ក្នុង​ឱកាស​ជួបសំណេះសំណាលជាមួយ​សិស្ស​ជ័យលាភី​និទ្ទេស A របស់ខេត្តព្រះសីហនុ ក្នុងការ​ប្រឡង​សញ្ញាបត្រ​មធ្យមសិក្សា​ទុតិយភូមិ កាលពីចុងសប្តាហ៍​កន្លងទៅនេះ ឯកឧត្តម សាយ​ សំអាល់ ឧបនាយករដ្ឋមន្រ្តី រដ្ឋមន្រ្តី​ក្រសួងរៀបចំដែនដីនគរូបនីយកម្ម និងសំណង់ និងជា​ប្រធានក្រុមការងារ​រាជរដ្ឋាភិបាល​ចុះ​មូលដ្ឋាន​ខេត្តព្រះសីហនុ បានចូលរួមអបអរសាទរ និងកោតសរសើរចំពោះការខិតខំប្រឹងប្រែងក្នុងការសិក្សារបស់សិស្សប្រឡងជាប់ជ័យលាភីនិទ្ទេស A នៅក្នុងការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៤។

ឯកឧត្តម​ឧបនាយករដ្ឋមន្រ្តី​បញ្ជាក់ថា នេះគឺជាជោគជ័យមួយនៅក្នុងជីវិតសិក្សារបស់សិស្សានុសិស្ស ហើយនេះជាជោគជ័យមួយដែលឪពុកម្ដាយអាណាព្យាបាលសិស្សនិងលោកគ្រូអ្នកគ្រូមានមោទនភាពបំផុត។ តែយ៉ាងណានេះគ្រាន់តែជាជោគជ័យជំហានទីមួយក្នុងជីវិតប៉ុណ្ណោះ ហើយ​ជំហានបន្តបន្ទាប់ទៀតគឺត្រូវខិតខំប្រឹងប្រែងបន្ថែមទៀត ពង្រឹងសមត្ថភាពរបស់ខ្លួនឱ្យ​បានរឹងមាំ ហើយភាពរឹងមាំនេះនឹងអាចជួយឱ្យយើងសម្រេចចិត្តបានត្រឹមត្រូវ ឈានទៅ​ទទួលបានជោគជ័យថ្មីៗក្នុងជីវិត​បន្ត​ទៀត។

ឯកឧត្តម សាយ សំអាល់ បានលើកឡើងថា ប្រមុខរាជរដ្ឋាភិបាលកម្ពុជា សម្ដេចមហាបវរធិបតីហ៊ុនម៉ាណែតនាយករដ្ឋមន្ត្រី មានចក្ខុវិស័យចង់ប្រែក្លាយកម្ពុជាឱ្យ​ទៅជាអារ្យប្រទេសមួយ ជាប្រទេសដែលមានចំណូលមធ្យមកម្រិតខ្ពស់នាឆ្នាំ ២០៣០ និងក្លាយជាប្រទេសដែលមានចំណូលខ្ពស់នាឆ្នាំ២០៥០ ដែលគោលដៅនេះនឹងអាចសម្រេចទៅបានលុះត្រាតែកម្ពុជារក្សាបាននូវសុខសន្តិភាពនិងសម្បូរធនធានមនុស្សប្រកបដោយគុណភាពនិងសមត្ថភាពគ្រប់គ្រាន់ដើម្បីរួមចំណែកអភិវឌ្ឍន៍ប្រទេសជាតិ។

ជាមួយគ្នានេះ ឯកឧត្តម​ប្រធានក្រុមការងារ​រាជរដ្ឋាភិបាល​ចុះ​មូលដ្ឋាន​ខេត្តព្រះសីហនុ ក៏​បានធ្វើការណែនាំដល់សិស្សជ័យលាភីឱ្យជ្រើសរើសមុខវិជ្ជាសិក្សា​បន្ត​ដែលខ្លួនពេញចិត្ត ពិសេសមុខវិជ្ជាដែលយកមកអភិវឌ្ឍខេត្តព្រះសីហនុ ដោយ​ត្រូវចេះចាប់យកឱកាស ព្រោះខេត្តព្រះសីហនុ ត្រូវបានរាជរដ្ឋាភិបាលកំណត់ជាតំបន់សេដ្ឋកិច្ចពិសេសគំរូពហុបំណង ជាខេត្តដែលមានសក្តានុពលផ្នែកពាណិជ្ជកម្ម ឧស្សាហកម្ម សេដ្ឋកិច្ច កសិកម្ម និងទេសចរណ៍ ក្នុងការចូលរួមចំណែកអភិវឌ្ឍប្រទេសជាតិ ដែលជាចក្ខុវិស័យក្នុងការដឹកនាំអភិវឌ្ឍប្រទេសកម្ពុជាឈានឆ្ពោះទៅសម្រេចជាប្រទេសដែលមានចំណូលមធ្យមកម្រឹតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។

បើតាមឯកឧត្តម ម៉ាង ស៊ីណេត អភិបាលខេត្តព្រះសីហនុបានឱ្យ​ដឹងថា នៅក្នុងការប្រឡងសញ្ញាប័ត្រមធ្យមសិក្សាទុតិយភូមិឆ្នាំ២០២៤កន្លងមកនេះ នៅទូទាំងខេត្តព្រះសីហនុមានបេក្ខជនដាក់ពាក្យប្រឡងសរុប១៩០២នាក់ ស្រី៩៨៣នាក់ក្នុងនោះបានប្រឡងជាប់ចំនួន១៥៩៧នាក់ស្មើនឹង៨៣,៩៦%។ សិស្សដែលប្រឡងជាប់និទ្ទេស A មានចំនួន ៤៥នាក់ ស្រី ២៤នាក់, និទ្ទេស B មានចំនួន ១៨៦នាក់ ស្រី១១៥នាក់, និទ្ទេស C មាន ៣២៩នាក់ ស្រី២១០នាក់, និទ្ទេស D មាន ៥១៦នាក់ ស្រី២៧៥នាក់ និងនិទ្ទេស E មាន៥២១នាក់ ស្រី២៤៩នាក់៕