោយបន្ថែមម៉ោងសិក្សាចំនួន២ម៉ោងបន្ថែម សម្រាប់ការបង្រៀន និងរៀនពេញមួយថ្ងៃ។ សម្តេចថា គោលបំណងនៃការរៀបចំសកម្មភាពសិក្សាបន្ថែមនេះ គឺមានគោលដៅកាត់បន្ថយម៉ោងទំនេរ និងប្រែក្លាយម៉ោងទំនេររបស់យុវជន និងកុមារដែលអាចយកទៅធ្វើសម្មភាពអសកម្មមួយចំនួននោះឱ្យក្លាយទៅជាម៉ោងសម្រាប់អភិវឌ្ឍសមត្ថភាពរបស់ខ្លួន, ដើម្បីលើកកម្ពស់ និងបង្កើនឱកាសការសិក្សាវែងឆ្ងាយ ស្របតាមការស្ទង់មតិនេះតាមការចង់បានរបស់ពលរដ្ឋដែលអាចផ្តល់ពេលវេលាដល់អាណាព្យាបាលមានពេលគ្រប់គ្រាន់ក្នុងការប្រកបរបរចិញ្ចឹមជិវិតហើយកុមារមិនសូវមានពេលទំនេរច្រើន៕
