លោក សែម ដាណុច បច្ចុប្បន្ន​ជានិស្សិតកម្ពុជាកំពុងបន្តសិក្សាថ្នាក់បរិញ្ញាបត្រជាន់ខ្ពស់ទាក់ទងនឹងអាកាសធាតុ ដែលហៅថា កិច្ចសហប្រតិបត្តិការអាកាសធាតុអន្តរជាតិ នៅសាកលវិទ្យាល័យជាតិ អ៉ីនឆន់ ពីកម្មវិធីអាហារូបករណ៍ KOICA ឆ្នាំសិក្សា២០២៥, លោកថា ការស្វែងយល់ និងដឹងពីដំណាក់កាល នៃការដាក់ពាក្យអាហារូបករណ៍នីមួយៗ ជាគន្លឹះសំខាន់ដែលអាចឱ្យបេក្ខជនត្រៀមខ្លួនបានត្រឹមត្រូវ និងមានអាទិភាពខ្ពស់ក្នុងដាក់ពាក្យអាហារូបករណ៍នីមួយៗ។

បើតាមលោក សែម ដាណុច អាហារូបករណ៍ KOICA (ទីភ្នាក់ងារកិច្ចសហប្រត្តិបត្តិការកម្ពុជា-កូរ៉េ) ជាអាហា​រូបករណ៍​​ផ្ដល់តាមក្រសួងស្ថាប័ន សម្រាប់សិស្ស-និស្សិត ជាពិសេសសម្រាប់មន្ត្រីរាជការកម្ពុជាត្រូវបានលើកទឹកចិត្ត។ ដាណុច បន្តថា លក្ខខណ្ឌចាំបាច់ដែលអាហារូបករណ៍ត្រូវការរួមមាន ព្រឹត្តិបត្តិពិន្ទុភាសាអង់គ្លេស IELTS (ជាជម្រើស) ប៉ុន្តែការសិក្សាជាភាសាអង់គ្លេស ដូចនេះភាសាអង់គ្លេសពិតមានតម្រូវការចាំបាច់សម្រាប់បេក្ខជនទៅសិក្សា។ ជាមួយគ្នានេះត្រូវធ្វើតេស្តភាសាអង់គ្លេសតាមរយៈអនឡាញ (Online Test) និងមានការប្រឡងលើវិញ្ញាសារប្រឡងផ្នែកសរសេរ (Writing) និងនិយាយផ្ទាល់មាត់(Speaking)ផងដែរ។

លោក ដាណុច បានរំលេចថា អាហារូបករណ៍ KOICA ជាអាហារូបករណ៍ដែលមានច្រើនដំណាក់កាលក្នុងការប្រឡង (រយៈពេលដាក់ពាក្យតាំងពីខែមករាឆ្នាំ២០២៤ នឹងរងចាំលទ្ធផលនៅខែកក្កដាឆ្នាំ២០២៤)។ សម្រាប់ដំណាក់កាលដំបូង ត្រូវដាក់ស្នើឯកសារដូចជា Research Plan ដែលទាក់ទងនឹងគម្រោងសិក្សាក្នុងថ្នាក់បរិញ្ញាបត្រជាន់ខ្ពស់ និងការឆ្លើយសំណួរដែល KOICA ដាក់ឱ្យ។ នៅដំណាក់កាលទី២ បេក្ខជនត្រូវទៅសម្ភាសន៍នៅការិយាល័យ KOICA ប្រចាំនៅកម្ពុជា ហើយការសម្ភាសន៍នេះនឹងទាក់ទងនឹងប្រវត្តិរបស់បេក្ខជន ប្រវត្តិការងារ (តើប្រវត្តិការងារអាចនឹងទាក់ទងនឹងការរៀនថ្នាក់បរិញ្ញាបត្រជាន់ខ្ពស់នេះដែរឬទេ? )។ ក្រោយសម្ភាសន៍ចប់បេក្ខជនត្រូវរង់ចាំដំណឹងពីខាង KOICA វិញថា ត្រូវបានជ្រើសរើសដើម្បីត្រៀមខ្លួនទៅវគ្គសម្ភាសន៍ជាមួយសាលា ឬមិនបានជ្រើសរើស។ នៅក្នុងវគ្គនេះ ខាងសាលានឹងឱ្យបេក្ខជនធ្វើតេស្ត Writing និង Speaking ដែលគេផ្ដល់ឱ្យស្រាប់ (នេះសម្រាប់តែសាលាដែល លោក ដាណុច បានដាក់ពាក្យស្នើទៅសម្រាប់សាលាផ្សេង អាចមានលក្ខខណ្ឌផ្សេងគ្នា)។

