ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – នៅក្នុងពិធីប្រគល់សញ្ញាបត្រដល់និស្សិត នៃវិទ្យាស្ថានវ៉ាន់ដា នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី២២ ខែមីនា ឆ្នាំ២០២៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានលើកទឹកចិត្តដល់និស្សិត ក៏ដូចជាយុវជនទាំងអស់បន្តការខិតខំរៀនសូត្រដើម្បីលើកកម្ពស់សមត្ថភាពរបស់ខ្លួន ដើរឱ្យទាន់សភាពការណ៍។
ក្នុងឱកាសនោះដែរ សម្តេចតេជោក៏បានកោតសរសើរទៅដល់និស្សិត ប្រជាជន យុវជន យុវនារីរបស់កម្ពុជា ដែលស្រវាស្រទេញចំពោះការសិក្សា ហើយថា ការសម្រេចចិត្តរបស់សម្តេចក្នុងការផ្តល់ឱកាសឱ្យវិស័យឯកជនចូលរួមវិនិយោគលើវិស័យអប់រំ ចាប់ផ្តើមពីថ្នាក់បឋម រហូតដល់ឧត្តមសិក្សា គឺជារឿងត្រឹមត្រូវក្នុងការបើកឱកាសសម្រាប់និស្សិតយើង។
បើតាមប្រសាសន៍របស់សម្តេចតេជោនាយករដ្ឋមន្រ្តី នៅពេលខាងមុខនេះ នឹងមានគ្រឹះស្ថានឧត្ដមសិក្សាបរទេសមួយចំនួនទៀត មកបើកដំណើការនៅកម្ពុជា ដែលនេះនឹងផ្ដល់ឱកាសឱ្យកូនខ្មែរយើងបានសិក្សានៅក្នុងប្រទេសដោយមិនចាំបាច់ទៅសិក្សានៅបរទេសដែលមានការចំណាយច្រើននោះទេ។
“ដែលហៅថារៀន គឺរៀនអត់ចប់ទេ រៀនពេញមួយជីវិត ហើយខ្ញុំក៏សូមផ្តាំផ្ញើជាមួយនិស្សិតទាំងអស់បន្តការខិតខំដើម្បីលើកកម្ពស់សមត្ថភាពរបស់ខ្លួនជាបន្តទៀត មិនអាចត្រឹមប៉ុណ្ណឹងចប់ទេ ត្រូវលើកកម្ពស់សមត្ថភាពរបស់យើងជាប្រចាំទើបដើរទាន់សភាពការណ៍…”
ជាមួយគ្នានេះសម្ដេចតេជោ ហ៊ុន សែន ក៏បានបញ្ជាក់ដែរថា កុំធ្វើជាអ្នកខ្លាំងក្នុងចំណោមអ្នកខ្សោយ ដោយត្រូវធ្វើជាអ្នកខ្លាំងក្នុងចំណោមអ្នកខ្លាំង ស្របពេលដែលសម័យនេះ គឺជាសម័យកាលប្រកួតប្រជែង មិនមែនជាសម័យកាលផ្ដួលរំលំដៃគូនោះទេ៕
