ភ្នំពេញ – ថ្លែងក្នុងកម្មវិធី​ទស្សនកិច្ចសិក្សា (OPEN HOUSE) នៅសាកលវិទ្យាល័យខេមតិច កាលពីពេលថ្មីៗនេះ ឯកឧត្តមបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា ប្រាប់សិស្សានុសិស្សទើបប្រឡងជាប់បាក់ឌុបគួរផ្តោត​ទៅ​លើជំនាញ​ដែល​ខ្លួន​កំពុង​រៀន​នៅ​សាកលវិទ្យាល័យ​ណាមួយ​ ដោយ​មិន​គួរ​រៀនពីរសាកលវិទ្យាល័យក្នុងពេលតែមួយនោះ​ឡើយ។

ឯកឧត្តមបណ្ឌិត សាន វឌ្ឍនា បញ្ជាក់ថា សិស្សានុសិស្សទាំងអស់ ចង់រៀនអ្វីក៏បាន ប៉ុន្តែសូមកុំរៀនពីរសាកលវិទ្យាល័យក្នុងពេលតែមួយ ព្រោះពីថ្ងៃនេះតទៅយើងមិនអាចកាត់បន្ថយហានិភ័យសម្រាប់ខ្លួនឯងតាមរយៈការរៀនពីរសាកលវិទ្យាល័យបានទេ គឺត្រូវចំណាយពេលវេលា ចំណាយកម្លាំងសម្រាប់រៀនតែមួយសាកលវិទ្យាល័យ។

ជាមួយ​គ្នានេះ ឯកឧត្តមបណ្ឌិត សាន វឌ្ឍនា ក៏​បាន​លើកទឹកចិត្ត​ដល់យុវជន​យើងខិតខំប្រឹងប្រែង​រៀន​សូត្រភាសាអង់គ្លេស ដោយថា សម័យនេះ ប្រសិនបើយុវជនមិនចេះប្រើប្រាស់ភាសាអង់គ្លេស គឺនឹង​ធ្វើការងារមិនទាន់គេនោះទេ។ ឯកឧត្តមបណ្ឌិតបន្តថា ប្រសិនបើសិស្សានុសិស្សមិនទាន់រៀនភាសាអង់គ្លេសដែលជាភាសាទី២ គឺត្រូវចាប់ផ្ដើមខំរៀនភាសាអង់គ្លេសនេះនៅពេលចូលសាកលវិទ្យាល័យ។ លើសពីនេះ ប្រសិនបើសិស្សានុសិស្សចេះភាសាទី២ហើយ គួរបន្តស្វែងរករៀនភាសាទី៣ អាចជាភាសាចិន ភាសាជប៉ុន ជាដើម។

“ខ្ញុំសូមលើកយកបុគ្គលគំរូម្នាក់ជាឧទាហរណ៍ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា លោកចេះប្រើប្រាស់ភាសាទាំងអស់ចំនួន ៦ភាសា និងកំពុងបន្តរៀនភាសាទី៧បន្ថែមទៀត”

ឯកឧត្តមបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា

ឯកឧត្តមបណ្ឌិត សាន វឌ្ឍនា មានប្រសាសន៍ថា ទន្ទឹមគ្នានឹងការចេះភាសាទី២ ឬទី៣ យុវជនដែលជាសិសស្សានុសិស្សក៏ត្រូវរៀនប្រើប្រាស់កុំព្យូទ័រ ។ ឯកឧត្តមបណ្ឌិត បន្តថា កាលជំនាន់មុន យុវជនត្រូវចេះ Word, Excel, Power Pont ទើបជាអ្នកចេះកុំព្យូទ័រ ប៉ុន្តែជំនាន់ក្រោយនេះ ត្រូវចេះបង្កើតកម្មវិធី (Programing) ឬចេះដល់ការសរសេរកូដ (Coding) ទើបទាន់សម័យកាលនៃបច្ចេកវិទ្យារីកចម្រើន។

អនុរដ្ឋលេខាធិការក្រសួងអប់រំ លើកទឹកចិត្តដល់សិស្សានុសិស្សទាំងអស់ដែលមិនទាន់តាំងចិត្តថាចង់រៀនជំនាញអ្វីនៅឡើយ ត្រូវដឹងថា ចាប់ពីពេលនេះទៅ គឺអត់មានជំនាញណាមួយ ការងារណាមួយ មុខរបររកស៊ីណាមួយដែលមិនប្រើប្រាស់វិទ្យាសាស្រ្ត និងបច្ចេកវិទ្យានោះទេ។ ទោះបើសិស្សានុសិស្សចង់រៀនផ្នែកគណនេយ្យ ឬផ្នែកទំនាក់ទំនងអន្តរជាតិ និងទោះជាចង់រៀនជាគ្រូបង្រៀនក៏ដោយ បើមិនមានការអប់រំផ្នែកវិទ្យាសាស្រ្ត គឺនឹងមិនទៅមុខទាន់គេនៅដប់ឆ្នាំក្រោយនោះឡើយ៕