ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងវេទិកាអប់រំស្តីពីបរិស្ថានបៃតងក្នុងសាលារៀន និងសហគមន៍អន្តរជាតិ និងការអប់រំបែបសតវត្សទី២១ ដើម្បីធ្វើឱ្យយុវជនជំនាន់ថ្មី ទទួលបានជោគជ័យក្នុងពិភពប្រកួតប្រជែងខ្ពស់ កាលពីពេលថ្មីនេះ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា មានប្រសាសន៍ថា វិធីសាស្ត្របង្រៀនកុមារតូចគឺ “ការរៀនតាមរយៈការលេង” ជួយកុមារមានបំណិនក្នុងការសិក្សាពេញមួយជីវិត និងបំណិនសង្គម។
លោកជំទាវបណ្ឌិត គឹម សេដ្ឋានី មានប្រសាសន៍ថា ការអប់រំកុមារតូច ជាមូលដ្ឋានគ្រឹះដ៏សំខាន់សម្រាប់សិស្សានុសិស្សឱ្យទទួលបានទាំងជំនាញរឹង និងជំនាញទន់ ការសិក្សាពេញមួយជីវិត និងបំណិនសតវត្សទី២១ ដូចជាការគិតស៊ីជម្រៅ និងជំនាញដោះស្រាយបញ្ហា ដែលទាំងអស់នេះគឺជាស្ពានដើម្បីឱ្យក្មួយៗត្រៀមខ្លួនរួចរាល់ក្នុងដំណើរសិក្សាបន្តបន្ទាប់ទៀត។
រដ្ឋលេខាធិការប្រចាំការ ក្រសួងអប់រំ បន្ថែមថា វិធីសាស្ត្របង្រៀនកុមារតូចដោយការលេងនេះ គឺគោរពទៅតាមគោលការណ៍នៃការអភិវឌ្ឍកុមារទាំងប្រាជ្ញា បំណិនសង្គម និងការអភិវឌ្ឍរាងកាយជាដើម ដោយទាំងអស់នេះនឹងជួយឱ្យពួកគេមានបំណិនក្នុងការសិក្សាពេញមួយជីវិត និងបំណិនសង្គម ដូចជាមានភាពក្លាហាន ចេះចែករំលែក ចេះធ្វើការងារជាក្រុម ឈានទៅរកភាពជោគជ័យក្នុងការសិក្សាបន្តបន្ទាប់ទៀត ទាំងក្នុងកម្រិតថ្នាក់បឋមសិក្សា មធ្យមសិក្សា ឧត្តមសិក្សា ក៏ដូចជាការសិក្សាពេញមួយជីវិតផងដែរ។
លោកជំទាវបណ្ឌិត គឹម សេដ្ឋានី បានកោតសរសើរ និងវាយតម្លៃខ្ពស់ចំពោះវេទិកាអប់រំស្ដីពីបរិស្ថានបៃតងក្នុងសាលារៀន ដែលបានចូលរួមបំផុសស្មារតីដល់សិស្សានុសិស្សនៅតាមគ្រឹះស្ថានអប់រំមានស្មារតីស្រឡាញ់ ថែរក្សាការពារព្រៃឈើ និងបរិស្ថានបៃតង ជាពិសេសមានឱកាសបានរួមចំណែកថែរក្សាព្រៃឈើ និងដាំកូនឈើដោយខ្លួនឯង នៅក្នុងសាលារៀន និងក្នុងសហគមន៍ជាតិ និងអន្តរជាតិនៅទូទាំងពិភពលោក។
គួរជំរាបជូនថា វិស័យអប់រំតែងតែត្រូវបានយកចិត្តទុកដាក់ ជាពិសេសការអប់រំក្នុងកម្រិតមត្តេយ្យសិក្សា ចាប់តាំងពីយុទ្ធសាស្ត្ររបស់រាជរដ្ឋាភិបាលកម្ពុជាតាំងពីអាណត្តិមុនៗ រហូតមកដល់យុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលអាណត្តិថ្មីនេះ៕