នៅដំណាក់កាលចុងក្រោយ បេក្ខជនត្រូវសម្ភាសន៍ជាមួយភាគីសាលាដែលនិយាយអំពី Research Paper របស់បេក្ខជន ទាក់ទងនឹងការតាំងចិត្តរបស់បេក្ខជនលើការសិក្សា និងស្វែងរកដំណោះស្រាយបែបណាខ្លះដើម្បីដោះស្រាយ ឬយកទៅស្រាវជ្រាវ និងសម្រាប់ពិភាក្សានៅក្នុងថ្នាក់បរិញ្ញាបត្រជាន់ខ្ពស់នេះ។ លើសពីនេះ ភាគីអាហារូបករណ៍ក៏នឹងសួរបន្ថែមដែលទាក់ទងទៅនឹងការប្តេជ្ញាចិត្តរបស់បេក្ខជនប្រសិនជាជួបនៅកំឡុងពេលរៀន ថា តើបេក្ខជនគួរដោះស្រាយ ឬស្វែងរកដំណោះស្រាយបែបណា ហើយមានគោលដៅបែបណាក្រោយបញ្ចប់ការថ្នាក់បរិញ្ញាបត្រជាន់ខ្ពស់នេះ និងមានការរំពឹងទុកបែបណាខ្លះពីកម្មវិធីសិក្សាថ្នាក់បរិញ្ញាបត្រជាន់ខ្ពស់នេះ។ ចំណែកលទ្ធអាហារូបករណ៍ បេក្ខជននឹងទទួលបានក្រោយពីពីរសប្ដាហ៍នៃការសម្ភាសន៍ និងធ្វើតេស្តជាមួយសាលារួចរាល់។

បើតាមលោក សែម ដាណុច សំនួរដែលភាគីអាហារូបករណ៍តែងតែលើកឡើងសួរបេក្ខជនអាហារូបករណ៍ គឺ សួរថា តើបេក្ខជនចាប់អារម្មណ៍លើអ្វីក្នុងការសិក្សាថ្នាក់អាហារូបករណ៍នេះ? ហេតុអ្វីបានជាជ្រើសរើសរៀនជំនាញនេះ? ក្រោយពេលរៀនចប់ តើបេក្ខជននឹងមានគម្រោង ​ឬគោលដៅបែបណាខ្លះក្នុងការប្រើប្រាស់ជំនាញនេះដើម្បីពង្រឹងស្ថាប័នការងារដែលកំពុងបម្រើការ ឬសម្រាប់ប្រទេសរបស់បេក្ខជន? ជាមួយគ្នានេះ ការសិក្សាថ្នាក់បរិញ្ញាបត្រជាន់ខ្ពស់គឺតម្រូវឱ្យនិស្សិតមានបទពិសោធន៍ ឬកំណត់ប្រធានបទណាមួយសម្រាប់ស្រាវជ្រាវ ហើយជាគ្រឹះមួយសំខាន់ដែលអាចឱ្យភាគីអាហារូបករណ៍ជ្រើសរើសយកបេក្ខជន។

