ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកស្រី សាង ដានី ជាសិស្សកំពុងត្រៀមបញ្ចប់ការសិក្សាជំនាញធុរកិច្ចភេសជ្ជៈ នៅវិទ្យាស្ថានជាតិសហគ្រិនភាព និងនវានុវត្តន៍ សម្រាប់គម្រោង ១,៥លាននាក់របស់រាជរដ្ឋាភិបាល។ អ្នកស្រីនិយាយថា ជំនាញធុរកិច្ចភេសជ្ជៈនេះនឹងផ្តល់អត្ថប្រយោជន៍ច្រើនសម្រាប់អ្នកស្រី ដូចជាអាចស្វែងរកការងារងាយស្រួល ដោយអាចធ្វើការជាបុគ្គលិកហាងកាហ្វេ ឬបើកតូបកាហ្វេលក់ខ្លួនឯងក៏បាន។
ជំនាញធុរកិច្ចភេសជ្ជៈ គឺជាជំនាញសម្រាប់អ្នកចង់ចាប់អាជីពជាអ្នកធ្វើភេសជ្ជៈ ដែលតម្រូវការនៃជំនាញនេះភាគច្រើនគឺនៅតាមភោជនីយដ្ឋាន ហាងកាហ្វេ ឬ សណ្ឋាគារជាដើម។ អ្នកដែលរៀនជំនាញធុរកិច្ចភេសជ្ជៈ ក៏ចាំបាច់ត្រូវចេះធ្វើការស្រាវជ្រាវ ដើម្បីបង្កើតផលិតផលដែលមានភាពច្នៃប្រឌិត ជាមួយគុណភាព និងសុវត្ថិភាព។ បើតាមអ្នកស្រី ដានី ការចាប់យកជំនាញធុរកិច្ចភេសជ្ជៈ គឺអ្នកស្រីបានមើលឃើញពីស្ថានភាពល្អប្រសើរនៃវិស័យបដិសណ្ឋារកិច្ច ខណៈដែលអ្នកស្រីក៏ស្រឡាញ់ចូលចិត្តជំនាញនេះផងដែរ។
ក្រោយសិក្សាជំនាញនេះអស់រយៈពេលជិតកន្លះឆ្នាំ អ្នកស្រី ដានី អាចស្វែងយល់ពីការធ្វើភេសជ្ជៈបានច្រើនប្រភេទ ជាពិសេសប្រភេទកាហ្វេ ដោយសិក្សាលម្អិតអំពីរបៀបមើលកាហ្វេ ស្គាល់រសជាតិ ការចេះពិនិត្យមើលភាពខុសគ្នារបស់គ្រាប់កាហ្វេ បច្ចេកទេស និងដំណើរការ នៃការឆុងកាហ្វេ ការថែទាំ ការប្រើប្រាស់ និងជ្រើសរើសម៉ាស៊ីនកាហ្វេ និងការបង្កើតភេសជ្ជៈថ្មីៗជាច្រើនទៀត។
ជាការមើលឃើញរបស់អ្នកស្រី ដានី ក្រោយពីបញ្ចប់ការសិក្សាជំនាញនេះ សិស្សអាចស្វែងរកការងារធ្វើនៅតាមហាងកាហ្វេ តាមភោជនីយដ្ឋាន ឬសណ្ឋាគារ ដែលទាក់ទងនឹងផ្នែកឆុងកាហ្វេ ជាពិសេសអាចបើកអាជីវកម្មដោយខ្លួនឯងគ្រប់ទីកន្លែងស្របទៅតាមស្ថានភាពរបស់សិស្ស។ ជាក់ស្ដែងសម្រាប់ស្ត្រីដែលមានបន្ទុកក្នុងការមើលថែកូន និងគ្រួសារ គឺអាចបើកហាងកាហ្វេនៅផ្ទះបានដោយខ្លួនឯង ដើម្បីរកប្រាក់ចំណូលមួយចំណែកជួយសម្រាលការចំណាយផ្សេងៗពីស្វាមីរបស់អ្នកស្រីផងដែរ។
សម្រាប់អ្នកដែលចង់ចាប់យកជំនាញធុរកិច្ចភេសជ្ជៈ អ្នកស្រី ដានី លើកទឹកចិត្តឱ្យទៅស្វែងរកព័ត៌មានទាក់ទងនឹងការសិក្សាឱ្យបានគ្រប់គ្រាន់ និងគ្រឹះស្ថានសិក្សា ឬកន្លែងរៀនដែលមានជំនាញច្បាស់លាស់។ ជាមួយគ្នានេះ សូមយកចិត្តទុកដាក់គ្រប់ចំណុចក្នុងម៉ោងសិក្សា អនុវត្តន៍ឱ្យបានច្រើន និងត្រូវមានភាពច្នៃប្រឌិតផងដែរ៕
