ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅពេលដែលយើងសម្គាល់ឃើញថា យើងអសមត្ថភាពគ្រប់គ្រងអារម្មណ៍ខ្លួនឯង មានការភ័យខ្លាចលើសលប់ដោយគ្មានមូលហេតុ មិនសមហេតុផល, ហើយអាចមានអាកប្បកិរិយាប្រថុយប្រថាន ដែលអាចប៉ះពាល់ដល់ខ្លួនឯង និងអ្នកដទៃ មានការតប់ប្រម៉ល់ហួសហេតុ បញ្ហាក្នុងការគេង ផលិតភាពការងារ និងការសិក្សាធ្លាក់ចុះ ចាប់ផ្ដើមផ្ដាច់ខ្លួនចេញពីសង្គម និងអាចមានអារម្មណ៍ចង់ធ្វើបាបខ្លួនឯង ត្រូវមកពិភាក្សាជាមួយគ្រូពេទ្យផ្នែកចិត្តសាស្ត្រ។ នេះជាការលើកឡើងរបស់ វេជ្ជបណ្ឌិត សុខ ហុង អ្នកជំនាញផ្នែកសុខភាពផ្លូវចិត្ត។
លោកវេជ្ជបណ្ឌិត មានប្រសាសន៍ថា បច្ចុប្បន្នជំងឺផ្លូវចិត្ត ដែលជួបញឹកញាប់ជាងគេមាន ជំងឺថប់បារម្ភទូទៅ ជំងឺធ្លាក់ទឹកចិត្ត ជំងឺបាយផូឡា ជំងឺវិកលចរិត និងវិបត្តិដោយសារស្រា និងគ្រឿងញៀនជាដើម។ លោកបន្តថា កត្តាចិត្តសាស្ត្រ កត្តាបទពិសោធន៍ផ្ទាល់ខ្លួន ប្រវត្តិក្រុមគ្រួសារ ភាពតានតឹងប្រចាំថ្ងៃ ទុក្ខព្រួយ ឬក៏បាត់បង់អ្វីមួយ គឺជាមូលហេតុ ដែលបណ្ដាលឱ្យមនុស្សម្នាក់មានបញ្ហាផ្លូវចិត្ត។
លោកបញ្ជាក់ថា បញ្ហាផ្លូវចិត្ត នឹងធ្វើឱ្យមនុស្ស មានឱកាសតិចក្នុងការបំពេញការងារ ការសិក្សា, អាចឈានដល់ការប្រើអំពើហិង្សា ឬបៀតបៀនអ្នកដទៃ ហើយអ្នកមានជំងឺផ្លូវចិត្តមួយចំនួនទៀត អាចគិតថាខ្លួនឯងជាជនបរាជ័យ និងមិនអាចកែប្រែស្ថានភាពរបស់ខ្លួនឯងបាន។
អ្នកជំនាញរូបនេះ បានសង្កត់ធ្ងន់ថា នៅពេលដែលមានបញ្ហាផ្លូវចិត្ត អ្នកជំងឺត្រូវចាំថា មិនមែនមានតែខ្លួនឯងម្នាក់ទេ ដែលមានបញ្ហាសុខភាពផ្លូវចិត្ត ហើយបច្ចុប្បន្នមានធនធាន និងទីកន្លែងជាច្រើន ដែលអាចផ្ដល់សេវាសុខភាពផ្លូវចិត្ត និងអាចជួយឱ្យយើងមានអារម្មណ៍ប្រសើរ។
លោកវេជ្ជបណ្ឌិត សុខ ហុង បានបញ្ជាក់ថា ការព្យាបាលរួមបញ្ចូលគ្នា ទាំងការប្រឹក្សាយោបល់តាមបែបចិត្តសាស្ត្រ និងប្រើឱសថ គឺជាវិធីសាស្ត្រមានប្រសិទ្ធភាព ដែលជួយឱ្យអ្នកជំងឺឆាប់ជាសះស្បើយ។ យ៉ាងណាក៏ដោយ ចំពោះលក្ខខណ្ឌ ដែលត្រូវតែប្រើប្រាស់ឱសថព្យាបាល គឺនៅពេលដែលជំងឺមានស្ថានភាពឈឺរ៉ាំរ៉ៃជាប់ជាប្រចាំ ស្ថិតក្នុងសភាពដែលស្រួចស្រាល ដែលទាមទារឱ្យមានការអន្តរគមន៍ភ្លាមៗ, លើសពីនេះ នៅពេលដែលស្ថានភាពជំងឺប៉ះពាល់ដល់ជីវភាពប្រចាំថ្ងៃរបស់គាត់ជាប្រចាំ មិនអាចបំពេញការងាររបស់ខ្លួនឯងបាន ឬក៏មិនអាចថែទាំសូម្បីតែខ្លួនឯង អ្នកជំងឺចាំបាច់ត្រូវតែប្រើថ្នាំ។
ក្នុងលក្ខខណ្ឌ ដែលបានទៅប្រឹក្សាជាមួយអ្នកចិត្តសាស្ត្រ រយៈពេល ៤ ទៅ៦សប្ដាហ៍ហើយ មិនទាន់មានលទ្ធផលល្អប្រសើរ អ្នកជំងឺត្រូវប្រើឱសថបន្ថែម, លោកវេជ្ជបណ្ឌិតបន្ថែម៕
