នៅព្រឹកថ្ងៃពុធនេះ (២៤ ធ្នូ) ក្រសួងអប់រំ យុវជន និងកីឡា រួមជាមួយដៃគូអភិវឌ្ឍន៍ បានប្រកាស​ដាក់​ឱ្យ​អនុវត្ត​ជាផ្លូវការ​នូវ​សៀវភៅ​ពន្លឿនការ​សិក្សា ដែល​មាន៦ចំណងជើង លើ​មុខ​វិជ្ជា​ភាសាខ្មែរ គណិតវិទ្យា វិទ្យាសាស្រ្ត និង​សិក្សា​សង្គម។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា កន្លងមក ក្រសួងអប់រំ យុវជន និងកីឡាបានចេញសេចក្តីណែនាំ ស្តីពីការអនុវត្តកម្មវិធីថ្នាក់ពន្លឿនការសិក្សា ដែលបានផ្តល់ឱកាសសិក្សាឡើងវិញ ជូនសិស្សលើសអាយុ និងកុមារដែលរៀនមិនស្របតាមកម្រិតថ្នាក់ ឱ្យអាចសិក្សាឡើងវិញ និងសម្របខ្លួនទៅនឹងប្រព័ន្ធអប់រំផ្លូវការ។ ឯកឧត្តមបន្តថា កម្មវិធីនេះ​បានរួមចំណែកយ៉ាងសំខាន់ក្នុងការកាត់បន្ថយអត្រាត្រួតថ្នាក់ អត្រាបោះបង់ការសិក្សា និងបង្កើនឱកាសឱ្យពួក​គេអាចបន្តការសិក្សាទៅថ្នាក់បន្ទាប់ប្រកបដោយគុណភាព និងប្រសិទ្ធភាព។

ឯកឧត្តមមានប្រសាសន៍ទៀតថា ដោយមើលឃើញអំពីសារៈសំខាន់នៃកម្មវិធីថ្នាក់ពន្លឿនការសិក្សា ថាជាការផ្តល់ឱកាសឱ្យកុមារអាចទទួលបានសិទ្ធិនិងអនុវត្តសិទ្ធិរបស់ខ្លួនបានពេញលេញ ក្រសួងបានសហការជាមួយអង្គការភាពញញឹមនៃកុមារ (PSE) រៀបចំសៀវភៅថ្នាក់ពន្លឿនការសិក្សាចាប់តាំងពីឆ្នាំសិក្សា២០១១-២០១២ ដែលមាន ១២ក្បាល(សៀវភៅណែនាំគ្រូ និងសៀវភៅសិស្ស) សម្រាប់៣កម្រិតថ្នាក់ និង៤មុខវិជ្ជាគឺ ភាសាខ្មែរ គណិតវិទ្យា វិទ្យាសាស្រ្តអនុវត្ត និងសិក្សាសង្គម និងបានប្រមូលកុមារដែលបោះបង់ចោលការសិក្សា ឱ្យវិលត្រឡប់ចូលរៀនវិញតាមរយៈកម្មវិធី “ស្ពានចម្លង” បានផ្តល់ការបង្រៀនបែបបត់បែន ផ្ដល់ជំនាញចាំបាច់ ដូចជាជំនាញឌីជីថល វិជ្ជាជីវៈ និងភ្ជាប់ការសិក្សាជាមួយឧត្តមសិក្សា ព្រមទាំងទីផ្សារការងារ។

យ៉ាងណាក៏ដោយ នៅក្នុងឆ្នាំ២០២៣ និងឆ្នាំ២០២៤ ក្រសួងអប់រំ យុវជន និងកីឡា សហការជាមួយអង្គការភ្លែនអន្តរជាតិកម្ពុជា និងដៃគូអភិវឌ្ឍន៍ បានធ្វើបច្ចុប្បន្នកម្មសៀវភៅកម្មវិធីថ្នាក់ពន្លឿនការសិក្សាជាបន្តបន្ទាប់ ដើម្បីឱ្យស្របតាមកញ្ចប់សម្ភារៈអំណានថ្នាក់ដំបូង ដែលបានឈានដល់ការបញ្ចប់ជាស្ថាពរ និងដាក់ឱ្យអនុវត្តជាផ្លូវការនាថ្ងៃនេះ។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណដល់ដៃគូអភិវឌ្ឍន៍ និងភាគីពាក់ព័ន្ធទាំងអស់ ដែលបានរួមគ្នាផ្តល់ការគាំទ្រ និងលើកកម្ពស់គុណភាពអប់រំនៅកម្ពុជា និងបានបញ្ជាក់ថា ទោះបច្ចុប្បន្នប្រទេសជាតិកំពុងជួបវិបត្តសង្គ្រាមនៅព្រំដែន និងបញ្ហាប្រឈមមួយចំនួន ក៏យើងមិនត្រូវភ្លេចគោលដៅដែរ។

ឆ្លៀត​ក្នុង​ឱកាសនោះដែរ ឯកឧត្តមរដ្ឋមន្រ្តីបានផ្តល់អនុសាសន៍​ដល់​មន្ត្រីអប់រំគ្រប់លំដាប់ថ្នាក់ ជាពិសេសមន្ត្រីអប់រំនៃមន្ទីរអប់រំ យុវជន និងកីឡា ដែលរងផលប៉ះពាល់ដោយការឈ្លានពានពីសង្រ្គាមរវាងកម្ពុជា-ថៃ សូមបន្តទទួលនិងសម្របសម្រួលសិស្សភៀសសឹកឱ្យចូលរៀន ដោយរៀបចំកម្មវិធីសិក្សា២វេន, រៀបចំការរៀននិងបង្រៀននៅតាមថ្នាក់រៀនបណ្ដោះអាសន្ន ឬ រៀននៅទីសុវត្ថភាពជាដើម ដោយក្រសួងនឹងនៅតែបន្តចែកសៀវភៅសិក្សាគោល និងសៀវភៅជំនួយការសិក្សានានា ដើម្បីសម្រួលដល់ការស្វ័យសិក្សា។

ឯកឧត្តមរដ្ឋមន្រ្តីស្នើ​ដល់ក្រុមការងារពាក់ព័ន្ធ បន្តពិនិត្យ និងដាក់ចេញជាសេចក្តីណែនាំផ្សេងៗ ដើម្បីឆ្លើយតបនឹងស្ថានភាពជាក់ស្តែងដែលការផ្តល់ការអប់រំទាមទារនូវការបត់បែន ដើម្បីកាត់បន្ថយអត្រាសិស្សបោះបង់ចោលការសិក្សា, ហើយសម្រាប់ខេត្តដែលមិនរងផងប៉ះពាល់ពីសង្គ្រាម សូមបន្តយកចិត្តទុកដាក់អនុវត្តកំណែទម្រង់សាលារៀន និងស្តង់ដាសាលារៀនគំរូ៕