វិបត្តិសង្គ្រាមឈ្លានពានរបស់យោធាថៃ មកលើទឹកដីកម្ពុជា​ បានបង្ខំឱ្យសិស្សានុសិស្សរាប់ម៉ឺននាក់ចាកចេញពីផ្ទះសម្បែង ប៉ុន្តែសកម្មភាពអប់រំមិនត្រូវបានកាត់ផ្ដាច់នោះទេ។ យោងតាមរបាយការណ៍របស់ក្រសួងអប់រំ យុវជន និងកីឡា បច្ចុប្បន្ន​មាន​សិស្សភៀសសឹកសរុបចំនួន ១៦៦៩៥ នាក់ បានកំពុងទទួលការសម្របសម្រួលឱ្យចូលរៀនជាបណ្ដោះអាសន្ននៅតាមគ្រឹះស្ថានសិក្សាជាង ២០០០កន្លែង គ្របដណ្ដប់លើរាជធានី-ខេត្តទាំង២៤។

ក្នុងចំណោមគ្រឹះស្ថានសិក្សាដែលកំពុងទទួលបន្ទុកនេះ វិទ្យាល័យភ្នំស្រុក ស្ថិតក្នុងខេត្តបន្ទាយមានជ័យ បានក្លាយជាជម្រកចំណេះដឹងយ៉ាងសំខាន់សម្រាប់សិស្សភៀសសឹកដែលមកពីខេត្តឧត្តរមានជ័យ និងតំបន់រងផលប៉ះពាល់ផ្ទាល់ក្នុងខេត្តបន្ទាយមានជ័យផងដែរ។ លោក ឆែម ឈីន នាយករងវិទ្យាល័យភ្នំស្រុក បានមានប្រសាសន៍ថា បច្ចុប្បន្នមានសិស្សភៀសសឹកសរុបចំនួន ២០២នាក់ ក្នុងនោះសិស្សស្រីចំនួន ១១៩ នាក់ កំពុងទទួលការ​សិក្សា​នៅទីនេះ ចាប់ពីកម្រិតថ្នាក់ទី៧ ដល់ថ្នាក់ទី១២។

នាយករងវិទ្យាល័យភ្នំស្រុក បញ្ជាក់បន្ថែមថា ក្នុង​ការជួយ​សម្រួល​ដល់ការលំបាករបស់សិស្សានុសិស្សដែលរត់ភៀសខ្លួនដោយសារសង្រ្គាម ចោលផ្ទះសម្បែង សាលាបានសម្របសម្រួលលើការស្នាក់នៅ និងការចូលរៀន ដោយ​សាលាក៏បានផ្ដល់នូវសម្ភារៈសិក្សាបឋមរួមមាន សៀវភៅសរសេរ និងប៊ិក សម្រាប់សិស្ស ហើយសាលាក៏កំពុងស្វះស្វែងរកជំនួយបន្ថែមជាសៀវភៅអាន និងសម្ភារៈចាំបាច់ផ្សេងៗទៀតពីសប្បុរសជនផងដែរ។

យុវតី ឡៅ លីដា សិស្សថ្នាក់ទី១២ ដែលភៀសខ្លួនមកពីខេត្តឧត្តរមានជ័យ មករៀននៅវិទ្យាល័យភ្នំស្រុក ខេត្តបន្ទាយមានជ័យ បានលើកឡើងថា ការផ្លាស់ប្ដូរមករៀននៅទីកន្លែងថ្មីដោយសារបញ្ហាសង្គ្រាមនេះ ធ្វើឱ្យនាងពិបាកផ្ចង់អារម្មណ៍លើការសិក្សា ដោយរៀនមិនទាន់គេ ប៉ុន្តែនាងត្រូវតែតស៊ូព្រោះនេះជាឆ្នាំប្រឡងបាក់ឌុប។

