ឪពុកម្ដាយដើរតួនាទីយ៉ាងសំខាន់ ក្នុងការជួយអភិវឌ្ឍជំនាញគ្រប់គ្រងអារម្មណ៍របស់កុមារ។ ដំណើរការនេះត្រូវបានគេស្គាល់ជាភាសាអង់គ្លេសថា Parent Socialization of Emotion (PSE) ដែលនេះ គឺជាភាពចាំបាច់ ដើម្បីពង្រឹងសមត្ថភាពកុមារឱ្យយល់ ចេះកំណត់ និងគ្រប់គ្រងអារម្មណ៍បានល្អ។

PSE គឺជាដំណើរការ ដែលឪពុកម្ដាយ ប្រាស្រ័យទាក់ទងជាមួយកូន ដោយបង្ហាញអំពីគុណតម្លៃនៃផ្លូវចិត្ត និងអាកប្បកិរិយា តាមរយៈការបង្រៀនកុមារឱ្យយល់ និងគ្រប់គ្រងអារម្មណ៍ខ្លួនឯង និងបង្ហាញភាពជាគម្រូ តាមការឆ្លើយតប ដែលសមស្រប នៅពេលប្រឈមមុខនឹងបញ្ហាអ្វីមួយ។ ការណែនាំនេះ អាចកើតឡើង ដោយប្រយោល តាមរយៈការបង្កើតបរិយាកាសវិជ្ជមានក្នុងគ្រួសារ និងមានឥទ្ធិពលដោយផ្ទាល់ តាមរយៈការអនុវត្តជាក់ស្ដែងរបស់ឪពុកម្ដាយ។

បើតាម Psychology Today បានបង្ហាញពី វិធីសាស្ត្រ ដែលអាណាព្យាបាល អាចឆ្លើយតបទៅនឹងកូនតូចរបស់ខ្លួនបានល្អបំផុត ដើម្បីបង្ហាញពីការគាំទ្រ និងជំរុញការអភិវឌ្ឍផ្លូវចិត្តកុមារ។ សកម្មភាពទាំងនោះ រួមមានដូចជា ជួយកូនរបស់អ្នកដោះស្រាយបញ្ហា នៅពេលពួកគេមានបញ្ហា, បង្រៀនពួកគេឱ្យទទួលស្គាល់ និងកំណត់ពីប្រភេទអារម្មណ៍ខ្លួនឯង, លើកទឹកចិត្តឱ្យពួកគេបញ្ចេញមតិ ហើយឪពុកម្ដាយត្រូវធ្វើជាអ្នកស្ដាប់ដ៏ល្អ, បណ្ដុះផ្នត់គំនិតឱ្យពួកគេយល់ថា ការដោះស្រាយបញ្ហា ប្រៀបដូចជាការលេងហ្គេមដែរ នៅពេលដែលពួកគេដោះស្រាយបញ្ហាជោគជ័យ ពួកគេនឹងកាន់តែសប្បាយចិត្ត, បង្កើតច្បាប់ទម្លាប់ និងដែនកំណត់ ប្រសិនបើកុមារ មានអាកប្បកិរិយាឆ្គាំឆ្គង និងចាកឆ្ងាយពីដែនកំណត់ ត្រូវដាក់ពិន័យ និងបើកសិទ្ធិឱ្យកុមារ បង្ហាញអារម្មណ៍អវិជ្ជមានរបស់គេ។

ការប្រើវិធីសាស្ត្រ និងគម្រូចិញ្ចឹមអប់រំ ប្លែកទាំងនេះ អាចជួយកុមារអភិវឌ្ឍសមត្ថភាពស្វែងយល់ពីអារម្មណ៍បានឆាប់រហ័ស ហើយជួយឱ្យកុមារ អាចគ្រប់គ្រងអារម្មណ៍ខ្លួនឯងបានល្អ និងមានវិន័យខ្ពស់។

អាណាព្យាបាល ដែលបង្ហាញពីអារម្មណ៍វិជ្ជមានកម្រិតខ្ពស់ នឹងបង្កើតបរិយាកាសវិជ្ជមាននៅក្នុងគ្រួសារ ហើយការអនុវត្តវិធីសាស្ត្រប្លែកៗ ដូចដែលបានបង្ហាញខាងលើ នឹងជួយឱ្យកុមារ មានសមត្ថភាពបត់បែន និងសម្របខ្លួនទៅនឹងស្ថានការណ៍ផ្សេងៗបានល្អ៕