ការរៀបចំកាលវិភាគពេលព្រឹកបានល្អ ប្រៀបដូចជាការត្រៀមខ្លួនសម្រាប់ផលិតភា​ពក្នុងមួយថ្ងៃពេញ។ តាមរយៈគេហទំព័រ Power of Positive បានបង្ហាញគន្លឹះបីចំណុចដែលជំរុញភាពស្រស់ស្រាយពេលព្រឹក ដោយមានរៀបរាប់នៅខាងក្រោម ៖

១. រក្សាជាតិទឹកក្នុងខ្លួន និងធ្វើចលនា ៖ មូលហេតុដែលការពិសាទឹកជាមូលហេតុចម្បងគួរអនុវត្តន៍មុនគេ ក្រោយពេលក្រោកពីគេង គឺដោយសារការគេងបានធ្វើឱ្យរាងកាយបាត់បង់ជាតិទឹកជាច្រើនម៉ោង និងត្រូវការបំពេញវិញឱ្យលឿន ដើម្បីរក្សាថាមពល ក៏ដូចជាភាពស្រស់ស្រាយចំពោះរាងកាយឡើងវិញ។​ បន្ថែមពីនោះ កាហូបទឹកនៅពេលព្រឹកក៏ជួយទៅដល់ប្រព័ន្ធរំលាយអាហារនៃរាងកាយ ពង្រឹងដល់ការផ្តោតអារម្មណ៍ ពង្រឹងសុខភាពស្បែក និងរក្សាតុល្យភាពថាមពលរាងកាយទាំងមូលផងដែរ។

២. ការប្រត្តិបត្តិសកម្មភាពអប់រំចិត្ត ៖ មុននឹងចាប់ផ្តើមធ្វើខ្លួនឱ្យមមាញឹកនឹងភារកិច្ចថ្មីៗ ឬមុននឹងចាប់ផ្តើមសម្រេចចិត្តដោះស្រាយបញ្ហាដែលកើតមានប្រចាំថ្ងៃ ការសម្រួលអារម្មណ៍ ការអប់រំផ្លូវចិត្ត ក៏ដូចជាការរំងាប់អារម្មណ៍ឱ្យត្រជាក់ សុទ្ធសឹងតែជាកត្តាដ៏មួយដ៏សំខាន់ក្នុងការរួមចំណែកទៅនឹងទម្លាប់ល្អប្រចាំថ្ងៃ។​​ ការអនុវត្តន៍សកម្មភាពដែលជួយពង្រឹងសុខភាពផ្លូវចិត្តទៀតសោត មានច្រើនទម្រង់ ហើយអាចអនុវត្តន៍ទៅតាមស្ថានភាពជាក់ស្តែងរៀងៗខ្លួន តួយ៉ាងដូចជា ការសរសេរកំណត់ហេតុ ការសមាធិ ការដកដង្ហើមមួយៗវែងៗ និងការនិយាយប្រយោគល្អៗទៅកាន់ខ្លួនឯង សុទ្ធតែជាសកម្មភាពដែលរួមចំណែកអភិវឌ្ឍន៍ទៅកាន់សុខភាពផ្លូវចិត្ត។

៣. ធ្វើផែនការចាប់ផ្តើមថ្ងៃថ្មី ៖ មនុស្សជោគជ័យក្នុងអាជីព ឬរឿងរ៉ាវជីវិត ភាគច្រើនចាប់ផ្តើមជាមួយនឹងថ្ងៃដោយមានក្ដីសង្ឈឹម និងទិសដៅជាក់លាក់។ ដោយការចំណាយពេលខ្លះក្នុងការសរសេរអំពីសកម្មភាពដែលត្រូវធ្វើបន្ទាប់ និងការសម្រេចបាននូវលទ្ធផលណាមួយ ដែលវានឹងជួយជំរុញផលិតភាពនៃការចំណាយពេញមួយថ្ងៃ, តើត្រូវធ្វើផែនការប្រចាំថ្ងៃបែបណាទើបមានប្រសិទ្ធភាព? ក្នុងសម័យបច្ចេកវិទ្យា គួរធ្វើតាមរយៈកម្មវិធីឌីជីផល ព្រោះមានភាពងាយស្រួលក្នុងការយកតាមខ្លួន ក៏ដូចជាការផ្តល់សញ្ញារំលឹកជាដើម។ បន្ថែមពីនោះ គួរមានការបែងចែករាល់មុខងារ និងកម្រិតនៃភាពសំខាន់ៗរបស់សកម្មភាពដែលត្រូវធ្វើទៅតាមសកម្មភាពនីមួយៗ។ ការធ្វើផែនការ គឺជាការកាត់បន្ថយកុំឱ្យកើតមានអាការធុញថប់ និងបារម្ភអំពីកាយចាយពេលមិនបានល្អ ក៏ដូចជាតាមដានរាល់សមទ្ធិផលដែលសម្រេចបាន នៅពេលបានឃើញអំពីសមិទ្ធផលផ្ទាល់ខ្លួន នោះអារម្មណ៍ល្អចំពោះខ្លួនឯងក៏នឹងកើនមានមួយកម្រិតបន្ថែមទៀត៕