ស្រដៀងគ្នានេះដែរ យុវជន សាម៉ាឌី ឌីមិត ជាសិស្សថ្នាក់ទី១២ មកពីខេត្តឧត្តរមានជ័យ ដែលបានភៀសខ្លួនគេចពីការឈ្លានពានរបស់យោធាថៃ បានរៀបរាប់ដែរថា រូបគេបានរត់ភៀសខ្លួនមកជាមួយ​ឪពុកម្តាយ​ដោយគ្មានសូម្បីសម្ភារៈសិក្សា ឬឯកសណ្ឋានសាលា ហើយថែមទាំងត្រូវធ្វើដំណើរឆ្ងាយមករៀននៅវិទ្យាល័យភ្នំស្រុកថែមទៀតផង។ ទោះបីជាជួបឧបសគ្គរារាំងយ៉ាងណាក៏ដោយ ក៏យុវជនរូបនេះនៅតែមានការតាំងចិត្តខ្ពស់ក្នុងការជម្នះគ្រប់យ៉ាង ដើម្បីសម្រេចឱ្យបាននូវនិទ្ទេសល្អក្នុងការសិក្សា។

ក្នុង​ឱកាស​ផ្តល់សម្ភារៈប្រើប្រាស់ សម្ភារៈសិក្សា គ្រឿងឧបភោគបរិភោគ ដល់មន្ទីរអប់រំ យុវជន និងកីឡា នៃ​ខេត្ត​ចំនួន​៦​ដែល​រងការ​ប៉ះពាល់ដោយសង្រ្គាម​ព្រំដែន​ជាមួយ​ប្រទេស​ថៃ កាលពីរសៀលថ្ងៃទី២៣ ខែធ្នូ ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា សង្គ្រាមពិតជាធ្វើឱ្យប៉ះពាល់ដល់ការអប់រំ ហើយបើយើងមិនគិតគូរដល់ការអប់រំនោះ សង្គ្រាមនេះនឹងបន្តប៉ះពាល់ដល់អនាគតរបស់ប្រទេសជាតិយើងថែមទៀត ព្រោះធនធានមនុស្សគឺជាមូលដ្ឋានគ្រឹះនៃការអភិវឌ្ឍជាតិ។ ឯកឧត្តមបន្តថា ទោះក្នុងកាលៈទេសៈលំបាកយ៉ាងណាក៏ដោយ ក្រសួងអប់រំ យុវជន និងកីឡា ប្ដេជ្ញាចិត្តធានាបន្តផ្ដល់នូវការអប់រំប្រកបដោយគុណភាព តាមរយៈការធ្វើកំណែទម្រង់វិស័យអប់រំឱ្យកាន់តែរឹងមាំ បន្តកំណែទម្រង់សាលារៀន និងបន្តយកចិត្តទុកដាក់សម្របខ្លួនទៅនឹងកាលៈទេសៈថ្មីនេះ ខណៈកម្ពុជាកំពុងតែមានវិបត្តិសង្គ្រាមនៅព្រំដែនជាមួយប្រទេសថៃ។

យ៉ាងណាក៏ដោយ ជាការឆ្លើយតបទៅនឹងស្ថានភាពបច្ចុប្បន្ន ឯកឧត្តមរដ្ឋមន្រ្តី​បានផ្តល់​អនុសាសន៍ឱ្យ​សិស្សភៀសសឹកដែល​មកស្នាក់នៅក្នុងខេត្តសៀមរាប ត្រូវបានរៀបចំឱ្យចូលរៀនវេនថ្ងៃ, សម្រាប់សិស្សដែលនៅតាមជំរំភៀសសឹកផ្សេងទៀត ត្រូវបានរៀបចំឱ្យចូលរៀននៅតង់ថ្នាក់រៀនបណ្ដោះអាសន្ន, រៀបចំការរៀននិងបង្រៀននៅតាមបណ្ដុំតូចៗ ដូចជា នៅតាមផ្ទះឬ ទីតាំងសុវត្ថិភាព និងធ្វើស្វ័យសិក្សា ដោយក្រសួងបាននិងកំពុងបន្តផ្តល់ជូននូវសៀវភៅគោល និងសៀវភៅជំនួយការសិក្សានានា ដល់សិស្សភៀសសឹក និងលោកគ្រូអ្នកគ្រូនៅតាមជំរំភៀសសឹក៕