ក្នុង​ឱកាសចុះពិនិត្យ​មើល​ការ​ប្រឡង​បញ្ជាក់សមត្ថភាព​សិក្ខាកាមដែល​ទទួល​ការ​បណ្តុះបណ្តាល​ជំនាញ​បច្ចេកទេស និង​វិជ្ជាជីវៈ (TVET) ១,៥លាននាក់ កាលពីពេលថ្មីៗនេះ ឯកឧត្តម ហ៊ីង ស៊ីដេត ប្រតិភូរាជរដ្ឋាភិបាល​ទទួល​បន្ទុក​អគ្គនាយក នៃអគ្គនាយកដ្ឋានអប់រំ​បណ្តុះបណ្តាលបច្ចេកទេស និង​វិជ្ជាជីវៈ នៃក្រសួងការងារ បានលើកឡើងថា សិស្សដែល​បានរៀន​ជំនាញបច្ចេកទេស និងវិជ្ជាជីវៈ គឺមានអត្រាទទួលបានការងារខ្ពស់ ក្រោយ​ពួកគេ​បញ្ចប់ការ​សិក្សា។

ឯកឧត្តម ហ៊ីង ស៊ីដេត មានប្រសាសន៍ថា ការបណ្តុះបណ្តាលបច្ចេកទេស និងវិជ្ជាជីវៈ (TVET) គឺផ្តោត​សំខាន់​លើ​ការ​អនុវត្ត​ច្រើន​ជាង​ទ្រឹស្តី ដើម្បីត្រៀមខ្លួនចូលបម្រើក្នុងទីផ្សារការងារព្រោះសិក្ខាកាមសុទ្ធតែបាន ចុះកម្មសិក្សានៅតាមគ្រឹះស្ថានឯកជននានាដើម្បីពង្រឹងសមត្ថភាពចំណេះជំនាញរបស់ខ្លួនយ៉ាងពិតប្រាកដ។

អគ្គនាយកនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ ក៏បានអះអាងពីអត្រាទទួលបានការងារខ្ពស់ក្រោយបញ្ចប់ការសិក្សារបស់សិក្ខាកាមតាមរយៈការចុះអនុស្សរណៈយោគយល់គ្នារវាងក្រសួងការងារ និងបណ្តុះបណ្តាលវិជ្ជាជីវៈ ជាមួយនឹងវិស័យឯកជនទាំង១៨សមាគមដែលរួមមានសភាពាណិជ្ជកម្មកម្ពុជា និងឱកាសការងារដែលនឹងផ្តល់ឱ្យពីទីភ្នាក់ងារជាតិមុខរបរ និងការងាររបស់ក្រសួងការងារ និងបណ្តុះបណ្តាលវិជ្ជាជីវៈដែលកំពុងមានឱកាសការងាររាប់ម៉ឺនកន្លែងក្នុងដៃសម្រាប់ផ្តល់ជូនប្រជាពលរដ្ឋ។

រាជរដ្ឋាភិបាលកម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នៅថ្ងៃទី១៤ ខែវិច្ឆិកា ឆ្នាំ២០២៣ បានដាក់ចេញនូវគោលនយោបាយថ្នាក់ជាតិស្តីពីការបណ្តុះបណ្តាលជំនាញបច្ចេកទេសវិជ្ជាជីវៈដល់យុវជនមកពីគ្រួសារក្រីក្រ និងងាយរងហានិភ័យចំនួន១.៥លាននាក់ដែលជាចំណុចអាទិភាពមួយរបស់រាជរដ្ឋាភិបាលអាណត្តិទី៧នេះ ដើម្បីឱ្យយុវជនក្រុមគោលដៅ ឆាប់ទទួលបានឱកាសការងារសមរម្យក្នុងរយៈពេលខ្លីក្នុងទិសដៅកែប្រែនិងលើកម្ពស់ជីវភាពគ្រួសារឱ្យកាន់តែប្រសើរតាមរយៈយុវជនម្នាក់មានជំនាញមួយយ៉ាងតិចប្រចាំជីវិតដែលមានភាពម្ចាស់ការ មានគុណភាព និងផលិតភាពខ្ពស់សម្រាប់ផ្គត់ផ្គង់ និងឆ្លើយតបបានតាមតម្រូវការទីផ្សារប្រកបដោយចីរភាព ភាពធន់ និងបរិយាបន្ន។

កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងងាយរងហានិភ័យ ត្រូវបានក្រសួងការងារ និងបណ្តុះបណ្តាលវិជ្ជាជីវៈ បើកបវេសនកាលដំបូងកាលពីថ្ងៃទី១៥ ខែមករា ឆ្នាំ២០២៤កន្លងទៅដែលមានសិក្ខាកាមប្រមាណ១ម៉ឺន៥ពាន់នាក់ បានចូលសិក្សាដោយបែងចែកជា៣វេនផ្សេងគ្នា គឺវេនចន្ទ-សុក្រពេញមួយថ្ងៃ វេនចន្ទ-សុក្រពេលយប់ និងវេនពេញមួយថ្ងៃសម្រាប់សៅរ៍-អាទិត្យលើវិស័យអាទិភាពចំនួន១០ និង៣៨មុខជំនាញផ្សេងគ្នា។

មកដល់បច្ចុប្បន្ននេះ វិទ្យាស្ថានបណ្តុះបណ្តាលបច្ចេកទេសចំនួន៣៥ក្នុងចំណោមវិទ្យាស្ថានទាំង៣៧របស់ក្រសួងការងារ និងបណ្តុះបណ្តាលវិជ្ជាជីវៈដែលបង្រៀនវេនចន្ទ-សុក្រពេញមួយថ្ងៃ បាន​បញ្ចប់ការ​បណ្តុះបណ្តាលវគ្គទី១ ជា​បណ្តើរៗហើយ និងបានផ្តើមការធ្វើតេស្តបញ្ជាក់សមត្ថភាព ដើម្បីបញ្ជាក់ពីសមត្ថភាពការងារដោយពិតប្រាកដបន្ទាប់ពីបានសិក្សារយៈពេល៤ខែកន្លងមកនេះ៕