ការយកចិត្តទុកដាក់ចំពោះសុខទុក្ខ ក៏​ដូចជាការសិក្សារបស់កូនៗ គឺជារឿងចាំបាច់សម្រាប់អាណាព្យាបាលគ្រប់រូប។ ទោះជាយ៉ាងណាក៏ដោយ ការសាកសួរ និងតាមដានដោយមិនបានគិតគូរពីសម្ពាធផ្លូវចិត្តកុមារ នឹងធ្វើឱ្យពួកគេគេចវេះមិនចង់និយាយ។ ភាពអត់ធ្មត់ និងការជ្រើសរើសពេលវេលាសមស្រប គឺជាគន្លឹះដើម្បីជៀសវាងបញ្ហានេះ។ តាមរយៈគេហទំព័រ Allsaints បានបង្ហាញអំពីគន្លឹះក្នុងការថែទាំ និងការតាមដានអារម្មណ៍កុមារ ក៏​ដូចជាការចោទជាសំណួរ និងការស្តាប់ដោយយកចិត្តទុកដាក់ ៖

ជៀសវាង​សំណួរ​ដែល​បង្ក​ការ​រំខានចិត្ត ៖ អាណាព្យាបាលមានការស្ទាក់ស្ទើរក្នុងការសួរ ព្រោះបារម្ភអំពីការសួរនាំច្រើនបណ្តាលឱ្យពួកគេកាន់តែមានអារម្មណ៍ធុញទ្រាន់ និងគេចវេះមិនចង់និយាយជាមួយ មិនចង់ឆ្លើយឆ្លងជាដើម។ អ្វីដែលកុមារអាចនឹងមានភាពធុញទ្រាន់គឺការសួរបែបបង្ខំឱ្យពួកគេឆ្លើយ និងនៅពេលពួកគេកំពុងរវល់ ឬក៏ក្នុងស្ថានភាពមមាញឹក ឬក៏នៅសួរដេញដោយភាសាធ្ងន់ៗ និងសួរដេញដោលដោយប្រើប្រាស់សំណួរពីរបីជាប់ៗគ្នាជាដើម ដែលទាំងនេះមិនជួយឱ្យកុមារអាចនិយាយចេញពីសម្ពាធក្នុងចិត្តបានទេ ជំនួសមកវិញគឺជាការបន្ថែមសម្ពាធដល់ពួកគេ ព្រោះកុមារ និងមនុស្សវ័យជំទង់ ក៏ត្រូវការពេលវេលា បរិយាកាសផាសុកភាព និងការគោរពឯកជនភាពដូចគ្នាដែរ។ គួរតែសួរដោយភាសាទន់ភ្លន់ និងនៅពេលពួកគេស្ងប់ចិត្ត! ដូចជាសួរថា កើតអី? មានអារម្មណ៍ម៉េចដែរ?​ ។ល។

ប្រើប្រាស់​វិធីសាស្ត្រ​សួរ​ទៅតាម​អាយុ ៖ អាយុខុសគ្នា របៀបនិយាយក៏ត្រូវការប្រើភាសាខុសគ្នាដែរ! ដូច្នេះការរៀបចំប្រភេទសំណួរ មិនមែនមើលតែទៅលើស្ថានភាព ឬក៏អាកប្បកិរិយារបស់កុមារ ឬមនុស្សវ័យជំទង់នោះទេ ប៉ុន្តែក៏សួរឱ្យស្របទៅតាមវ័យរបស់កុមារដែរ។ ឧទាហរណ៍កុមារនៅកម្រិតអាយុប្រាំឆ្នាំពួកគេអាចមិនទាន់បរិយាយអំពីភាពមិនសប្បាយចិត្តរបស់ពួកគេបាននៅឡើយ ដូច្នេះត្រូវការឱ្យអាណាព្យាបាលបង្កើតជាសាច់រឿងណាមួយដើម្បីជំរុញឱ្យពួកគេរៀនអនុវត្តន៍តាម ឬការប្រើប្រាស់ពីរូបភាព ក្នុងការបង្ហាញជាគំរូ​ ដោយមានរូបតំណាងឱ្យភាពសប្បាយរីករាយ ឬរូបដំណាងឱ្យភាពក្រៀមក្រំ។

អនុវត្ត​ការស្តាប់​ដោយ​យកចិត្តទុកដាក់ ៖ ការស្តាប់មានឥទ្ធិពល ក្នុងការបង្ខិតខ្លួនឱ្យកាន់តែជិតស្និទ្ធជាមួយកុមារ ឬមនុស្សវ័យជំទង់ ហើយការសួរសំណួរគ្រាន់ជាពាក់កណ្តាលនៃការដំណើរការប៉ុណ្ណោះ! ការស្តាប់ដោយយកចិត្តទុកកាន់តែសំខាន់ក្នុងដំណាក់កាលបន្ទាប់ ព្រោះកុមារក៏ឆាប់ចាប់បានពីអារម្មណ៍ នៃភាគីម្ខាងទៀតថា តើបានយកចិត្តទុកដាក់ចំពោះពួកគេកម្រិតណា? អាណាព្យាបាលមួយចំនួនរហ័សក្នុងការដោះស្រាយ និងផ្តល់យោបល់ភ្លាមៗបន្ទាប់ពីស្តាប់បញ្ហា និងអារម្មណ៍របស់ពួកគេ ខណៈការស្តាប់ដោយយកចិត្តទុកដាក់គឺជាចំណែកមួយជួយសម្រាលបន្ទុករបស់កុមារបានមួយផ្នែករួចស្រេចហើយ៕