ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បន្ទាប់ពីសភាពការណ៍ព្រំដែនមានសភាពប្រសើរ ក្រោយកម្ពុជា-ថៃ បានចុះហត្ថលេខាលើកិច្ចព្រមព្រៀងបទឈប់បាញ់នៅវេលាម៉ោង១២ថ្ងៃត្រង់ កាលពីថ្ងៃទី២៧ ខែធ្នូ ឆ្នាំ២០២៥ មន្ទីរអប់រំខេត្តបាត់ដំបង ក៏ដូចជាមន្ទីរអប់រំខេត្តកោះកុង បានសម្រេចបើកឱ្យដំណើរការបង្រៀន និងរៀនឡើងវិញ ចំពោះសាលារៀនដែលបានផ្អាកដំណើរការដោយសារសង្រ្គាម។
ក្នុងសេចក្តីជូនដំណឹងពីរដាច់ដោយឡែកពីគ្នា មន្ទីរអប់រំយុវជន និងកីឡា ខេត្តបាត់ដំបង បានណែនាំឱ្យគ្រឹះស្ថានសិក្សា នៃស្រុកចំនួន៥ រួមមានស្រុកសំឡូត ស្រុកកំរៀង ស្រុកសំពៅលូន ស្រុកភ្នំព្រឹក និងស្រុកបាណន់ ដំណើរការបង្រៀន និងរៀនឡើងវិញ ចាប់ពីថ្ងៃទី៣០ ខែធ្នូ ឆ្នាំ២០២៥។ ដោយឡែកមន្ទីរអប់រំ យុវជន និងកីឡា ខេត្តកោះកុង បានជូនដំណឹងឱ្យលោកគ្រូអ្នកគ្រូ បុគ្គលិកអប់រំ ចូលបម្រើការងារវិញ ចំពោះសាលារៀនដែលផ្អាកដំណើរការទាំងអស់ ប៉ុន្តែត្រូវរៀបចំជីកលេណដ្ឋាន (ត្រង់សេ) រួមមួយនៅតាមសាលារៀនរៀងៗខ្លួន និងត្រៀមស្បៀងដើម្បីអាចរៀនរស់ក្នុងសង្រ្គាម។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ក្រោយកិច្ចព្រមព្រៀងបទឈប់បាញ់ ក្រសួងអប់រំបានធ្វើការងារយ៉ាងជិតស្និទ្ធជាមួយអាជ្ញាធរដែនដី ដើម្បីពិនិត្យលទ្ធភាពក្នុងការបើកដំណើរការសាលារៀនជាបណ្តើរៗ ផ្អែកតាមស្ថានភាពជាក់ស្តែង ដើម្បីធានាបាននូវសុវត្ថិភាព និងផលប្រយោជន៍សិក្សារបស់សិស្សានុសិស្សគ្រប់រូប។
លោកបណ្ឌិត ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា មានប្រសាសន៍ថា ការបើកដំណើរការរៀន និងរៀនឡើងវិញនៅពេលនេះ បានបង្ហាញឱ្យឃើញថា រាជរដ្ឋាភិបាលកម្ពុជា ក៏ដូចជាថ្នាក់ដឹកនាំក្រសួង មានការជឿជាក់យ៉ាងមុតមាំទៅលើការអនុវត្តបទឈប់បាញ់។ លោកបណ្ឌិតថា ការបើកសាលារៀនឡើងវិញនៅនេះ វាមិនប្រញាប់ប្រញាល់នោះទេ នោះគឺដើម្បីបំពេញតម្រូវការសិក្សាឱ្យទាន់ពេលវេលា ស្របតាមកម្មវិធីសិក្សា និងម៉ោងពេលដែលបានកំណត់នៅក្នុងសៀវភៅសិក្សាគោល ព្រោះប្រសិនបើសិស្សមិនបានរៀនគ្រប់ម៉ោង ពួកគេនឹងរៀនមិនទាន់កម្មវិធីសិក្សា ដែលអាចនាំឱ្យមានលទ្ធផលខ្សោយ ឬមិនអាចប្រឡងជាប់ក្នុងវិញ្ញាសារួមណាមួយជាដើម។
“សិស្សានុសិស្សក្រោយពេលខកខានការសិក្សា ដោយសារសង្គ្រាមឈ្លានពានរបស់ភាគីថៃមកលើអធិតេយ្យភាពទឹកដីកម្ពុជា គឺធ្វើឱ្យកូនសិស្សស្រេកឃ្លានការរៀនសូត្រ ហើយបើអូសបន្លាយទៅមុខទៀត គឺធ្វើឱ្យពេលវេលានៃការសិក្សាកាន់តែខាតបង់ទៅ”
ការប៉ះទង្គិចប្រដាប់អាវុធរវាងកងទ័ពថៃ និងកម្ពុជា ដែលផ្តើមលើកទីពីរកាលពីថ្ងៃទី៧ ខែធ្នូ ឆ្នាំ២០២៥ បានធ្វើឱ្យសាលារៀនសរុបចំនួន ១៣១១សាលា ស្ថិតក្នុងខេត្តចំនួន៧ជាប់ព្រំដែនកម្ពុជា-ថៃ ត្រូវបិទទ្វារ ដោយធ្វើឱ្យប៉ះពាល់ដល់ការសិក្សារបស់សិស្សានុសិស្សសរុបចំនួន ៣២២ ១០៣នាក់៕
