ការរស់នៅដោយភាពឆ្លាតវៃគឺជាជម្រើស ដែលមានន័យថា បុគ្គលម្នាក់ៗ មានសិទ្ធក្នុងការជ្រើសរបៀបរស់បែបណាក៏បាន ប៉ុន្តែដើម្បីឱ្យការប្រើប្រាស់ពេល និងធនធានដែលមានកាន់តែប្រសិទ្ធភាពបន្ថែម ក៏ដូចជាការពង្រឹងបាននូវគុណភាពជីវិត គួរមានទម្លាប់សាកល្បងសកម្មភាពថ្មីៗ និងសាកប្រើប្រាស់វីធីក្នុងការរស់ដោយមានភាពខុសប្លែកគ្នា ដូចជា ការធ្វើសេចក្ដីឆ្លុះបញ្ចាំង និងការកំណត់គោលដៅជាដើម ហើយអ្វីដែលកាន់តែសំខាន់នោះ គឺការជ្រើសសកម្មភាពមួយណាដែលស្របនឹងស្ថានភាពផ្ទាល់ខ្លួនទើបងាយស្រួលក្នុងការវិភាគអំពីលទ្ធផល។

តាមរយៈគេហទំព័រ Entrepreneur បានឱ្យដឹងថា ភាពឆ្លាតវៃក្នុងការរស់នៅ មិនត្រឹមតែផ្តល់ផលវិជ្ជមានក្នុងការរស់នៅប្រចាំថ្ងៃប៉ុណ្ណោះទេ ប៉ុន្តែបានរួមចំណែកដល់ការដោះស្រាយបញ្ហាការងារ និងការធ្វើទំនាក់ទំនងជាដើម។ ភាពឆ្លាតវៃក្នុងការរស់នៅមានរាប់បញ្ចូលទាំងការពង្រឹងចំណេះដឹង និងការអនុវត្តទម្លាប់ល្អៗ និងការថែទាំសុខភាពផ្លូវកាយ និងសុខភាពផ្លូវចិត្តឱ្យបានល្អ។ ខាងក្រោមនេះ គឺជាទម្លាប់៣ ដែលជួយជំរុញលោកអ្នក​ក្នុងការរស់​នៅប្រកបដោយភាពឆ្លាតវៃ ៖

១. អានរៀងរាល់ថ្ងៃ ៖ អាន!​ ប្រយោគនេះសាមញ្ញ​ ប៉ុន្តែត្រូវការរំលឹករហូត ការអានប្រៀបបាននឹងការកម្ដៅសាច់ដុំរាងកាយ កាន់តែអនុវត្តន៍ គឺកាន់តែរឹងមាំ កាន់តែហ្វឹកហាត់ គឺកាន់តែខ្លាំង។ អានមិនត្រឹមតែជាការអភិវឌ្ឍចំណេះដឹងនោះទេ ប៉ុន្តែជាការអភិវឌ្ឍសន្តិភាពផ្លូវចិត្ត ជំរុញដល់ការរកឃើញខ្លួនឯង រួមទាំងការកសាងឱកាសការងារបន្ថែម។ សំណេរនីមួយៗ បានបង្កប់នូវសាច់រឿងដែលមានភាពខុសប្លែកគ្នា មិនថាព័ត៌មាន ទីតាំង និងផ្នត់គំនិតថ្មីៗ។ យ៉ាងណាមិញ ប្រសិនបើមានគោលដៅក្នុងការពង្រឹងចំណេះដឹង នោះការបង្កើតទម្លាប់អាន តាមរយៈសៀវភៅក្ដី អត្ថបទដែលផ្សាយលើប្រព័ន្ធផ្សព្វផ្សាយក្ដី សុទ្ធសឹងតែការរួមចំណែកនាំឱ្យការរស់នៅកាន់តែមានប្រសិទ្ធភាព។

២. កសាងការយល់ដឹងបែបស៊ីជម្រៅ ៖ ចំណុចនេះមានភាពពាក់ព័ន្ធនៅចំណុចទីមួយ នៅត្រង់ថា ការវិភាគព្រឹត្តិការណ៍ណាមួយ បានសមហេតុផលទៅបាន គឺត្រូវការអាន ហើយអាន រាល់ជុំវិញព័ត៌មានដែលពាក់ព័ន្ធ ជាពិសេសនៅពេលមានការវាយតម្លៃ និងការសម្រេចចិត្តអនុម័តលើកិច្ចការអ្វីមួយ។ ក្រៅតែពីការអានដើម្បីទទួលបានព័ត៌មានក្នុងការវិភាគហើយ អ្វីដែលគួរធ្វើបន្ទាប់ គឺការកត់ត្រាបទពិសោធន៍ចាស់ៗ ឆ្លុះបញ្ចាំងនិងផ្ទៀងផ្ទាត់​ការគិតនីមួយៗ ក៏ជាចំណែកសំខាន់ក្នុងការពង្រឹងរបៀបគិតឱ្យបានល្អជាងមុនផងដែរ។

៣. សាកសួរ និងផ្ទៀងផ្ទាត់ឱ្យបានជាប្រចាំ ៖ ក្នុងបរិបទការងារក្ដី ការចរចាក្ដី​ ចាប់ផ្តើមដោយការសួរសំណួរបានច្រើន គឺជាកត្តាសំខាន់មួយក្នុងការបណ្តុះភាពឆ្លាតវៃ។ បន្ទាប់ពីមានទម្លាប់ក្នុងការសួរសំណួររួចហើយ អ្វីដែលគួរអនុវត្តន៍ទៅកាន់ជំហានបន្ទាប់គឺ ការសួរបែបពិស្តារជាងមុន ឬក៏សួរនូវអ្វីដែលភាគីម្ខាងទៀតឆ្លើយមិនអស់​ ចំពោះការសាកសួរទៀតសោត ក៏ត្រូវមានភាពបត់បែនទៅតាមស្ថានភាពនីមួយៗ៕