“នៅក្នុង Research plan ខ្ញុំបានសំយោគផ្គួបគ្នារវាង Research Plan ដែលធ្លាប់បានសរសេរដើម្បីត្រៀមអាហារូបករណ៍ផ្សេងៗ ជាមួយនឹងសារណាបទបញ្ចប់ថ្នាក់បរិញ្ញាបត្រចូលគ្នា ដែលអាចជាមូលដ្ឋានគ្រឹះនៃការដាក់ពាក្យឱ្យកាន់តែរឹងមាំ”

ត្រឡប់មក​និយាយពីភាពជោគជ័យ​របស់ លោក សែម ដាណុច ដែលជាប់អាហារូបករណ៍ KOICA បានទៅសិក្សានៅសាធារណរដ្ឋកូរ៉េវិញ លោកថា ក្រោយទទួលបានលទ្ធផលជាប់ជាបេក្ខជនជ័យលាភីអាហារូបករណ៍ គឺបានធ្វើឱ្យអ្នកផ្ទះ ជាពិសេសលោកឪពុកលោកមានមោទនភាពជាខ្លាំង ត្បិតលោកទើបតែប្រឡងជាប់ជាមន្ត្រីក្នុងក្រសួងបរិស្ថានកាលពីឆ្នាំមុន ហើយក៏ទទួលបានដំណឹងថា អាចទៅបន្តការសិក្សានៅក្រៅប្រទេសថែមទៀត។ លើសពីនេះ ដាណុច ក៏ទទួលបានការលើកទឹកចិត្ត និងគាំទ្រយ៉ាងពេញទំហឹងពីក្រុមការងារចំពោះឱកាសសិក្សារបស់ខ្លួន ជាពិសេសការលើកទឹកចិត្តពីឯកឧត្ដមអគ្គនាយកដ្ឋានគោនយោបាយ និងយុទ្ធសាស្ត្រ នៃក្រសួងបរិស្ថាន។ ការសាទរចំពោះ ដាណុច ព្រោះនេះជាឱកាស និងជាទិសដៅដែលត្រូវនឹងយុទ្ធសាស្ត្រចក្រានៃវិស័យបរិស្ថានរបស់ក្រសួងបរិស្ថាន ដោយឈរលើអាទិភាពចម្បង៣គឺ ស្អាត បៃតង និងចីរភាព ដែលឆ្ពោះទៅរកការសម្រេចបាននូវអព្យាក្រឹតភាពកាបូន និងជាអ្វីដែលក្រសួងបរិស្ថានកំពុងគិតគូរយ៉ាងខ្លាំងសម្រាប់កម្ពុជានាពេលអនាគត។

គួរជម្រាបថា បច្ចុប្បន្ននេះ ដាណុច កំពុងស្នាក់នៅ និងសិក្សានៅប្រទេសកូរ៉េខាងត្បូង ដោយការសិក្សាមានភាពមមាញឹក បរិយាកាស នៃការសិក្សា និងការរស់នៅមានភាពខុសប្លែក ដាណុច បានរៀនសូត្របានច្រើនពីជុំវិញខ្លួន។ ជាក់ស្ដែង ដាណុច បានបែងចែកពេលវេលាសម្រាប់ម៉ោងសិក្សានៅក្នុងថ្នាក់ ម៉ោងស្វ័យសិក្សា និងម៉ោងសម្រាប់ខ្លួនឯងក្នុងការលំហែរក្រោយពីរៀនជាច្រើនម៉ោងផងដែរ។ និស្សិតរូបនេះ បានបន្ថែមថា ត្បិតត្រូវបែងចែងពេលវេលាច្រើន ហើយមានអារម្មណ៍ថាហត់ នឹងធ្វើឱ្យលោកនឹកដល់កម្ពុជា ដាណុច តែងតែចម្អិនម្ហូបញាំដោយខ្លួនឯង ដែលធ្វើឱ្យលោកអាចបាត់នឹកផ្ទះមួយកម្រិត និងអាចចំណាយពេលវេលាជាមួយខ្លួនឯងផងដែរ៕