ការថែទាំខ្លួនឯង ជាប្រធានបទដែលពេញនិយមមួយ ប៉ុន្តែតើវាមានន័យយ៉ាងណា? ក្រៅពីការជ្រើសរើសអាហារដែលផ្តល់នូវជីវជាតិ ការហាត់ប្រាណបានទៀងទាត់ និងការសម្រាកឱ្យបានគ្រប់គ្រាន់ គឺនៅមានចំណុចជាច្រើនទៀតដែលត្រូវបន្តអនុវត្តន៍។ តាមរយៈ TiffyTaffy បានឱ្យដឹងថា ការថែទាំខ្លួនឯង គឺជាការកែច្នៃវិធីសាស្រ្តពីភាពមមាញឹកទៅជាផែនការអនុវត្តន៍ជាក់ស្តែង ដើម្បីសម្រេចសកម្មភាពនីមួយៗ ដោយមានលម្អិតជូននៅខាងក្រោម ៖

១. ដាក់កាលវិភាគឱ្យហ្មតចត់ដើម្បីធ្វើសកម្មភាពដែលខ្លួនស្រឡាញ់ ៖ យ៉ាងហោចណាស់ប្រើពេលមួយអាទិត្យម្តង ក្នុងការបែងចែកពេលវេលាទៅធ្វើសកម្មភាពដែលខ្លួនចូលចិត្ត ហើយត្រូវប្តេជ្ញាធ្វើវាឱ្យបាន ព្រោះសកម្មភាពមួយនេះ វានឹងរំលឹកអំពីគុណតម្លៃខ្លួនឯង រួមទាំងការផ្លាស់ប្តូររបៀបរស់នៅមួយដែលល្អ។

២. សមាធិរៀងរាល់ព្រឹក ៖ ក្រោកពីគេងភ្លាម សកម្មភាពមួយដែលគួរធ្វើមុនពេលចាប់ទាញយកទូរស័ព្ទមកអូសចុះឡើង ឬការទទួលទានអាហារពេលព្រឹក គឺការធ្វើសមាធិយ៉ាងហោចណាស់១០នាទីម្តង។

៣. ដោះស្រាយនឹងភាពអវិជ្ជមាន ៖ សម្លេងអវិជ្ជមានដែលកើតមកពីខាងក្នុងខ្លួនហើយប្រាប់យើងថា នឹងមិនអាចសម្រេចកិច្ចការអ្វីបានទេ មិនថាពាក់ព័ន្ធនឹងការពង្រឹងកាយសម្បទា។ ដូច្នេះ ការជឿជាក់លើខ្លួនឯងដើម្បីផ្លាស់ប្តូរផ្នត់គំនិតទាំងនោះ គឺជាចំណុចចាប់ផ្តើម នៃការទប់ទល់នឹងភាពអវិជ្ជមានទាំងនោះ។

៤. ការរំលឹកខ្លួនឯង ៖ រំលឹកខ្លួនឯង គឺអាចធ្វើតាមរយៈ ការកំណត់សកម្មភាពក្នុងទូរស័ព្ទដៃ រួចដាក់ម៉ោងរោទ៍ទៅតាមសកម្មភាពនីមួយៗ ឬក៏ប្រើប្រាស់ពេលត្រឹមតែ៥នាទី ក្នុងការដាក់សំណួរទៅកាន់ខ្លួនឯងថា តើឥឡូវនេះខ្ញុំត្រូវការអ្វី?

៥. សរសើរខ្លួនឯងរាល់ថ្ងៃ ៖ និយាយអបអរសាទរ ទៅកាន់ខ្លួនឯងនៅពេលបញ្ចប់គម្រោងអ្វីមួយ កំណត់សម្គាល់ថា តើសកម្មភាពអ្វីខ្លះដែលខ្លួនពេញចិត្ត ហើយក្រៅតែពីការបំពេញកាតព្វកិច្ច គួរមានពេលជ្រើសរើស សកម្មភាពដែលផ្តល់នូវផាសុកភាព។

៦. ទទួលទានអាហារដោយមានស្មារតី ​៖ បិទទូរទស្សន៍ឬកុំព្យូទ័រ និងដាក់ទូរស័ព្ទនៅឱ្យឆ្ងាយពីដៃកំឡុងពេលទទួលទានអាហារ ហើយផ្តោតទៅលើអាហារដែលខ្លួនកំពុងបរិភោគ រហូតទាល់តែអស់អាហារពីចាន ទន្ទឹមគ្នានោះគួរបញ្ចៀសការបរិភោគឆ្អែតពេក ជំនួសមកវិញគួរទទួលទានក្នុងបរិមាណមួយសមល្មម។

៧. សរសេរអំពីបញ្ហារួចហើយបោះចោល ៖ ការសរសេរអំពីបញ្ហារួចហើយបោះចោល បានជួយឱ្យមានឱកាសទម្លាក់ចុះនូវបញ្ហាដែលបង្កភាពស្មុគស្មាញ រួមទាំងភាពតានតឹង។ ក្រៅពីនោះ សកម្មភាពនេះ បានជួយទៅដល់ការបន្ធូរអារម្មណ៍ដែលមិនល្អ និងការរៀបចំរបៀបគិត។

៨. សកម្មភាពដែលផ្តល់នូវមោទនភាព ៖ បង្កើតជាតារាង ដែលអាចសរសេរសកម្មភាព អ្វីទៅជាការមានមោទភាពរបស់អ្នក ឱ្យបានជារៀងរាល់ថ្ងៃ។ យ៉ាងហោចណាស់ សរសេររឿងរ៉ាវ១០ចំណុច​ដែលអ្នកពិតជារីករាយ ដោយហេតុថា សកម្មភាពទាំងនេះនឹងជួយឱ្យអ្នកផ្តោតលើភាពវិជ្ជមាន ជាជាងរឿងអវិជ្ជមាន រួមទាំងរក្សាទឹកចិត្តឱ្យបន្តឆ្ពោះទៅមុខ៕