ភាពតានតឹងនៅកន្លែងធ្វើការ គឺជារឿងដែលអាចកើតឡើងគ្រប់ពេល ប៉ុន្តែតាមរយៈការប្រើជំនាញដោះស្រាយបញ្ហា (Problem solving) អ្នកអាចគ្រប់គ្រងបញ្ហានេះ បានល្អជាងមុន។ សាកស្រមៃថា ភាពតានតឹង គឺជាល្បែងផ្គុំរូបដ៏ស្មុគស្មាញ ហើយបំណែកនីមួយៗតំណាងឱ្យបញ្ហាប្រឈម ដែលរួមចំណែកកម្រិតនៃភាពតានតឺងរបស់អ្នក។ តាមរយៈការកំណត់អត្តសញ្ញាណបំណែកទាំងនេះ និងរបៀបរៀបរូបផ្គុំបានច្បាស់ ធ្វើឱ្យអ្នកអាចកាត់បន្ថយអារម្មណ៍តានតឹងរបស់អ្នកបាន។ មានវិធីសាស្ត្រចំនួន ៦ ដែលអាចជួយអ្នកគ្រប់គ្រងភាពតានតឹងនៅកន្លែងធ្វើការបាន តាមរយៈការប្រើជំនាញដោះស្រាយបញ្ហា។

១. កំណត់អត្តសញ្ញាណភាពតានតឹង ៖ ចំណុចដំបូង គឺត្រូវចាប់ផ្ដើមដោយកំណត់ប្រភព ដែលនាំឱ្យអ្នកមានភាពតានតឹង។ ប្រភពនៃបញ្ហាទាំងនោះអាចជា ថ្ងៃកំណត់នៃការងារបានមកដល់ ក្រុមការងារពិបាកធ្វើការជាមួយ ឬបន្ទុកការងារលើសលប់។ ការកំណត់បានច្បាស់នូវមូលហេតុដែលបណ្ដាលឱ្យអ្នកមានអារម្មណ៍តានតឹង អ្នកនឹងអាចបង្កើតផែនការ ដើម្បីដោះស្រាយឬសគល់ នៃបញ្ហាទាំងនោះបាន។

២. វិភាគមូលហេតុ ៖ បន្ទាប់ពីកំណត់អត្តសញ្ញាណភាពតានតឹង ជំហានបន្ទាប់គឺស្វែងយល់ថា ហេតុអ្វីបានជាបញ្ហាទាំងនោះមានឥទ្ធិពលមកលើអ្នក ។ ការស្វែងយល់ពីមូលហេតុដើម នៃភាពតានតឹង អាចជួយអ្នកបង្កើតយុទ្ធសាស្ត្រ ដ៏មានប្រសិទ្ធភាព ដើម្បីគ្រប់គ្រងវា។

៣. បង្កើតដំណោះស្រាយ ៖ ដំណាក់កាលទី៣ គឺជាពេល ដែលត្រូវគិតប្រកបដោយភាពច្នៃប្រឌិត ដើម្បីបង្កើតដំណោះស្រាយ ដែលមានសក្តានុពល។ ប្រសិន ថ្ងៃកំណត់នៃការងារបានមកដល់ គឺជាបញ្ហា តើការគ្រប់គ្រងពេលវេលាបានល្អជាងមុន និងការរំលែកការងារឱ្យអ្នកដទៃ អាចជាជម្រើសល្អដែរឬទេ? ចុះបើបញ្ហានោះ បណ្ដាលមកពីមិត្តរួមការងារ តើការសន្ទនា ឬសម្រុះសម្រួលគ្នា អាចជាជម្រើសល្អដែរឬទេ? ដំណាក់កាលនេះ អ្នកត្រូវបំបែកគំនិត និងពិចារណា អំពីជ្រុង ដែលអ្នកអាចបង្កើតដំណោះស្រាយ ហើយជ្រើសរើសជ្រុង ឬគំនិតណាមួយ ដែលល្អបំផុត ដើម្បីអនុវត្ត។

៤. ធ្វើសកម្មភាព ៖ ក្រោយពីមានដំណោះស្រាយក្នុងដៃ ជំហានបន្ទាប់គឺត្រូវធ្វើសកម្មភាព។ អនុវត្តយុទ្ធសាស្ត្រ ដែលមានក្នុងដៃ ដើម្បីដោះស្រាយភាពតានតឹងកំពុងប្រឈម គឺជាដំណើរការ នៃការសាកល្បង ឬសិក្សា។ ដូច្នេះ ប្រសិនបើមិនអាចដោះស្រាយបានជោគជ័យទាំងស្រុង ឬ ១០០ភាគរយ ក៏មិនមែនជាបញ្ហាដែរ។ អ្វីដែលសំខាន់ ត្រូវមានសកម្មភាពខ្ជាប់ខ្ជួន លើការអនុវត្ត ព្រោះនៅពេលដែលមានសកម្មភាព អ្នកនឹងអាចកាត់បន្ថយភាពតានតឹងបាន។

៥. វាយតម្លៃលទ្ធផល ៖ បន្ទាប់ពីធ្វើសកម្មភាពហើយ ការឆ្លុះបញ្ចាំង និងសិក្សាអំពីយុទ្ធសាស្ត្រ ដែលអ្នកបានអនុវត្ត គឺជារឿងសំខាន់។ អ្វី​ដែល​អ្នកត្រូវសួរខ្លួនឯងគឺ តើដំណោះស្រាយរបស់អ្នកមានប្រសិទ្ធភាពដែរ ឬទេ? តើមានសកម្មភាព អ្វីខ្លះដែលត្រូវកែប្រែ? ការវាយតម្លៃនេះ មានសារៈសំខាន់សម្រាប់ការគ្រប់គ្រងភាពតានតឹងរយៈពេលវែង។ ការសិក្សា និងឆ្លុះបញ្ចាំងពីលទ្ធផលជាប្រចាំ អាចជួយឱ្យអ្នកអាចរកឃើញដំណោះស្រាយដែលមានប្រសិទ្ធភាពបំផុត ដើម្បីគ្រប់គ្រងភាពតានតឹងនៅកន្លែងធ្វើការ៕